ຕັ້ງເສົາມຸງຄຸນປະຕູໂຂງເຂົ້ານະຄອນຫລວງພະບາງ ມູນຄ່າ 7.2 ຕື້ກວ່າກີບ
ວັນທີ 30 ຕຸລາ 2024 ທີ່ນະຄອນຫລວງພະບາງ ໄດ້ຈັດພິທີຕັ້ງ ເສົາມຸງຄຸນ ໂຄງການກໍ່ສ້າງ ແລະ ຕິດຕັ້ງປະຕູໂຂງ ເຂົ້ານະຄອນຫລວງພະບາງ, ທ່ານ ພຸດທະສອນ ມະນູພັດ ຮອງຫົວໜ້າຫ້ອງການໂຍທາທິການ ແລະຂົນສົ່ງ ນະຄອນ ຫລວງພະບາງ ລາຍງານວ່າ: ໂຄງການກໍ່ສ້າງປະຕູໂຂງເຂົ້ານະຄອນຫລວງພະບາງ ເຂດບ້ານເມືອງງານະຄອນຫລວງພະບາງ ແມ່ນໄດ້ເຫັນດີຮັບຮອງຈາກອຳນາດການປົກຄອງນະຄອນ ແລະ ພາກສ່ວນກ່ຽວຂ້ອງ ໂດຍກຳນົດຕິດຕັ້ງຢູ່ 3 ຈຸດຄື: ຈຸດທີ່ 1 ຢູ່ໜ້າໂຮງງານປະສານເຫລົ່າ ໜ້າສວນລ້ານຊ້າງ ຫາ ສະໜາມບິນ, ຈຸດທີ 2 ຕັ້ງຢູ່ໃກ້ສາມແຍກສົ້ນຂົວນໍ້າຄານໃໝ່, ຈຸດທີ 3 ຕັ້ງຢູ່ໜ້າທາງເຂົ້າສວນໝາກກ້ຽງບ້ານຫລັກ 10.
ຮູບແບບປະຕູໂຂງແມ່ນ ສາມາດຮື້ຖອນ ແລະ ປະກອບຕິດຕັ້ງຄືນໃໝ່ໄດ້, ພ້ອມທັງປະດັບລວດລາຍໃຫ້ມີຄວາມສວຍງາມ ແລະ ໃຫ້ສອດຄ່ອງກັບຊົງສະຖາປັດຂອງຫລວງພະບາງ, ມູນຄ່າໃນການກໍ່ສ້າງຫຼາຍກວ່າ 7,213 ຕື້ກີບ (7,213,164,000 ), ເລີ່ມລົງມືກໍ່ສ້າງໃນເດືອນພະຈິກປີ 2024, ກຳນົດເວລາໃນການກໍ່ສ້າງໃຊ້ເວລາ 6 ເດືອນ ແລະ ຈະໃຫ້ສຳເລັດກ່ອນບຸນປີໃໝ່ລາວ 2568.
