ທ່ານ ເນທັນຢາຮູ ກ່າວວ່າ ກຸ່ມແຮັດໂບລາຜິດພາດຄັ້ງໃຫຍ່ ຫລັງສົ່ງໂດຣນໂຈມຕີເຮືອນ ພະຍາຍາມສັງຫານ
ທ່ານ ເບນຈາມິນ ເນທັນຢາຮູ ນາຍົກລັດຖະມົນຕີອິດສະລາແອນ ອອກຖະແຫລງການກ່າວຫາກຸ່ມແຮັດໂບລາວ່າ: ພະຍາຍາມສັງຫານທ່ານ ດ້ວຍການສົ່ງໂດຣນໂຈມຕີເຮືອນພັກຂອງທ່ານຢູ່ເມືອງເຊຊາເຣຍ ທາງພາກເໜືອຂອງອິດສະລາແອນ ທີ່ຢູ່ຫ່າງຊາຍແດນລີບັງປະມານ 70 ກິໂລແມັດ.
ເວລາເກີດເຫດບໍ່ມີລາຍງານວ່າທ່ານ ເນທັນຢາຮູ ຢູ່ເຮືອນພັກ ຫລື ບໍ່ ໂດຍທ່ານ ເນທັນຢາຮູ ຊີ້ວ່າ: ເປັນຄວາມຜິດພາດຄັ້ງໃຫຍ່ຂອງກຸ່ມແຮັດໂບລາ ເຊິ່ງໃຜກໍຕາມທີ່ພະຍາຍາມທໍາຮ້າຍປະຊາກອນອິດສະລາແອນຈະຕ້ອງຊົດໃຊ້ຢ່າງສາສົມ.
ກ່ອນໜ້ານີ້, ໂຄສົກຂອງທ່ານ ເນທັນຢາຮູ ເປີດເຜີຍວ່າ: ມີໂດຣນ 1 ລໍາຖືກສົ່ງໄປເຮືອນພັກຂອງທ່ານ ເນທັນຢາຮູ ແລະ ບິນຕໍາອາຄານຫລັງໜຶ່ງ, ແຕ່ບໍ່ພົບວ່າເກີດການລະເບີດ ຫລື ສົ່ງຜົນເຮັດໃຫ້ມີຜູ້ເສຍຊີວິດ ຫລື ບາດເຈັບ.
ສ່ວນກອງທັບອິດສະລາແອນເປີດເຜີຍວ່າ: ສາມາດສະກັດໂດຣນ 2 ລໍາທີ່ພະຍາຍາມຂ້າມເຂົ້າສູ່ຊາຍແດນອິດສະລາແອນໃນວັນທີ 19 ຕຸລາ ແລະ ລະບຸວ່າ: ກຸ່ມແຮັດໂບລາຍິງຈະຫລວດ ຫລື ລູກສອນໄຟອີກປະມານ 180 ລູກ ໂຈມຕີພາກເໜືອຂອງອິດສະລາແອນ ສົ່ງຜົນເຮັດໃຫ້ມີຜູ້ເສຍຊີວິດ 1 ຄົນ ແລະ ບາດເຈັບ 14 ຄົນ.
ພາຍຫລັງເກີດເຫດ ທາງການອິດສະລາແອນສົ່ງກໍາລັງເຈົ້າໜ້າທີ່ຄວາມໝັ້ນຄົງເຂົ້າຄວບຄຸມສະຖານະການຄວາມປອດໄພ ໂດຍປິດຖະໜົນບໍລິເວນເຮືອນພັກຂອງທ່ານ ເນທັນຢາຮູ.
ທັງນີ້, ກອງທັບອິດສະລາແອນຍັງເດີນໜ້າການໂຈມຕີທາງອາກາດຢູ່ນະຄອນຫລວງເບຣຸດ ແລະ ຫລາຍພື້ນທີ່ທາງໃຕ້ຂອງລີບັງຢ່າງຕໍ່ເນື່ອງ. ຂະນະທີ່ທ່ານ ລອຍ ອອສຕິນ ລັດຖະມົນຕີວ່າການກະຊວງປ້ອງກັນປະເທດອາເມລິກາ ກ່າວລະຫວ່າງເຂົ້າຮ່ວມກອງປະຊຸມ G7 ຢູ່ອິຕາລີວ່າ: ອາເມລິກາຕ້ອງການໃຫ້ອິດສະລາແອນຫລຸດການໂຈມຕີນະຄອນຫລວງເບຣຸດ ໂດຍຊີ້ວ່າ: ຈໍານວນພົນລະເຮືອນທີ່ເສຍຊີວິດ ແລະ ບາດເຈັບນັ້ນສູງເກີນໄປ.
ອ້າງອີງ:
- https://www.reuters.com/world/middle-east/drone-launched-netanyahu-home-northern-israel-spokesman-says-2024-10-19/
- https://www3.nhk.or.jp/nhkworld/en/news/20241020_05/
- https://www.bbc.com/news/articles/cevyr97vrzzo
