ນາຍົກລັດຖະມົນຕີ ເຂົ້າຮ່ວມພິທີສະເຫລີມສະຫລອງວັນຄູແຫ່ງຊາດ 7 ຕຸລາ ຄົບຮອບ 30 ປີ
ວັນທີ 16 ຕຸລາ 2024, ກະຊວງສຶກສາທິການ ແລະ ກິລາ (ສສກ) ໄດ້ຈັດພິທີສະເຫລີມສະຫລອງສະຫລອງວັນຄູແຫ່ງຊາດ ຄົບຮອບ 30 ປີ (7 ຕຸລາ 1994-7 ຕຸລາ 2024), ມີ ທ່ານ ສອນໄຊ ສີພັນດອນ ນາຍົກລັດຖະມົນຕີ ເຂົ້າຮ່ວມ.
ທ່ານ ພຸດ ສິມມາລະວົງ ລັດຖະມົນຕີກະຊວງສຶກສາທິການ ແລະ ກິລາ ກ່າວວ່າ: ຕະຫລອດໄລຍະຜ່ານມາ ຄູໄດ້ມີຄວາມຫ້າວຫັນ ອຸທິດຕົນແກ່ການສິດສອນໃຫ້ລູກຫລານຊາວລາວບັນດາເຜົ່າກາຍເປັນຜູ້ມີຄວາມຮູ້, ເປັນນັກຮຽນຮູ້ປັນຍາຊົນ, ເປັນຜູ້ຊ່ຽວຊານ ແລະ ເປັນການນຳຂັ້ນຕ່າງໆ; ຄູລາວຍັງໄດ້ປະ ກອບສ່ວນອັນໃຫຍ່ຫລວງໃນພາລະກິດຕໍ່ສູ້ກູ້ຊາດ; ເຮັດການປະຕິວັດຊາດ ປະຊາທິປະໄຕ ແລະ ປົກປັກຮັກສາ ແລະ ສ້າງສາພັດທະນາປະເທດຊາດ; ຍ້ອນແນວນັ້ນການນຳພັກ-ລັດ ແລະ ສັງຄົມ ຈຶ່ງຂະໜານນາມໃຫ້ຄູວ່າ: “ຄູ ເປັນຄົນຂອງພັກ”, “ຄູ ເປັນແມ່ພິມຂອງຊາດ”, “ຄູ ເປັນວິສະວະກອນແຫ່ງດວງວິນຍານ” ເຫລົ່ານີ້ເປັນຕົ້ນ. ໃນໄລຍະທີ່ປະເທດຊາດພົບກັບຄວາມຫຍຸ້ງຍາກຍ້ອນການລະບາດຂອງພະຍາດໂຄວິດ-19, ຄວາມຫຍຸ້ງຍາກທາງດ້ານເສດຖະກິດການເງິນ ແລະ ໄພທໍາມະຊາດ ຄູພວກເຮົາກໍໄດ້ພ້ອມກັນອົດທົນຜ່ານຜ່າຢ່າງມີຜົນສຳເລັດ.
