ຈູດທຳລາຍຊິ້ນສ່ວນສັດປ່າ ຫວງຫ້າມບັນຊີ 1 ແລະ 2 ລວມທັງໝົດ 125 ກິໂລ

ວັນທີ 1 ພະຈິກ 2024 ພະແນກກະສິກຳແລະປ່າໄມ້ ແຂວງຫົວພັນ ໄດ້ຈູດທຳລາຍຊິ້ນສ່ວນສັດປ່າຫວງຫ້າມບັນຊີ 1 ແລະ 2 ທີ່ຍືດໄດ້ຈາກແມ່ຄ້າຜູ້ທີ່ລະເມີດ ຄ້າ-ຂາຍ ໂດຍບໍ່ໄດ້ຮັບອະນຸຍາດ, ໂດຍມີ ທ່ານ ນາງ ສຸລິລັກ ຄຳວົງສາ ຮອງຫົວໜ້າພະແນກກະສິກຳ ແລະ ປ່າໄມ້ ແຂວງຫົວພັນ ແລະ ພາກສ່ວນກ່ຽວຂ້ອງ ເຂົ້າຮ່ວມ.

ທ່ານ ບຸນປອນ ພົມວົງໄຊ ຫົວໜ້າ ກອງກວດກາປ່າໄມ້ແຂວງ ໄດ້ລາຍວ່າ: ຊິ້ນສ່ວນສັດປ່າທີ່ກວດພົບ ແລະ ຍຶດໄດ້ ແລ້ວ ນຳມາທຳລາຍຄັ້ງນີ້ມີ: ໂຕເໝືອຍ, ເຕົ່າ, ບ່າງລົ້ວ, ເຫງັນອົ້ມ, ຈອນພອນຄໍເຫລືອງ, ນົກຖົວດຳ, ກະຮອກ, ຊິ້ນສ່ວນຟານ, ໄກ່ປ່າ ແລະ ນົກຂວາ ລວມທັງໝົດ 125 ກິໂລ. ສັດຈຳນວນນີ້ລ້ວນແລ້ວແຕ່ເປັນສັດປ່າປະເພດຫວງຫ້າມ ໃນບັນຊີ 1 ແລະ 2, ສ່ວນຜູ້ທີ່ລະເມີດໄດ້ນຳໄປສຶກສາອົບຮົມ ແລະ ປັບໃໝ ຕາມລະບຽບການ.

ເຈົ້າໜ້າທີ່ປ່າໄມ້ ຮຽກຮ້ອງໃຫ້ພໍ່ແມ່ປະຊາຊົນພໍ່ຄ້າຊາວຂາຍ, ບໍ່ໃຫ້ນໍາເອົາສັດປ່າທີ່ຫວງຫ້າມມາຂາຍເປັນສິນຄ້າ ແລະ ບໍ່ໃຫ້ນຳໃຊ້ອາວຸດທຸກປະເພດໄປລ່າສັດປ່າ, ຖ້າຫາກເຈົ້າໜ້າທີ່ກວດພົບເຫັນຈະໄດ້ດຳເນີນຄະດີ ແລະ ປັບໃໝຕາມລະບຽບການ ແລະ ຮຽກຮ້ອງໃຫ້ທຸກພາກສ່ວນ ຮ່ວມມືກັນ ອະນຸລັກຮັກສາ ສັດນໍ້າ – ສັດປ່າ ໃຫ້ຄົງຄວາມອຸດົມສົມບຸນຂອງທຳມະຊາດໄວ້ໃຫ້ມີຄວາມຍືນຍົງຕະຫລອດໄປ.