ລາຍງານຄວາມເສຍຫາຍເຫດການພາຍຸ ໝຸນເຂດຮ້ອນ ຈາມີ ພັດເຂົ້າ ຟີລິບປິນ

ສຳນັກຂ່າວ AP ຕ່າງປະເທດລາຍງານວ່າ: ວັນທິ 24 ຕຸລາ 2024 ເວລາ 10:30 ນາທີ ທາງການ ຟິລິບປິນ ໄດ້ລາຍງານຄວາມເສຍຫາຍເຫດການພາຍຸ ໝຸນເຂດຮ້ອນ ຈາມີ ພັດເຂົ້າ ຟີລິບປິນ ເຮັດໃຫ້ມີຜູ້ເສຍຊີວິດຢ່າງໜ້ອຍ 24 ຄົນ ແລະ ສູນຫາຍ 7 ຄົນ.

ພື້ນທີ່ທາງຕອນກາງຕາເວັນອອກ-ຕາເວັນອອກສຽງເໜືອຂອງປະເທດ ໄດ້ຮັບຜົນກະທົບ ຈາກອິດທິພົນຂອງພາຍຸຈາມິ ເຮັດໃຫ້ຝົນຕົກໜັກ ເກີດມີນ້ຳປາໄຫລຊຸ ແລະ ດິນເຈື່ອນຫລາຍຈຸດ, ໜ່ວຍງານບັນເທົາສາທາລະນະໄພຂອງລັດຖະບານ ຟີລິບປິນ ກ່າວວ່າ: ປະຊາຊົນຫລາຍກວ່າ 2 ລ້ານຄົນ ໄດ້ຮັບຜົນກະທົບຈາກພາຍຸຫົວນີ້. ໃນນັ້ນ, ມີປະຊາຊົນ 75,400 ຄົນ ຕ້ອງໄດ້ອົບພະຍົບອອກຈາກບ້ານເຮືອນໄປຢູ່ບ່ອນທີ່ປອດໄພ. ຄາດວ່າພາຍຸຫົວນີ້ຈະອອກຈາກ ຟິລິບປິນ ວັນທີ 24 ຕຸລາ 2024 ນີ້ ແລ້ວເຄື່ອນລົງສູ່ທະເລຈີນໃຕ້.