ອີຣານກ່າວວ່າ ມີສິດຕອບໂຕ້ ພາຍຫລັງທະຫານ 4 ຄົນຕາຍຈາກການໂຈມຕີຂອງອິດສະລາແອນ
ລັດຖະບານເຕຫະຣານປະກາດວ່າ: ມີສິດເອົາຄືນ ກໍລະນີອິດສະລາແອນໂຈມຕີເປົ້າໝາຍຫລາຍແຫ່ງຢູ່ອີຣານ ຂ້າຊີວິດທະຫານຢ່າງໜ້ອຍ 4 ຄົນ.
ກະຊວງການຕ່າງປະເທດອີຣານອອກຖະແຫລງການວ່າ: ອີຣານມີສິດ ແລະ ຄວາມຖືກຕ້ອງຈະປ້ອງກັນຕົນເອງຈາກການຮຸກຮານທຸກຮູບແບບຕາມລະບຸຢູ່ໃນມາດຕາ 51 ຂອງກົດບົດສະຫະປະຊາຊາດ (UN).
ອິດສະລາແອນປະຕິບັດການໂຈມຕີທາງອາກາດຕໍ່ເປົ້າໝາຍຫລາຍແຫ່ງຢູ່ອີຣານ ໃນຕອນເຊົ້າມືດຂອງວັນທີ 26 ຕຸລາຜ່ານມາ ຕາມເວລາທ້ອງຖິ່ນ ເພື່ອຕອບໂຕ້ການຍິງລູກສອນໄຟຂອງອີຣານ ໃນວັນທີ 1 ຕຸລາຜ່ານມາ. ທັງນີ້ ອິດສະລາແອນຢືນຢັນວ່າ: ເປົ້າໝາຍທັງໝົດທີ່ໂຈມຕີກ່ຽວຂ້ອງກັບກິດຈະການທະຫານຂອງອີກຝ່າຍເທົ່ານັ້ນ ສ່ວນຫລາຍເນັ້ນພື້ນທີ່ອ້ອມນະຄອນຫລວງເຕຫະຣານ ແລະ ບາງແຫ່ງທາງຕາເວັນຕົກຂອງອີຣານ.
ສ່ວນກະຊວງປ້ອງກັນປະເທດອີຣານອອກຖະແຫລງການວ່າ: ຄວາມເສຍຫາຍທາງໂຄງສ້າງຈາກປະຕິບັດການທາງທະຫານຂອງອິດສະລາແອນຄັ້ງນີ້ຢູ່ໃນວົງຈໍາກັດ, ແຕ່ມີທະຫານເສຍຊີວິດຢ່າງໜ້ອຍ 4 ຄົນ.
ທັງນີ້, ພົນຕີ ດານຽວ ຮາກາຣີ ໂຄສົກກອງທັບອິດສະລາແອນ ກ່າວວ່າ: ປະຕິບັດການທັງໝົດເປັນໄປຕາມແຜນ ແລະ ບັນລຸເປົ້າໝາຍ ສາມາດທໍາລາຍລະບົບລູກສອນໄຟຈາກພື້ນສູ່ອາກາດຂອງອີຣານ ແລະ ຍັງທໍາລາຍຂີດຄວາມສາມາດໃນການໂຈມຕີທາງອາກາດຂອງອີຣານໄດ້ອີກຈໍານວນໜຶ່ງ. ພ້ອມທັງເຕືອນວ່າ: ຖ້າອີຣານຄິດຕອບສະໜອງຕໍ່ການໂຈມຕີຄັ້ງນີ້ຂອງອິດສະລາແອນຈະຖືເປັນການເລີ່ມຕົ້ນການຍົ່ວຍຸຮອບໃໝ່ ແລະ ສ້າງຄວາມຖືກຕ້ອງອີກໃຫ້ອິດສະລາແອນໃນການຕອບໂຕ້ຢ່າງສາສົມ.
ປະຕິບັດການໂຈມຕີຂອງອິດສະລາແອນຄັ້ງນີ້ເກີດຂຶ້ນເກືອບ 1 ເດືອນ ຫລັງກອງກໍາລັງພິທັກປະຕິວັດອີຣານ (IRGC) ຍິງລູກສອນໄຟປະມານ 200 ລູກ ໃສ່ອິດສະລາແອນ ໃນວັນທີ 1 ຕຸລາຜ່ານມາ ເພື່ອຕອບໂຕ້ອິດສະລາແອນສັງຫານພັນທະມິດຫລາຍຄົນໃນແນວຮ່ວມອັກສະແຫ່ງການຕໍ່ຕ້ານ ລວມທັງທ່ານ ຮໍາຊັນ ນາສຣາລເລາະ ຜູ້ນໍາສູງສຸດຂອງກຸ່ມແຮັດໂບລາ ແລະ ທ່ານ ອິສມາອິລ ຮານິເຢ ຜູ້ນໍາສູງສຸດຝ່າຍການເມືອງຂອງກຸ່ມຮາມັດ.
