ສະເປນຍັງສາຫັດ ຜູ້ເສຍຊີວິດຈາກນໍ້າຖ້ວມຄັ້ງໃຫຍ່ໃນຮອບເຄິ່ງສະຕະວັດເພີ່ມເປັນ 155 ຄົນ

      ຈໍານວນຜູ້ເສຍຊີວິດຈາກນໍ້າຖ້ວມຄັ້ງຮຸນແຮງໃນຮອບ 52 ປີ ຂອງສະເປນ ເພີ່ມເປັນຢ່າງໜ້ອຍ 155 ຄົນ ທ່າມກາງຄວາມກັງວົນກ່ຽວກັບຄວາມຮຸນແຮງຂອງສະພາບໂລກຮ້ອນ.

      ກ່ຽວກັບຄວາມຄືບໜ້າ ເຫດການນໍ້າຖ້ວມຄັ້ງໃຫຍ່ຢູ່ທາງຕາເວັນອອກ ແລະ ທາງໃຕ້ຂອງສະເປນ ເຊິ່ງເປັນຜົນມາຈາກອິດທິພົນຂອງພາຍຸທີ່ເກີດຂຶ້ນໃນທະເລເມດິເຕີເຣນຽນ ແລະ ສົ່ງຜົນເຮັດໃຫ້ຝົນຕົກຫລາຍຜິດປົກກະຕິນັບແຕ່ຕົ້ນອາທິດນີ້ ເຖິງຂັ້ນບາງພື້ນທີ່ມີປະລິມານຝົນສະສົມພາຍໃນເວລາບໍ່ເທົ່າໃດຊົ່ວໂມງ ທຽບເທົ່າສະຖິຕິໝົດປີ.

      ສໍານັກງານປ້ອງກັນ ແລະ ບັນເທົາໄພແຫ່ງແຄວ້ນບາເລນເຊຍ ທາງຕາເວັນອອກຂອງສະເປນ ເຊິ່ງເປັນພື້ນທີ່ປະສົບໄພໜັກໜ່ວງທີ່ສຸດ ຢືນຢັນຈໍານວນຜູ້ເສຍຊີວິດເພີ່ມເປັນຢ່າງໜ້ອຍ 155 ຄົນ. ຂະນະທີ່ທາງການແຄວ້ນກັສຕິຢາ-ລາມັນຊາ ເຊິ່ງຢູ່ທາງພາກກາງ ແລະ ມີຊາຍແດນຕິດກັບແຄວ້ນບາເລນເຊຍ ລາຍງານພົບຜູ້ເສຍຊີວິດຢ່າງໜ້ອຍ 2 ຄົນ ແລະ ທາງການແຄວ້ນອັນດາລູຊິອາ ເຊິ່ງຕັ້ງຢູ່ທາງພາກໃຕ້ຂອງສະເປນ ຢືນຢັນຜູ້ເສຍຊີວິດຢ່າງໜ້ອຍ 1 ຄົນ.

      ປະມານ 75,000 ຄອບຄົວຍັງປະສົບບັນຫາບໍ່ມີກະແສໄຟຟ້າໃຊ້. ໃນເວລາດຽວກັນ, ທ່ານ ອໍກາ ປູເອັນເຕ ລັດຖະມົນຕີກະຊວງຄົມມະນາຄົມສະເປນ ເຕືອນທຸກຝ່າຍວ່າ: ອາດຕ້ອງໃຊ້ເວລາເຖິງ 3 ອາທິດ ທີ່ຈະກັບມາເປີດນໍາໃຊ້ເສັ້ນທາງລົດໄຟຄວາມໄວສູງທີ່ເຊື່ອມລະຫວ່າງນະຄອນຫລວງມາດຣິດກັບແຄວ້ນບາເລນເຊຍ.

      ສະຖານະການທີ່ເກີດຂຶ້ນຖືເປັນອຸທົກກະໄພຄັ້ງຮ້າຍແຮງທີ່ສຸດຂອງສະເປນ ນັບແຕ່ນໍ້າຖ້ວມຄັ້ງໃຫຍ່ ເຊິ່ງສົ່ງຜົນເຮັດໃຫ້ມີຜູ້ເສຍຊີວິດຢ່າງໜ້ອຍ 150 ຄົນ ໃນປີ 1973 ແລະ ເພີ່ມຄວາມກັງວົນໃຫ້ທຸກຝ່າຍກ່ຽວກັບຄວາມຮຸນແຮງທີ່ເປັນຜົນມາຈາກການປ່ຽນແປງຂອງສະພາບອາກາດໂລກ ໂດຍຝົນທີ່ຕົກຢູ່ສະເປນອາທິດນີ້ມີປະລິມານຫລາຍກວ່າໄລຍະເວລາກ່ອນໂລກຈະຜະເຊີນສະພາບໂລກຮ້ອນປະມານ 12%.