ປກສ ບໍ່ແກ້ວ ນຳຕົວຊາຍມຽນມາ ອາຍຸ 20 ປີ ມາຈໍາລອງເຫດການຄາຕະກໍາ
ວັນທີ 15 ຕຸລາ 2024, ເຈົ້າໜ້າທີ່ພະແນກສືບສວນ-ສອບສວນ ປກສ ແຂວງບໍ່ແກ້ວ, ໄດ້ນໍາຕົວ ທ້າວ ຄົມກິດ ເບເຊກູ ອາຍຸ 20 ປີ, ສັນຊາດມຽນມາທີ່ພັກເຊົາຢູ່ເຂດເສດຖະກິດພິເສດສາມ ລ່ຽມຄໍາ ແຂວງບໍ່ແກ້ວ ມາຈຳລອງຄືນເຫດການຄາຕະກຳ ທ້າວ ຈານ ໄຊມີໂຊກ (ຜູ້ເສຍຊີວິດ) ອາຊີບຂັບລົດຮັບ-ສົ່ງໂດຍສານ ຢູ່ ເມືອງຕົ້ນເຜິ້ງ
ເຈົ້າໜ້າທີ່ໃຫ້ຮູ້ວ່າ: ວັນທີ 17 ກັນຍາຜ່ານມາ ໄດ້ຮັບແຈ້ງເຫດຈາກພົນລະເມືອງວ່າມີເຫດຄາຕະກໍາ ຢູ່ເຂດບ້ານນໍ້າເກິ່ງເກົ່າ ເມືອງຕົ້ນເຜິ້ງ ເຈົ້າໜ້າທີ່ຈຶ່ງໄດ້ລົງກວດກາຊັນລະສູດສະຖານທີ່ເກີດເຫດພົບຜູ້ເສຍຊີວິດ 1 ຄົນ ຖືກແທງດ້ວຍຂອງມີຄົມຕາມຕົນຕົວຫລາຍຈຸດ, ພ້ອມທັງເກັບກໍາຂໍ້ມູນຫລັກຖານ ແລະ ຄັດຈ້ອນເປົ້າໝາຍກໍ່ເຫດ. ມາຮອດວັນທີ 2 ຕຸລາ 2024 ສາມາດກັກຕົວເປົ້າໝາຍໄດ້ ຊື່ ທ້າວຄົມກິດ ເບເຊກູ ອາຍຸ 20 ປີ, ສັນຊາດມຽນມາ ອາຊີບກໍາມະກອນ ປັດຈຸບັນ ພັກເຊົາຢູ່ເຂດພິເສດສາມ ລ່ຽມຄໍາ.
ຜ່ານການສືບສວນ-ສອບສວນ ຜູ້ກ່ຽວຮັບສາລະພາບວ່າ: ໃນມື້ເກີດເຫດໄດ້ໂທຫາ ທ້າວ ຈານ ໄຊມີໂຊກ (ຜູ້ເສຍຊີວິດ) ອາຊີບຂັບລົດຮັບ-ສົ່ງໂດຍສານ ໃຫ້ມາຮັບຢູ່ປະຕູໂຂງ ເມືອງຕົ້ນເຜິ້ງ ເພື່ອຈະຫລິ້ນເມືອງຫ້ວຍຊາຍ, ຮອດເວລາ 21:00 ໂມງ ຜູ້ເສຍຊີວິດຂັບລົດເກງ ມາຮັບແລ້ວຂັບຂີ່ມຸ່ງໜ້າມາເມືອງຫ້ວຍຊາຍ ພໍຮອດເຂດບ້ານນໍ້າເກິ່ງເກົ່າ, ຜູ້ກ່ຽວຈຶ່ງໄດ້ຖາມຄົນຂັບລົດວ່າ: “ມຶງຈື່ກູໄດ້ບໍ່” ຜູ້ເສຍຊີວິດບໍ່ໄດ້ຕອບຫຍັງ ແຕ່ໄດ້ເອົາມີດມາແຕ່ທາງໃດບໍ່ຮູ້ ແກວ່ງມາໃສ່ຜູ້ກ່ຽວທີ່ນັ່ງຢູ່ເບາະຫລັງ ແລະ ໄດ້ເກີດການຕໍ່ສູ້ກັນ, ເຊິ່ງຜູ້ກ່ຽວຍາດໄດ້ ຈຶ່ງໃຊ້ມີດແທງຄູ່ຕໍ່ສູ້ຫລາຍຄັ້ງ ຈົນເຮັດໃຫ້ເສຍຊີວິດຄາທີ່, ຈາກນັ້ນຈຶ່ງ ຍ້າຍຜູ້ເສຍຊີວິດໄປນັ່ງຢູ່ເບາະເບື້ອງຂວາ ແລ້ວ ຜູ້ກ່ຽວຈຶ່ງ ຂັບລົດກັບຄືນໄປທາງເມືອງຕົ້ນເຜິ້ງ ແຕ່ ຂັບລົດບໍ່ເປັນ ເຮັດໃຫ້ລົດເສຍຫລັກຕີນລົດຕົກລົງຮ່ອງອອກບໍ່ໄດ້ ເວລານັ້ນກໍ່ໄດ້ຈັບເອົາໂທລະສັບຜູ້ເສຍຊີວິດແກວ່ງເຂົ້າປ່າຂ້າງທາງ ແລ້ວເອົາຕົວຫລົບໜີໄປ.
ສ່ວນສາເຫດ ແລະ ແຮງຈູງໃຈ ກໍເຫດຄາດຕະກໍາໃນຄັ້ງນີ້ ຍ້ອນວ່າໄລຍະຜ່ານມາ ທັງສອງ ເຄີຍມີເລື່ອງຜິດຖຽງກັນມາກ່ອນແລ້ວ. ປັດຈຸບັນຄະດີດັ່ງກ່າວ, ເຈົ້າໜ້າທີ່ຍັງກັກຕົວຜູ້ກ່ຽວໄວ້ດໍາເນີນຄະດີຕາມລະບຽບກົດໝາຍຕໍ່ໄປ.
