ຄຳມ່ວນ ກວດພົບນ້ຳຢາດອງສົບຢູ່ໃນອາຫານແຊ່ແຂງທີ່ວາງຂາຍໃນຕະຫລາດເມືອງທ່າແຂກ ແລະ ເມືອງໜອງບົກ

ວັນທີ 10-11 ຕຸລາ 2024, ຂະແໜງລ້ຽງສັດ ແລະ ການປະມົງ ແຂວງຄຳມ່ວນ ໄດ້ລົງກວດກາການນໍາເຂົ້າ ແລະ ຈໍາໜ່າຍສັດນໍ້າ, ຜະລິດຕະພັນສັດນໍ້າ, ອາຫານແຊ່ແຂງ, ອາຫານທະເລຢູ່ຕະຫລາດພາຍໃນເມືອງທ່າແຂກ ແລະ ເມືອງໜອງບົກ ແຂວງຄຳມ່ວນ.

ຜ່ານການກວດກາອາຫານແຊ່ແຂງ ຄື: ປາມຶກ, ກຸ້ງ, ໄກ່ແຊ່ແຂງ, ມ້າມ ແລະໄຂ່ຫລັງ ຢູ່ຕະຫລາດເມືອງທ່າແຂກ ພົບປາມຶກ ແລະ ກຸ້ງ ຫລາຍກວ່າ 11 ກິໂລກຣາມ ມີສານຕົກຄ້າງນ້ຳຢາດອງສົບ ຫລື ຟໍມາລີນ ຫລາຍເກີນກໍານົດ; ສໍາລັບຮ້ານທີ່ຂາຍຕາມແຄມທາງລວມມີ 5 ຈຸດ ກວດພົບສານຟໍມາລີນຕົກຄ້າງໃນກຸ້ງທະເລ 3 ຮ້ານ ລວມນ້ຳໜັກ 18 ກິໂລກຣາມ.

ສ່ວນເມືອງໜອງບົກ ໄດ້ກວດອາຫານປະເພດ ປາມຶກ, ໄກ່ແຊ່ແຂງ, ຫົວໃຈ ພົບ ສານຟໍມາລີນຕົກຄ້າງເກີນກໍານົດໃນອາຫານທະເລທັງ 2 ຈຸດ ນ້ຳໜັກຫລາຍກວ່າ 8 ກິໂລກຣາມ.

ຕໍ່ບັນຫາດັ່ງກ່າວ, ເຈົ້າໜ້າທີ່ໄດ້ເຮັດບົດບັນທຶກກັບເຈົ້າຂອງຮ້ານທີ່ກວດພົບສານຟໍມາລີນໃນອາຫານ ພ້ອມທັງໄດ້ຢຶດສິນຄ້າດັ່ງກ່າວນໍາໄປທໍາລາຍ.

ທີ່ມາ: Khammouane News