ກອງປະຊຸມໄອປາ ຄັ້ງທີ 45 ຈະຈັດຂຶ້ນ 17-23 ຕຸລາ 2024 ຢູ່ຫໍປະຊຸມແຫ່ງຊາດ, ນະຄອນຫລວງວຽງຈັນ
ວັນທີ 14 ຕຸລາ 2024, ທ່ານ ສັນຍາ ປຣະເສີດ ປະທານກຳມາທິການການຕ່າງປະເທດ, ຫົວໜ້າອະນຸກຳມະການກອງເລຂາແຫ່ງຊາດໄອປາ-45 ໄດ້ຖະແຫລງຂ່າວ ກ່ຽວກັບການກະກຽມດຳເນີນກອງປະຊຸມສະມັດຊາໃຫຍ່ໄອປາຄັ້ງທີ 45 ວ່າ: ກອງປະຊຸມສະມັດຊາໃຫຍ່ລັດຖະສະພາລະຫວ່າງຊາດອາຊຽນ ຫລື ໄອປາ (AIPA) ຄັ້ງທີ 45 ຈະໄດ້ຈັດຂຶ້ນວັນທີ 17-23 ຕຸລາ 2024 ທີ່ຫໍປະຊຸມແຫ່ງຊາດ, ນະຄອນຫລວງວຽງຈັນ ພາຍໃຕ້ຫົວຂໍ້: “ບົດບາດຂອງລັດຖະສະພາ ໃນການຊຸກຍູ້ການເຊື່ອມຈອດ ແລະ ການເຕີບໂຕແບບກວມລວມຂອງອາຊຽນ”; ຄະນະຜູ້ແທນທີ່ເຂົ້າຮ່ວມກອງປະຊຸມຄັ້ງນີ້ ນຳໂດຍບັນດາປະທານຈາກລັດຖະສະພາສະມາຊິກໄອປາ, ຄະນະຜູ້ແທນລັດຖະສະພາສັງເກດການ, ແຂກປະເທດເຈົ້າພາບ, ຄູ່ຮ່ວມພັດທະນາຂອງໄອປາ, ເລຂາທິການໃຫຍ່ອາຊຽນ, ເລຂາທິການໃຫຍ່ໄອປາ ແລະ ຄະນະຜູ້ແທນ ສປປ ລາວ ເຈົ້າພາບ ລວມມີປະມານ 500 ທ່ານ.
ກອງປະຊຸມສະມັດຊາໃຫຍ່ໄອປາຄັ້ງທີ 45 ນີ້ ຈະມີກອງປະຊຸມຕ່າງໆທັງໝົດ 12 ກອງປະຊຸມ ຄື:
– ກອງປະຊຸມຄະນະບໍລິຫານງານໄອປາ;
– ກອງປະຊຸມກຳມາທິການການເມືອງ,
– ກອງປະຊຸມກຳມາທິການເສດຖະກິດ,
– ກອງປະຊຸມກຳມາທິການວຽກງານສັງຄົມ,
– ກອງປະຊຸມກຳມາທິການວຽກງານຈັດຕັ້ງພາຍໃນ,
– ກອງປະຊຸມກຳມາທິການສະມາຊິກສະພາເພດຍິງ,
– ກອງປະຊຸມສະມາຊິກລັດຖະສະພາໜຸ່ມໄອປາ,
– ກອງປະຊຸມກຳມາທິການຖະແຫຼງການຮ່ວມ,
– ກອງປະຊຸມພົບປະລະຫວ່າງກອງເລຂາໄອປາ ແລະ ກອງເລຂາອາຊຽນ,
– ກອງປະຊຸມພົບປະກັບລັດຖະສະພາສັງເກດການ,
– ກອງປະຊຸມເວທີຜູ້ນຳການ ເມືອງເພດຍິງ WAIPA,
– ກອງປະຊຸມກອງເລຂາແຫ່ງຊາດຂອງບັນດາລັດຖະສະພາປະເທດສະມາຊິກໄອປາ ແລະ ກອງປະຊຸມເລຂາທິການຂອງຄະນະຜູ້ແທນຂອງບັນດາລັດຖະສະພາສັງເກດການໄອປາ.
ເຊິ່ງຈະໄດ້ລົງເລິກຄົ້ນຄວ້າ, ພິຈາລະນາ ແລະ ຮັບຮອງເອົາຮ່າງມະຕິທັງໝົດ 38 ສະບັບ, ໃນນີ້ຂົງເຂດການເມືອງ 4 ສະບັບ, ຂົງເຂດເສດຖະກິດ 8 ສະບັບ, ຂົງເຂດສັງຄົມ 5 ສະບັບ, ວຽກງານເພດຍິງ 2 ສະບັບ, ວຽກງານຊາວໜຸ່ມ 3 ສະບັບ ແລະ ວຽກງານຈັດຕັ້ງພາຍໃນ 16 ສະບັບ. ພ້ອມທັງຈະໄດ້ປຶກສາຫາລືກ່ຽວກັບບັນຫາທີ່ເປັນຜົນປະໂຫຍດຮ່ວມກັນຂອງພາກພື້ນ ກໍຄືຂອງໂລກ ເພື່ອເພີ່ມທະວີການເຊື່ອມໂຍງພາຍໃນອາຊຽນ ແລະ ລະຫວ່າງອາຊຽນ ກັບ ພາກພື້ນອື່ນ ເພື່ອເຮັດໃຫ້ເສດຖະກິດອາຊຽນມີຄວາມເຂັ້ມແຂງ, ຮັດແຄບຄວາມແຕກໂຕນຂອງລະດັບການພັດທະນາ, ຍົກລະດັບຊີວິດການເປັນຢູ່ຂອງປະຊາຊົນໃຫ້ດີຂຶ້ນ ແລະ ພ້ອມກັນກ້າວໄປຂ້າງໜ້າໂດຍບໍ່ປະຖິ້ມໃຜໄວ້ຂ້າງຫລັງ.
