ຜູ້ນໍາມັລດິບຖືກຫັກເງິນເດືອນ 50% ຕາມມາດຕະການຮັດສາຍແອວສະບັບໃໝ່
ປະທານາທິບໍດີ ໂມຮາເມັດ ມຸຍຊູ ຜູ້ນໍາມັລດິບ ປະຫລຸດເງິນເດືອນຂອງພະນັກງານລັດ 50% ຕາມສ່ວນໜຶ່ງຂອງມາດຕະການຮັດສາຍແອວຮອບໃໝ່ ເພື່ອປ້ອງກັນວິກິດໜີ້.
ສໍານັກງານປະທານາທິບໍດີມັລດິບ ລະບຸໃນຖະແຫລງການວ່າ: ທ່ານ ມຸຍຊູ ຈະບັງຄັບໃຊ້ມາດຕະການຫລຸດເງິນເດືອນ 50% ຕໍ່ພະນັກງານວຽກສ່ວນຫລາຍ ຖືເປັນການຫລຸດເງິນເດືອນຄັ້ງໃຫຍ່ສຸດຂອງປະເທດ.
ແຫລ່ງຂ່າວຂອງລັດຖະບານມາເລ ລະບຸວ່າ: ນັບແຕ່ປີໜ້າເປັນຕົ້ນໄປ ເງິນເດືອນປະຈໍາຂອງທ່ານ ມຸຍຊູ ຈະຫລຸດລົງເຫລືອ 600,000 ຣູຟີຢາ ຈາກ 1.2 ລ້ານຣູຟີຢາ ແຕ່ຕົວເລກດັ່ງກ່າວສູງເກືອບສອງເທົ່າຂອງລາຍໄດ້ຄອບຄົວສະເລ່ຍ ເຊິ່ງຢູ່ລະດັບ 316,740 ຣູຟີຢາຕໍ່ປີ ຕາມຂໍ້ມູນສໍາມະໂນຄົວປີ 2016.
ເຖິງວ່າຜູ້ພິພາກສາ ແລະ ສະມາຊິກສະພານິຕິບັນຍັດໃນລັດຖະສະພາ ຈະໄດ້ຮັບການຍົກເວັ້ນຈາກການຫລຸດເງິນເດືອນ, ແຕ່ສໍານັກງານປະທານາທິບໍດີມັລດິບ ຄາດຫວັງວ່າ: ພວກເຂົາຈະຊ່ວຍແບ່ງເບົາພາລະ ໂດຍຍິນຍອມຫລຸດເງິນເດືອນຂອງຕົນເອງ 50% ດ້ວຍຄວາມສະໝັກໃຈ.
ເມື່ອສອງອາທິດຜ່ານມາ, ທ່ານ ມຸຍຊູ ມີຄໍາສັ່ງປົດບຸກຄົນທີ່ທ່ານແຕ່ງຕັ້ງ 255 ຄົນ ລວມທັງລັດຖະມົນຕີ 7 ຄົນ, ຮອງລັດຖະມົນຕີ 43 ຄົນ ແລະ ຜູ້ອໍານວຍການຝ່າຍການເມືອງ 178 ຄົນ ເພື່ອພະຍາຍາມຫລຸດຄ່າໃຊ້ຈ່າຍຂອງມັລດິບ ໂດຍທາງການຄາດວ່າການເຄື່ອນໄຫວດັ່ງກ່າວຊ່ວຍໃຫ້ປະເທດປະຢັດເງິນໄດ້ປະມານ 370,000 ໂດລາສະຫະລັດຕໍ່ເດືອນ.
ທາງການມັລດິບ ລະບຸໃນເດືອນກັນຍາຜ່ານມາວ່າ: ບັນຫາທາງການເງິນເກີດຂຶ້ນພຽງຊົ່ວຄາວ ແລະ ປະເທດບໍ່ມີແຜນຈະຂໍເງິນຊ່ວຍເຫລືອຈາກກອງທຶນການເງິນສາກົນ (IMF) ເຖິງວ່າມີຄໍາເຕືອນວ່າ: ລັດຖະບານມາເລມີຄວາມສ່ຽງອາດຜິດນັດຊໍາລະໜີ້ກໍຕາມ.
