ທາງສີໄຄ-ສີເກີດ ປັບປຸງ ແລະ ສ້ອມແປງສໍາເລັດແລ້ວ 65% ຄາດວ່າຈະສໍາເລັດໃນເດືອນມີນາ 2025

ວັນທີ 16 ຕຸລາ 2024, ທ່ານ ດາລາວຽງ ຈັນທະລັງສີ, ຜູ້ຈັດການບໍລິຫານໂຄງການປັບປຸງເສັ້ນທາງສີໄຄ ຫາ ສີເກີດ ລາຍງານວ່າ: ໂຄງການປັບປຸງ ແລະ ສ້ອມແປງເສັ້ນທາງເລກ 13 ເໜືອ ໄລຍະທາງແຕ່ ສີໄຄ-ສີເກີດ ມີຄວາມຍາວ 6 ກວ່າກິໂລແມັດ ໄດ້ສຳເລັດແລ້ວ 65%. ປັດຈຸບັນ ທາງໂຄງການພວມເລັ່ງກໍ່ສ້າງຄອງນໍ້າແຄມທາງເຊິ່ງຍັງເຫລືອປະມານ 900 ແມັດ, ຄາດວ່າຈະໃຫ້ສໍາເລັດພາຍໃນທ້າຍເດືອນຕຸລາ 2024 ນີ້, ສ່ວນການເທເບຕົ່ງໜ້າທາງ ແມ່ນສໍາເລັດແລ້ວປະມານ 35%, ຄາດວ່າຈະສໍາເລັດພາຍໃນເດືອນມັງກອນ 2025 ແລະ ໜ້າວຽກອື່ນໆ ເຊິ່ງສາມາດຕີລາຄາໂດຍລວມໄດ້ວ່າການຈັດຕັ້ງປະຕິບັດໂຄງການນີ້ມາຮອດປັດຈຸບັນສໍາເລັດແລ້ວ 65% ຂອງໜ້າວຽກທັງໝົດ.

ປັດຈຸບັນທາງໂຄງການໄດ້ເລັ່ງມືຢ່າງເຕັມ ທີ່ເພື່ອໃຫ້ໂຄງການນີ້ສໍາເລັດໂດຍໄວ, ແຕ່ຜ່ານການປະຕິບັດວຽກງານຕົວຈິງພົບຄວາມຫຍຸ້ງຍາກຫລາຍຢ່າງ ເພາະເປັນເສັ້ນທາງສາຍຫລັກທີ່ມີລົດບັນທຸກໜັກ ແລະ ລົດຊະນະນິດຕ່າງໆ ສັນ ຈອນຢ່າງຫລວງຫລາຍໃນແຕ່ລະວັນເຮັດໃຫ້ການສັນຈອນແອອັດ. ສະນັ້ນ ບັນດາລົດບັນທຸກທັງຫລາຍ ຖ້າເປັນໄປໄດ້ຄວນຫລີກຫລ່ຽງໄປໃຊ້ເສັ້ນທາງອື່ນກ່ອນ ເພື່ອຄວາມສະດວກກວ່າ. ພ້ອມນີ້ ຮຽກຮ້ອງມາຍັງປະຊາຊົນ ກໍຄື ຜູ້ໃຊ້ລົດສັນຈອນໄປມາຜ່ານເສັ້ນທາງທີ່ມີການປັບປຸງ ເອົາໃຈໃສ່ສັງ ເກດປ້າຍຕ່າງໆ ທີ່ໂຄງການວາງໄວ້ໃນແຕ່ລະຈຸດເພື່ອຄວາມປອດ ໄພ ແລະ ບໍ່ສ້າງຄວາມສັບສົນຫຍຸ້ງ ຍາກໃຫ້ແກ່ທາງໂຄງການໃນການຈັດຕັ້ງປະຕິ ບັດວຽກງານຕົວຈິງ.

ຂ່າວ: ວິທະຍຸກະຈາຍສຽງແຫ່ງຊາດ