ຮອງປະທານສະພາແຫ່ງຊາດ ຕີລາຄາສູງຕໍ່ການຢ້ຽມຢາມ ແລະ ເຂົ້າຮ່ວມກອງປະຊຸມໄອປາ ຄັ້ງທີ 45 ຂອງປະທານສະພາແຫ່ງຊາດ ຫວຽດນາມ
ສະຫາຍ ນາງ ສູນທອນ ໄຊຍະຈັກ ຮອງປະທານສະພາແຫ່ງຊາດ ແຫ່ງ ສປປ ລາວ ໄດ້ໃຫ້ສຳພາດ ຕໍ່ສື່ມວນຊົນຫວຽດນາມ ໃນວັນທີ 15 ຕຸລາ ທີ່ຜ່ານມາ ທີ່ສະພາແຫ່ງຊາດ ເນື່ອງໃນໂອກາດທີ່ ສະຫາຍ ເຈິ່ນ ແທງ ເໝີນ ປະທານສະພາແຫ່ງຊາດ ແຫ່ງ ສສ ຫວຽດນາມ ຢ້ຽມຢາມ ສປປ ລາວ ແລະ ເຂົ້າຮ່ວມກອງປະຊຸມໄອປາ ຄັ້ງທີ 45 ທີ່ ສປປ ລາວເປັນເຈົ້າພາບ ຈັດຂຶ້ນໃນລະຫວ່າງວັນທີ 17 – 23 ຕຸລາ 2024 ທີ່ຫໍປະຊຸມແຫ່ງຊາດ.
ສະຫາຍ ນາງ ສູນທອນ ໄຊຍະຈັກ ກ່າວວ່າ: ປີນີ້ ສປປ ລາວ ໄດ້ຮັບກຽດເປັນເຈົ້າພາບຈັດກອງປະຊຸມສຸດຍອດອາຊຽນ ຄັ້ງທີ 44 ແລະ 45 ແລະ ກອງປະຊຸມສຸດຍອດທີ່ກ່ຽວຂ້ອງ ຊຶ່ງຫາກໍ່ສິ້ນສຸດລົງດ້ວຍຜົນສໍາເລັດອັນຈົບງາມ; ສະເພາະ ສະພາແຫ່ງຊາດລາວ, ກໍຮູ້ສືກເປັນກຽດຢ່າງສູງ ທີ່ໄດ້ເປັນເຈົ້າພາບຈັດກອງປະຊຸມໄອປາ ຄັ້ງທີ 45 ໃນອີກບໍ່ເທົ່າໃດວັນຕໍ່ໜ້ານີ້. ພວກຂ້າພະເຈົ້າ ຕີລາຄາສູງທີ່ສະຫາຍ ປະທານສະພາແຫ່ງຊາດແຫ່ງຫວຽດນາມ ໄດ້ເລືອກເອົາປະເທດ ສປປ ລາວ ເປັນປະເທດທໍາອິດໃນການຢ້ຽມຢາມຕ່າງປະເທດໃນຂົງເຂດອາຊີ ໃນນາມເປັນປະທານສະພາແຫ່ງຊາດຫວຽດນາມ, ນີ້ສະແດງໃຫ້ເຫັນເຖິງຄວາມມີຊີວິດຊີວາແຫ່ງສາຍພົວພັນມິດຕະພາບທີ່ຍິ່ງໃຫຍ່, ຄວາມສາມັກຄີພິເສດ ແລະ ການຮ່ວມມືຮອບດ້ານລະຫວ່າງສອງພັກ, ສອງລັດ ແລະ ປະຊາຊົນສອງຊາດ ລາວ-ຫວຽດນາມ-ລາວ.
