ທ່ານ ເນທັນຢາຮູ ກ່າວວ່າ ກຸ່ມແຮັດໂບລາມີແຜນຮຸກຮານຂ້າມແດນມາອິດສະລາແອນ

     ຜູ້ນໍາອິດສະລາແອນກ່າວວ່າ: ກຸ່ມແຮັດໂບລາມີແຜນໂຈມຕີຂ້າມແດນ ພາຍຫລັງພົບອຸໂມງຫລາຍແຫ່ງຕາມຊາຍແດນທີ່ຕິດກັບລີບັງ.

      ນາຍົກລັດຖະມົນຕີ ເບນຈາມິນ ເນທັນຢາຮູ ຜູ້ນໍາອິດສະລາແອນ ກ່າວລະຫວ່າງໃຫ້ສໍາພາດຕໍ່ສະຖານີໂທລະພາບ ຊີນິວ ແລະ ເອີຣົບວັນ ວ່າ: ເມື່ອບໍ່ດົນມານີ້, ເຈົ້າໜ້າທີ່ຝ່າຍຄວາມໝັ້ນຄົງຄົ້ນພົບອຸໂມງຫລາຍແຫ່ງຫ່າງຈາກຊາຍແດນທາງເໜືອຂອງປະເທດອອກໄປພຽງບໍ່ເທົ່າໃດຮ້ອຍແມັດ.

     ນອກຈາກນີ້, ມີການຄົ້ນພົບລູກສອນໄຟ ແລະ ຍານພາຫະນະອີກຫລາຍລາຍການ ເຊິ່ງການຄົ້ນພົບດັ່ງກ່າວບົ່ງບອກວ່າ: ກຸ່ມແຮັດໂບລາກໍາລັງກຽມໂຈມຕີຂ້າມແດນມາອິດສະລາແອນ ໃນລະດັບທີ່ຮຸນແຮງກວ່າປະຕິບັດການຂອງກຸ່ມຮາມັດທີ່ເກີດຂຶ້ນໃນວັນທີ 7 ຕຸລາ 2023.

      ເມື່ອຕົ້ນເດືອນຕຸລາຜ່ານມາ, ທ່ານ ເນທັນຢາຮູ ກ່າວໃນບົດສໍາພາດຕໍ່ໜັງສືພິມ ລາ ຟິກາໂຣ ຂອງຝຣັ່ງວ່າ: ກອງທັບອິດສະລາແອນພົບອາວຸດທັນສະໄໝຂອງຣັດເຊຍເຊື່ອງຢູ່ສາງອາວຸດຂອງກຸ່ມແຮັດໂບລາທີ່ມີການກວດຄົ້ນຈາກປະຕິບັດການຢູ່ທາງພາກໃຕ້ຂອງລີບັງ.

      ຂະນະທີ່ກຸ່ມແຮັດໂບລາຍັງບໍ່ມີທ່າທີຢ່າງເປັນທາງການໃນເລື່ອງນີ້, ແຕ່ອອກຖະແຫລງການຢືນຢັນການເສຍຊີວິດຂອງທ່ານ ຮາເຊມ ຊາຟິດດິນ ວ່າທີ່ຜູ້ນໍາຄົນໃໝ່ຈາກປະຕິບັດການໂຈມຕີທາງອາກາດຂອງກອງທັບອິດສະລາແອນໃນເຂດດາຮິເຢ ເຊິ່ງເປັນພື້ນທີ່ໃຈກາງນະຄອນຫລວງເບຣຸດ ໃນວັນທີ 3 ຕຸລາຜ່ານມາ.