ທ່ານ ສອນໄຊ ສີພັນດອນ ນຍົກລັດຖະມົນຕີ ໄດ້ກ່າວ ຍ້ອງຍໍຊົມເຊີຍຄຸນງາມຄວາມດີຂອງຄູ-ອາຈານ ພ້ອມທັງເນັ້ນໃຫ້ຜູ້ບໍລິຫານການສຶກສາ ແລະ ກິລາ ທຸກຂັ້ນຈົ່ງເພີ່ມທະວີຄວາມຮັບຜິດຊອບຕໍ່ໜ້າທີ່ວຽກງານຂອງຕົນໃນການຄຸ້ມຄອງບໍລິຫານການສຶກສາໃຫ້ສູງຂຶ້ນ, ເອົາໃຈໃສ່ພັດທະນາຊັບພະຍາກອນມະນຸດໃຫ້ມີຄຸນນະພາບໄດ້ມາດຕະຖານຕາມ 3 ລັກສະນະ ແລະ 5 ຫລັກມູນຂອງການສຶກສາ; ເອົາໃຈໃສ່ເພີ່ມທະວີຄວາມຮັບຜິດຊອບຕໍ່ໜ້າທີ່ວຽກງານຂອງຕົນ, ປະຕິບັດໜ້າທີ່ຢ່າງເປັນມືອາຊີບໃຫ້ສົມກັບເປັນແມ່ພິມທີ່ດີຂອງຊາດ ມີຈັນຍາບັນ, ຝຶກຝົນ ແລະ ພັດທະນາຕົນເອງດ້ານວິຊາສະເພາະ, ສຶກສາຄົ້ນຄວ້າ ທໍາຄວາມເຂົ້າໃຈ ກ່ຽວກັບຫຼັກສູດ, ທົບທວນ-ສໍາມະນາກັນຄືນກ່ຽວກັບຮູບແບບ, ເຕັກນິກ, ວິທີການສອນ-ການວັດຜົນ ແລະ ຮັບປະກັນວ່ານັກຮຽນທີ່ຮຽນອ່ອນ-ຮຽນບໍ່ທັນໝູ່ຈະໄດ້ຮັບການບຳລຸງຄືນ.
ນອກຈາກຈະມີວິຊາສະເພາະແລ້ວ ຕ້ອງຮຽນຮູ້ບັນດາທັກສະ ໃນການນໍາໃຊ້ເຕັກໂນໂລຊີຂໍ້ມູນຂ່າວສານ ປະກອບການຮຽນ-ການສອນ, ທັກສະການຮຽນດ້ວຍຕົນເອງ, ທັກສະທາງດ້ານສັງຄົມ, ຮູ້ນໍາໃຊ້ພາສາຕ່າງປະເທດ, ສ້າງຄວາມເຂັ້ມແຂງໃຫ້ແກ່ຄູ ໃນດ້ານເຕັກໂນໂລຊີສຳລັບການສິດສອນ, ການຮຽນຮູ້ຕະຫຼອດຊີວິດ ເພື່ອສົ່ງຄວາມຮູ້ໃຫ້ແກ່ນັກຮຽນ-ນັກສຶກສາຢ່າງມີປະສິດທິຜົນສູງຂຶ້ນ; ສະແດງຄວາມຂອບໃຈ ຕໍ່ຜູ້ບໍລິຫານການສຶກສາ ແລະ ຄູ-ອາຈານ ພາກເອກະຊົນ ທີ່ໄດ້ປະກອບສ່ວນອັນສຳຄັນ ໃຫ້ການສຶກສາແກ່ລູກຫຼານຂອງລາວ ເຊິ່ງໃຫ້ສືບຕໍ່ເສີມສະຫຍາຍມູນເຊື້ອອັນດີທີ່ເຄີຍເຮັດຜ່ານມາ; ຮຽກຮ້ອງໃຫ້ທົ່ວສັງຄົມ, ອົງການປົກຄອງທ້ອງຖິ່ນ ແລະ ຜູ້ປົກຄອງນັກຮຽນ ຈົ່ງພ້ອມກັນຊຸກຍູ້ສົ່ງເສີມໃຫ້ລູກຫຼານ ທີ່ຢູ່ໃນເກນອາຍຸເຂົ້າຮຽນ ໄປເຂົ້າໂຮງຮຽນນັບແຕ່ການສຶກສາກ່ອນໄວຮຽນ, ສາມັນສຶກສາ, ວິຊາຊີບ ແລະ ການສຶກສາຊັ້ນສູງ ແລະ ເອົາໃຈໃສ່ ຕໍ່ການແນະນໍາລູກຫຼານໃນການສຶກສາຮໍ່າຮຽນເວລາຢູ່ເຮືອນ, ອົບຮົມຕັກເຕືອນເຂົາເຈົ້າ ໄດ້ຮັບຮູ້ເຂົ້າໃຈ ແລະ ໃຫ້ເຫັນຄວາມສໍາຄັນຂອງການສຶກສາ ທັງຕໍ່ຕົນເອງ, ຄອບຄົວ, ສັງຄົມ ແລະ ປະເທດຊາດ.