ການນໍາພາຄະນະຜູ້ແທນຂັ້ນສູງຂອງສະພາແຫ່ງຊາດຫວຽດນາມ ມາຢ້ຽມຢາມທາງການ ແລະ ເຂົ້າຮ່ວມກອງປະຊຸມຄັ້ງສໍາຄັນຂອງອົງການນິຕິບັນຍັດໃນອາຊຽນຄັ້ງນີ້ ເປັນການສະໜັບສະໜູນ ແລະ ກໍາລັງໃຈອັນແຮງກ້າໃຫ້ແກ່ປະຊາຊົນລາວ ເວົ້າລວມ, ເວົ້າສະເພາະ ລະຫວ່າງ ສອງສະພາແຫ່ງຊາດ ແລະ ເປັນການປະກອບສ່ວນສໍາຄັນໃຫ້ແກ່ຜົນສໍາເລັດຂອງກອງປະຊຸມດັ່ງກ່າວ. ພ້ອມນັ້ນ, ຍັງເປັນໂອກາດທີ່ດີສໍາລັບການນໍາຂັ້ນສູງຂອງລາວ ແລະ ຫວຽດນາມ ໄດ້ທົບທວນຄືນມູນເຊື້ອຄວາມສາມັກຄີພິເສດຫາຍາກ ລະຫວ່າງ ສອງປະເທດພວກເຮົາ ທີ່ໄດ້ຮັບການກໍ່ຕັ້ງໂດຍ ປະທານ ໂຮ່ຈິມິນ ຜູ້ຍິ່ງໃຫຍ່, ປະທານ ໄກສອນ ພົມວິຫານ ແລະ ປະທານ ສຸພານຸວົງ ທີ່ເຄົາລົບຮັກ ແລະ ໄດ້ຮັບການຖະນຸຖະໜອມປົກປັກຮັກສາ ແລະ ເສີມຂະຫຍາຍທັງທາງກວ້າງ ແລະ ເລິກ ໂດຍການນໍາຮຸ່ນຕ່າງໆ, ນັກປະຕິວັດ ແລະ ປະຊາຊົນສອງຊາດ ດ້ວຍເລືອດເນື້ອ ແລະ ຢາດເຫື່ອຈົນໄດ້ກາຍເປັນມໍລະດົກລວມທີ່ລໍ້າຄ່າ, ເປັນກົດເກນແຫ່ງການຄົງຕົວ ແລະ ຂະຫຍາຍຕົວຂອງສອງຊາດ, ເປັນໜຶ່ງໃນປັດໄຈແຫ່ງໄຊຊະນະຂອງການປະຕິວັດຂອງ 2 ປະເທດພວກເຮົາ.
ສະຫາຍ ຮອງປະທານສະພາແຫ່ງຊາດ ໄດ້ສະແດງຄວາມດີໃຈທີ່ໃນໄລຍະໃໝ່, ເຖິງສະພາບການສາກົນ, ພາກພື້ນມີຄວາມສັບສົນ, ສະພາບພາຍໃນຂອງ 2 ປະເທດກໍມີຄວາມຫຍຸ້ງຍາກຫຼາຍດ້ານ, ແຕ່ການພົວພັນພິເສດຂອງສອງຊາດ ຍັງສືບຕໍ່ໄດ້ຮັບການເສີມຂະຫຍາຍ, ມີໝາກຜົນດີຂຶ້ນເລື້ອຍໆ ແລະ ພວມນໍາເອົາຜົນປະໂຫຍດຕົວຈິງມາສູ່ປະຊາຊົນ 2 ຊາດນັບມື້ນັບຫຼາຍຂຶ້ນ. ພ້ອມດຽວກັນນີ້, ກໍໄດ້ຕີລາຄາການພົວພັນຮ່ວມມືລະຫວ່າງ 2 ສະພາແຫ່ງຊາດ ວ່າ: ໃນຂະບວນວິວັດແຫ່ງການສ້າງ ແລະ ເສີມຂະຫຍາຍສາຍພົວພັນທີ່ຫາຍາກດັ່ງກ່າວ ກໍໄດ້ມີການປະກອບສ່ວນຢ່າງຕັ້ງໜ້າຂອງອົງການນິຕິບັນຍັດ 2 ປະເທດ. ພວກຂ້າພະເຈົ້າ ມີຄວາມປິຕິຊົມຊື່ນເປັນຢ່າງຍິ່ງທີ່ເຫັນວ່າຕະຫຼອດໄລຍະຫຼາຍສິບປີຜ່ານມາ, ໂດຍສະເພາະນັບແຕ່ມື້ສ້າງຕັ້ງສະພາປະຊາຊົນສູງສຸດໃນປີ 1975 ມາຮອດປັດຈຸບັນ, ສະພາແຫ່ງຊາດທັງສອງໄດ້ຄຽງບ່າຄຽງໄຫຼ່ກັນ, ເສີມຂະຫຍາຍການພົວພັນຮ່ວມມືຮອບດ້ານ ເຊິ່ງສະແດງອອກໃນການແລກປ່ຽນການນໍາຂັ້ນສູງຂອງສະພາແຫ່ງຊາດຂອງ 2 ປະເທດ, ຂັ້ນກໍາມາທິການ, ວິຊາການ ກໍໄປມາຫາສູ່ກັນເປັນປົກກະຕິ, ມີການຝຶກອົບຮົມດ້ານວິຊາພາສາຫວຽດນາມ ແລະ ພາສາລາວ ຫຼາຍຊຸດ, ພິເສດ ປະຊາຊົນລາວ ເວົ້າລວມ, ເວົ້າສະພາແຫ່ງຊາດ ຍັງໄດ້ເປັນຜູ້ໜຶ່ງທີ່ໂຊກດີໄດ້ຮັບຂອງຂວັນອັນລໍ້າຄ່າຈາກພັກ, ລັດຖະບານ ແລະ ປະຊາຊົນຫວຽດນາມ ນັ້ນຄືຫໍສະພາແຫ່ງຊາດຫຼັງໃໝ່ທີ່ໄດ້ຮັບການມອບ-ຮັບໃນປີ 2021 ຜ່ານມາ ແລະ ຕັ້ງຢູ່ໃຈກາງນະຄອນຫຼວງ ຊຶ່ງເປັນສັນຍາລັກແຫ່ງສາຍພົວພັນພິເສດລາວ-ຫວຽດນາມ.
