ພາຍຸໝູນເຂດຮ້ອນ Trami ພັດຜ່ານຟິລິບປິນ ມີຜູ້ເສຍຊີວິດ 100 ຄົນ ມູນຄ່າເສຍຫາຍເບືອງຕົ້ນ 825 ລ້ານເປໂຊ ຫລື ປະມານ 310 ຕື້ກວ່າກີບ

ສຳນັກຂ່າວ The Manila Time ຂອງຟິລິບປິນ ລາຍງານ ໃນວັນທີ 28 ຕຸລາ 2024 ນີ້ວ່າ: ຈາກເຫດການພາຍຸເຂດຮ້ອນ Trami ພັດຂຶ້ນຝັ່ງທະເລຟິລິບປິນ ໂດຍສະເພາະນະຄອນຫຼວງມະນິລາ ເຮັດໃຫ້ເກີດນໍ້າຖ້ວມ ແລະ ດິນເຈື່ອນ ມີຜູ້ເສຍຊີວິດແລ້ວ 100 ກວ່າຄົນ ແລະ ມີຜູ້ສູນຫາຍອີກຢ່າງໜ້ອຍ 36 ຄົນ.

ພາຍຸ ເຂດຮ້ອນ Trami ເປັນພາຍຸໄຕ້ຝຸ່ນຫົວທີ 11 ທີ່ພັດເຂົ້າຟີລິບປີນ ໃນປີ 2024 ສົ່ງຜົນກະທົບຕໍ່ ປະຊາຊົນ ໃນ 16 ພາກພື້ນຂອງປະເທດ ແລະ ຫຼາຍກວ່າ 5.7 ລ້ານຄົນ, ໂດຍສະເພາະພາກພື້ນບີໂກລ ແລະ ຄາລາບາໂຊນ ລວມເຖິງຫລາຍພື້ນທີ່ທາງພາກກາງ ແລະ ພາກໃຕ້ຂອງປະເທດ.

ໜ່ວຍກູ້ໄພຟີລິບປິນ ເປີດເຜີຍວ່າ: ປະຊາຊົນຕິດຄ້າງຢູ່ຕາມທ່າເຮືອ 8,000 ກວ່າຄົນ, ດ້ານໜ່ວຍງານທີ່ກ່ຽວຂ້ອງກຳລັງເລັ່ງຄົ້ນຫາຜູ້ສູນຫາຍ 36 ຄົນ ຊຶ່ງອາດຖືກດິນເຈື່ອນ ທັບຖົມໄວ້ ຫຼື ກະແສນ້ຳພັດໜີໄປ ສ້າງຄວາມເສຍຫາຍຕໍ່ໂຄງສ້າງພື້ນຖານ ປະມານ 825 ລ້ານເປໂຊ (ສະກຸນເງິນຟີລິບປິນ) ຫລື ປະມານ 310 ຕື້ກວ່າກີບ ແລະ ສ້າງຄວາມເສຍຫາຍຕໍ່ຂະແໜງກະສິກໍາ ປະມານ 1,432 ລ້ານເປໂຊ ຫລື ປະມານ 540 ຕື້ກວ່າກີບ.