ຫາລືພັດທະນາຕ່ອງໂສ້ອຸດສາຫະກຳເກືອໂປຕາສ
ກອງປະຊຸມພັດທະນາຕ່ອງໂສ້ອຸດສາຫະກຳເກືອໂປຕາສ ຂອງຈີນ ສົກປີ 2024 ຈັດຂຶ້ນໃນວັນທີ 3 ພະຈິກ 2024 ໂດຍການເຂົ້າຮ່ວມຂອງ ທ່ານ ຈັນສະແຫວງ ບຸນຍົງ ຮອງລັດຖະມົນຕີກະຊວງພະລັງງານ ແລະ ບໍ່ແຮ່, ທ່ານ ເຢົາປິ່ນ ປະທານສະພາການຄ້າຊາວຈີນຕ່າງດ້າວ ປະຈໍາລາວ ແລະ ພາກສ່ວນກ່ຽວຂ້ອງເຂົ້າຮ່ວມ.
ທ່ານ ເຢົາປິ່ນ ໄດ້ໃຫ້ຮູ້ວ່າ: ຄວາມຕ້ອງການປຸ໋ຍໂປຕາສ ໃນທົ່ວໂລກແມ່ນຄ່ອຍໆເພີ່ມຂຶ້ນໃນແຕ່ລະປີ, ຄວາມຕ້ອງການປະຈໍາປີ ສະເລ່ຍ 60-70 ລ້ານໂຕນ ເນື່ອງຈາກຊັບພະຍາກອນປຸ໋ຍໂປຕາສ ທີ່ກະຈາຍຕົວໃນທົ່ວໂລກບໍ່ສົມດຸນກັນ, ໃນເຂດອາຊີປາຊີຟິກ ກາຍເປັນເຂດນໍາເຂົ້າເກືອໂປຕາສຕົ້ນຕໍ(ຜະລິດເປັນ ປຸ໋ຍໂປຕາສ). ໃນນັ້ນ, ຈີນເປັນປະເທດທີ່ນຳໃຊ້ ປຸ໋ຍໂປຕາສຫລາຍທີ່ສຸດ. ປີ 2023 ປະເທດຈີນ ໄດ້ນຳໃຊ້ປຸ່ຍໂປຕາສເປັນ 1,878.66 ລ້ານໂຕນເຂົ້າໃນວຽກງານກະສິກຳ, ໄດ້ນຳເຂົ້າໂພແທັດຊຽມຄຣໍລາຍ (potassium chloride) 1,157 ລ້ານໂຕນ.
ປະເທດລາວ ເປັນປະເທດທີ່ອຸດົມສົມບູນໄປດ້ວຍຊັບພະຍາກອນທຳມະຊາດເກືອໂປຕາສ ໂດຍການຄາດຄະເນໃນເບື້ອງຕົ້ນ ມີປະລິມານໂພແທັດຊຽມຄຣໍລາຍ 133,62 ຕື້ໂຕນ. ການເປີດເສັ້ນທາງລົດໄຟລາວ-ຈີນ ໄດ້ສ້າງທ່າແຮງດ້ານພູມສາດ ແລະ ການຕະຫລາດສະເພາະໃຫ້ແກ່ການພັດທະນາເກືອໂປຕາສ, ການພັດທະນາຢ່າງຮອບດ້ານສີຂຽວ ແລະ ເປັນມິດກັບສິ່ງແວດລ້ອມຂອງຊັບພະຍາກອນແຮ່ເກືອໂປຕາສ ບໍ່ພຽງແຕ່ສາມາດຕອບສະໜອງຄວາມຕ້ອງການ ຂອງຕະຫລາດ ປຸ໋ຍໂປຕາສ ໃຫ້ການຂະຫຍາຍຕົວຂຶ້ນເທົ່ານັ້ນ, ແຕ່ຍັງຈະສົ່ງເສີມການພັດທະນາເສດຖະກິດຂອງລາວ ແລະ ເສີມຂະຫຍາຍອິດທິພົນສາກົນຂອງລາວອີກດ້ວຍ.