ນອກນັ້ນ, ສະພາແຫ່ງຊາດຂອງ 2 ປະເທດ ຍັງພວມຫ້າວຫັນປະຕິບັດຕາມບົດບັນທຶກຊ່ວຍຈໍາວ່າດ້ວຍການຮ່ວມມື (MOU) ທີ່ການນໍາຂອງສອງສະພາແຫ່ງຊາດໄດ້ລົງນາມຮ່ວມກັນ ແລະ ພິເສດໃນໂອກາດຄົບຮອບ 50 ປີ ຂອງສະພາແຫ່ງຊາດລາວ ແລະ 70 ປີ ຂອງສະພາແຫ່ງຊາດຫວຽດນາມ, ພິເສດ 2 ສະພາແຫ່ງຊາດ ໄດ້ຮ່ວມກັນສ້າງປຶ້ມ 50 ປີ ແຫ່ງສາຍພົວພັນຮ່ວມມືຮອບດ້ານ ແລະ ການພັດທະນາ ລະຫວ່າງ ສະພາແຫ່ງຊາດແຫ່ງ ສປປ ລາວ ແລະ ສະພາແຫ່ງຊາດແຫ່ງ ສສ ຫວຽດນາມ.
ໃນການຮ່ວມມືໃນການຈັດສໍາມະນາ ແລະ ການຊຸກຍູ້ການພົວພັນລະຫວ່າງ 2 ລັດຖະບານ, ສະຫາຍ ນາງ ສູນທອນ ໄຊຍະຈັກ ໄດ້ກ່າວວ່າ: ຫວຽດນາມ ໄດ້ເປັນປະເທດໜຶ່ງໃນຈໍານວນປະເທດແຖວໜ້າ ໃນການລົງທຶນຢູ່ ສປປ ລາວ ດ້ວຍໂຄງການລະດັບຕ່າງໆຫຼາຍຮ້ອຍໂຄງການ ມີມູນຄ່າ 5 ຕື້ກວ່າໂດລາ, ຈັດເປັນອັນດັບ 3 ໃນຈໍານວນປະເທດທີ່ລົງທຶນຫຼາຍທີ່ສຸດຢູ່ລາວ. ໃນໄລຍະຫຼັງໆມານີ້, ມູນຄ່າການຄ້າສອງຝ່າຍເພີ່ມຂຶ້ນ ແຕ່ກໍຍັງບໍ່ທັນສົມຄູ່ກັບການຮ່ວມມືດ້ານການເມືອງເທື່ອ; ສະນັ້ນ, ການນໍາຂັ້ນສູງຂອງພັກ-ລັດ 2 ປະເທດ ໄດ້ມີການປຶກສາຫາລືກັນ ໃນການນໍາເອົາການພົວພັນນີ້ກ້າວສູ່ບາດກ້າວໃໝ່ ໂດຍສະເພາະ ແມ່ນເລັ່ງໃສ່ການເຊື່ອມຈອດ 2 ພື້ນຖານເສດຖະກິດນໍາກັນ ດ້ວຍການເຊື່ອມຈອດດ້ານພື້ນຖານໂຄງລ່າງ, ສ້າງທາງດ່ວນ, ທາງລົດໄຟລາວ-ຫວຽດນາມ, ການຮ່ວມມືດ້ານກະສິກຳ ແລະ ອື່ນໆ ຊຶ່ງຈະເຮັດໃຫ້ການພັດທະນາຂອງ ສປປ ລາວ ມີບາດກ້າວດີຂຶ້ນ. ສະເພາະສະພາແຫ່ງຊາດ ທີ່ເຮັດໜ້າທີ່ຕິດຕາມກວດກາ, ທີ່ຜ່ານມາ 2 ສະພາແຫ່ງຊາດ ກໍໄດ້ມີການຈັດຕັ້ງຄະນະກໍາມະການລົງຕິດຕາມຊຸກຍູ້ການດໍາເນີນໂຄງການລົງທຶນ, ຊອກຮູ້ສະພາບຄວາມເປັນຈິງ ແລະ ຄວາມຫຍຸ້ງຍາກໃນການລົງທຶນຂອງຫວຽດນາມຢູ່ລາວ ເພື່ອຊຸກຍູ້ການຈັດຕັ້ງປະຕິບັດຕາມການຕົກລົງຂອງ 2 ລັດຖະບານຂອງ 2 ປະເທດ.
