ຜູ້ບັນຊາການ IRGC ຂູ່ອິດສະລາແອນ ລະວັງເລື່ອງເໜືອຄວາມຄາດໝາຍ ຫລັງໂຈມຕີອີຣານ
ຜູ້ບັນຊາການກອງກໍາລັງພິທັກປະຕິວັດອີຣານເຕືອນອິດສະລາແອນວ່າ: ການໂຈມຕີອີຣານໃນທ້າຍອາທິດຜ່ານມາ ອາດນໍາໄປສູ່ການເປີດຜົນລັບທີ່ເໜືອຄວາມຄາດໝາຍ.
ສື່ທ້ອງຖິ່ນຫລາຍແຫ່ງຂອງອີຣານ ລວມທັງສໍານັກຂ່າວທາສນິມ ພ້ອມໃຈເຜີຍແຜ່ຖະແຫລງການຂອງ ພົນຕີ ຮອສເຊັນ ຊາລາມີ ຜູ້ບັນຊາການກອງກໍາລັງພິທັກປະຕິວັດອີຣານ (IRGC) ກ່ຽວກັບກໍລະນີອິດສະລາແອນໂຈມຕີທາງທະຫານຕໍ່ເປົ້າໝາຍຫລາຍແຫ່ງໃນອີຣານ ໃນວັນທີ 26 ຕຸລາຜ່ານມາ ບໍ່ສາມາດບັນລຸເປົ້າໝາຍໄດ້ ເຖິງວ່າມີການຢືນຢັນວ່າທະຫານອີຣານ 4 ຄົນເສຍຊີວິດກໍຕາມ.
ທັງນີ້, ພົນຕີ ຊາລາມີ ກ່າວອີກວ່າ: ຜົນທີ່ເກີດຂຶ້ນຕາມມາຕໍ່ຈາກນີ້ຈະເໜືອຄວາມຄາດໝາຍ, ແຕ່ຍັງບໍ່ມີການຂະຫຍາຍຄວາມ.
ທ່ານ ຢາຕໍເລາະ ອາລີ ຄາເມເນອີ ຜູ້ນໍາສູງສຸດຂອງອີຣານ ກ່າວເຖິງເລື່ອງນີ້ວ່າ: ບໍ່ຄວນໄດ້ຮັບການຕີຄວາມ ຫລື ປະເມີນຫລາຍກວ່າ ຫລື ໜ້ອຍກວ່າຄວາມເປັນຈິງ.
ຂະນະດຽວກັນ, ທ່ານ ຄາເມເນອີ ກ່າວວ່າ: ອີຣານຄວນສະແດງອໍານາດຕໍ່ອິດສະລາແອນ ໂດຍຂໍໃຫ້ໜ່ວຍງານທີ່ກ່ຽວຂ້ອງເປັນຜູ້ກໍານົດ ໂດຍຄໍານຶງເຖິງຜົນປະໂຫຍດຂອງປະເທດ ແລະ ບ້ານເມືອງເປັນສໍາຄັນ, ແຕ່ຍັງບໍ່ມີການກໍານົດໄລຍະເວລາຈະແຈ້ງ.
ສ່ວນກະຊວງການຕ່າງປະເທດອີຣານຢືນຢັນການມີສິດ ແລະ ຄວາມຖືກຕ້ອງຈະປ້ອງກັນຕົນເອງຈາກຄວາມຮຸນແຮງທຸກຮູບແບບຕາມທີ່ລະບຸຢູ່ໃນມາດຕາ 51 ຂອງກົດບັດສະຫະປະຊາຊາດ (UN).
ທັງນີ້, ອິດສະລາແອນປະຕິບັດການໂຈມຕີທາງອາກາດຕໍ່ເປົ້າໝາຍຫລາຍແຫ່ງໃນອີຣານ ໃນວັນທີ 26 ຕຸລາຜ່ານມາ ເພື່ອຕອບໂຕ້ການຍິງລູກສອນໄຟຂອງອີຣານ ໃນວັນທີ 1 ຕຸລາ ໂດຍອີຣານໃຫ້ເຫດຜົນວ່າ: ເອົາຄືນກໍລະນີອິດສະລາແອນສັງຫານພັນທະມິດຫລາຍຄົນໃນແນວຮ່ວມອັກສະແຫ່ງການຕໍ່ຕ້ານ ໂດຍລວມທັງທ່ານ ຮໍາຊັນ ນາສຣາລເລາະ ຜູ້ນໍາສູງສຸດຂອງກຸ່ມແຮັດໂບລາ ແລະ ທ່ານ ອິສມາອິລ ຮານິເຢ ຜູ້ນໍາສູງສຸດຝ່າຍການເມືອງຂອງກຸ່ມຮາມັດ.
