ຍີ່ປຸ່ນພົບໄຂ້ຫວັດສັດປີກສາຍພັນຮຸນແຮງລະບາດຄັ້ງທໍາອິດຂອງລະດູການປີນີ້

       ທາງການແຂວງຮັອກໄກໂດຂອງຍີ່ປຸ່ນກວດພົບການແຜ່ລະບາດຂອງເຊື້ອໄຂ້ຫວັດສັດປີກສາຍພັນຮຸນແຮງຢູ່ຟາມໄກ່ແຫ່ງໜຶ່ງ ພາຍຫລັງພົບໄກ່ຕາຍຫລາຍໂຕ ໂດຍຖືເປັນການລະບາດຄັ້ງທໍາອິດທີ່ໄດ້ຮັບການຢືນຢັນໃນລະດູການນີ້ຂອງຍີ່ປຸ່ນ.

      ສໍານັກຂ່າວຊິນຮົວລາຍງານວ່າ: ທາງການເລີ່ມກໍາຈັດໄກ່ປະມານ 19,000 ໂຕຢູ່ຟາມທີ່ພົບເຊື້ອ ເພື່ອເປັນການປ້ອງກັນ, ພ້ອມບັງຄັບໃຊ້ຂໍ້ຈໍາກັດການເຄື່ອນຍ້າຍ ໂດຍຫ້າມຂົນສົ່ງໄກ່ ແລະ ໄຂ່ໃນລັດສະໝີ 3 ກິໂລແມັດຈາກຟາມ ແລະ ຫ້າມຂົນສົ່ງຜະລິດຕະພັນສັດປີກນອກລັດສະໝີ 10 ກິໂລແມັດ.

      ສ່ວນລັດຖະບານທ້ອງຖິ່ນຂອງຮັອກໄກໂດຮຽກຮ້ອງການບັງຄັບໃຊ້ມາດຕະການຄວບຄຸມຢ່າງເຂັ້ມງວດ ເພື່ອປ້ອງກັນການແຜ່ລະບາດເພີ່ມອີກ ແລະ ສ້າງຄວາມໝັ້ນໃຈຕໍ່ປະຊາຊົນວ່າ: ຜະລິດຕະພັນສັດປີກໃນຕະຫລາດຕອນນີ້ປອດໄພຕໍ່ການບໍລິໂພກ.

      ທັງນີ້, ເພື່ອຕອບສະໜອງຕໍ່ການລະບາດດັ່ງກ່າວ ລັດຖະບານຍີ່ປຸ່ນໄດ້ຈັດຕັ້ງສໍານັກງານປະສານງານຂໍ້ມູນ ຢູ່ສູນຈັດການສະພາບວິກິດຂອງນາຍົກລັດຖະມົນຕີ ພ້ອມເລີ່ມຮວບຮວມຂໍ້ມູນຮ່ວມກັບທາງການທ້ອງຖິ່ນ.