ສະຫາຍ ນາງ ສູນທອນ ໄຊຍະຈັກ ຍັງໄດ້ກ່າວເຖິງການປະກອບສ່ວນຂອງຫວຽດນາມ ໃນການຮ່ວມມືຂອງລັດຖະສະພາລະຫວ່າງຊາດອາຊຽນ ວ່າ: ພວກຂ້າພະເຈົ້າ ຕີລາຄາສູງຕໍ່ການປະກອບສ່ວນຢ່າງຫ້າວຫັນໃນເວທີພາກພື້ນ ແລະ ສາກົນ ເວົ້າລວມ, ເວົ້າສະເພາະ ການປະກອບສ່ວນຢ່າງຫ້າວຫັນຂອງສະພາແຫ່ງຊາດຫວຽດນາມໃນເວທີໄອປາ ດ້ວຍການໃຫ້ຄໍາຄິດຄໍາເຫັນຢ່າງສ້າງສັນ ຕໍ່ບັນດາບັນຫາທີ່ປະເທດໃນພາກພື້ນພວມປະເຊີນໜ້າຢູ່ໃນປັດຈຸບັນ. ພວກຂ້າພະເຈົ້າ ຮູ້ສຶກດີໃຈທີ່ໃນປີ 2024 ທີ່ ສປປ ລາວ ເປັນເຈົ້າພາບຈັດກອງປະຊຸມສຸດຍອດອາຊຽນ ຄັ້ງທີ 44 ແລະ 45 ແລະ ກອງປະຊຸມສຸດຍອດກ່ຽວຂ້ອງ, ສະພາແຫ່ງຊາດລາວເປັນປະທານໄອປາ ຄັ້ງທີ 45 ນີ້, ສສ ຫວຽດນາມ, ສະພາແຫ່ງຊາດຫວຽດນາມ ໄດ້ຢືນຢູ່ຄຽງຂ້າງພວກຂ້າພະເຈົ້າມາໂດຍຕະຫຼອດ, ມີການຊ່ວຍເຫຼືອດ້ານວັດຖຸປັດໄຈໃຫ້ແກ່ການດໍາເນີນກອງປະຊຸມຄັ້ງສໍາຄັນນີ້ ແລະ ພິເສດ ຫວຽດນາມ ຍັງໄດ້ສົ່ງຊ່ຽວຊານ, ວິຊາການມາຊ່ວຍການກະກຽມຮອບດ້ານ ຂອງກອງປະຊຸມດັ່ງກ່າວ ຊຶ່ງຈະເປັນການຊ່ວຍພວກຂ້າພະເຈົ້າກະກຽມໃຫ້ດີກວ່າເກົ່າ. ພິເສດການທີ່ຄະນະຜູ້ແທນຂັ້ນສູງ ນໍາໂດຍປະທານສະພາແຫ່ງຊາດຫວຽດນາມ ມາເຂົ້າຮ່ວມໃນກອງປະຊຸມໄອປາ ຄັ້ງທີ 45 ນີ້, ຈະເປັນການໃຫ້ກໍາລັງໃຈແຮງກ້າແກ່ເຈົ້າພາບພວກຂ້າພະເຈົ້າ ທັງຈະເປັນການປະກອບສ່ວນສໍາຄັນ ໃຫ້ແກ່ຜົນສໍາເລັດຂອງການດໍາເນີນກອງປະຊຸມຄັ້ງນີ້.
ພ້ອມນີ້, ສະຫາຍ ຮອງປະທານສະພາແຫ່ງຊາດ ໄດ້ຖືໂອກາດນີ້ ອວຍພອນໃຫ້ການມາຢ້ຽມຢາມ ແລະ ເຂົ້າຮ່ວມກອງປະຊຸມໄອປາ ຄັ້ງທີ 45 ນີ້ ຈົ່ງປະສົບຜົນສໍາເລັດເປັນຢ່າງດີ.
