ທະນາຄານໂລກ ກ່າວວ່າ ປະເທດທຸກຍາກທີ່ສຸດໃນໂລກ ຜະເຊີນສະພາບໜີ້ສູງສຸດໃນຮອບ 18 ປີ

      ທະນາຄານໂລກ ປະກາດໃນລາຍງານສະບັບໃໝ່ວ່າ: ປະເທດທຸກຍາກທີ່ສຸດໃນໂລກ 26 ປະເທດ ກໍາລັງຜະເຊີນສະພາບໜີ້ສິນລະດັບສູງສຸດ ນັບແຕ່ປີ 2006.

      ທະນາຄານໂລກ ລະບຸວ່າ: ໜີ້ຂອງລັດຖະບານໃນປະເທດເຫລົ່ານີ້ ເຊິ່ງມີປະຊາກອນລວມກັນປະມານ 40% ຂອງປະຊາກອນໂລກ ຢູ່ລະດັບສະເລ່ຍ 72% ຂອງລວມຍອດຜະລິດຕະພັນພາຍໃນ (GDP) ເຊິ່ງຖືເປັນຕົວເລກສູງສຸດໃນຮອບ 18 ປີ.

      ຂະນະດຽວກັນ, ຈໍານວນເງິນຊ່ວຍເຫລືອຂອງສາກົນທີ່ປະເທດດັ່ງກ່າວໄດ້ຮັບຕາມອັດຕາຂອງຜົນຜະລິດທາງເສດຖະກິດຂອງພວກເຂົາຫລຸດລົງສູ່ລະດັບຕໍ່າສຸດໃນຮອບ 20 ປີເຊັ່ນກັນ.

      ທັງນີ້, ທະນາຄານໂລກລະບຸອີກວ່າ: ປະເທດລາຍໄດ້ຕໍ່າກູ້ຢືມເງິນຈໍານວນຫລາຍໃນໄລຍະການລະບາດຂອງພະຍາດໂຄວິດ-19 ສົ່ງຜົນເຮັດໃຫ້ການຂາດດຸນການເງິນເພີ່ມຂຶ້ນເປັນ 3 ເທົ່າ ແລະ ຫລາຍປະເທດບໍ່ສາມາດແກ້ໄຂການຂາດດຸນແບບນີ້ໄດ້ຢ່າງເຕັມສ່ວນ.

     ປັດຈຸບັນ, ເກືອບເຄິ່ງໜຶ່ງຂອງປະເທດທຸກຍາກທີ່ສຸດໃນໂລກ 26 ປະເທດ ປະສົບບັນຫາໜີ້ສິນ ຫລື ມີຄວາມສ່ຽງສູງຈະປະສົບບັນຫາດັ່ງກ່າວ ເຊິ່ງຈໍານວນດັ່ງກ່າວເພີ່ມຂຶ້ນ 2 ເທົ່າ ຈາກຕົວເລກໃນປີ 2015.