ໃນອະນາຄົດ, ລາວຈະກາຍເປັນສູນກາງຂອງຕະຫລາດປຸ໋ຍໂປຕາສໃນອາຊີ ແລະ ປຸ໋ຍໂປຕາສ ທີ່ຜະລິດຢູ່ໃນລາວ ສາມາດຂົນສົ່ງໂດຍກົງໄປຍັງບັນດາປະເທດ ໃນພາກພື້ນອາຊີປາຊີຟິກ ໂດຍຜ່ານເສັ້ນທາງລົດໄຟ. ປຸ໋ຍໂປຕາສຂອງລາວຈະກາຍເປັນອຸດສາຫະກໍາປຸ໋ຍໂປຕາສ ທີ່ໃຫຍ່ທີ່ສຸດ ອັນດັບ 3 ຂອງໂລກ ຖັດຈາກລັດເຊຍ ແລະ ການາດາ.
ທ່ານ ຈັນສະແຫວງ ບຸນຍົງ ໄດ້ກ່າວວ່າ: ສປປ ລາວ ມີຊັບພະຍາກອນແຮ່ທາດທີ່ອຸດົມສົມບູນ ໂດຍສະເພາະທ່າແຮງທາງດ້ານເກືອໂປຕາສ ທີ່ມີພາຍໃນປະເທດ ເປັນຕົ້ນ ຢູ່ນະຄອນຫລວງວຽງຈັນ, ແຂວງວຽງຈັນ, ຄຳມ່ວນ ແລະ ແຂວງສະຫວັນນະເຂດ ແຮ່ເກືອໂປຕາ ສເປັນແຮ່ທາດທີ່ສຳຄັນ ເພື່ອສະໜອງໃຫ້ແກ່ການພັດທະ ນາເປັນອຸດສາຫະກຳຕໍ່ເນື່ອງ ເປັນຕົ້ນ ແມ່ນການຜະລິດປຸ໋ຍຮັບໃຊ້ກະສິກໍາ ແລະ ເປັນສ່ວນປະກອບຂອງວັດຖຸດິບຮັບໃຊ້ໃຫ້ແກ່ອຸດສາຫະກໍາອື່ນໆ. ອີງຕາມວິໄສທັດຮອດ ປີ 2040 ແລະ ຍຸດທະສາດການພັດທະນາແຮ່ທາດ ຮອດປີ 2030 ໄດ້ກໍານົດແຜນການສ້າງໂຮງງານຜະລິດປຸ໋ຍ (NPK) ຈຳນວນ 3 ແຫ່ງ (ນະຄອນຫລວງວຽງຈັນ 1 ແຫ່ງ ແລະ ແຂວງຄໍາມ່ວນ 2 ແຫ່ງ), ໂຮງງານຜະລິດເກືອໂບຣມ ເພີ່ມຕື່ມຢ່າງໜ້ອຍ 2 ແຫ່ງ.
ລັດຖະບານໄດ້ອະນຸຍາດໃຫ້ບໍລິສັດ ດຳເນີນການຊອກຄົ້ນ-ສຳຫລວດ, ຂຸດຄົ້ນ ແລະ ປຸງແຕ່ງເກືອໂປຕາສ ທັງໝົດ 18 ບໍລິສັດ, 20 ກິດຈະການ. ໃນນັ້ນ, ບໍລິສັດທີ່ຢູ່ໃນໄລຍະຊອກຄົ້ນ-ສຳຫລວດ 5 ບໍລິສັດ, 5 ກິດຈະການ, ກໍາລັງດໍາເນີນການສຶກສາຄວາມເປັນໄປໄດ້ ທາງດ້ານເສດຖະກິດ-ເຕັກນິກ 4 ບໍລິສັດ, 4 ກິດຈະການ, ໄດ້ຮັບອະນຸຍາດເຊັນສັນຍາຂຸດຄົ້ນ ແລະ ປຸງແຕ່ງແຮ່ເກືອໂປຕາສ ມີຈຳນວນ 9 ບໍລິສັດ, 11 ກິດຈະການ; ມີເນື້ອທີ່ທັງໝົດ 162.260 ເຮັກຕາ (ກວມເອົາ 4 ແຂວງຄື: ນະຄອນຫລວງວຽງຈັນ, ແຂວງວຽງຈັນ, ແຂວງຄຳມ່ວນ ແລະ ແຂວງສະຫວັນນະເຂດ). ມາຮອດເດືອນກັນຍາ 2024 ສາມາດຜະລິດ ແລະ ຈຳໜ່າຍຜະລິດຕະພັນເກືອໂປຕາສ ຄຸນນະພາບ 95% ຈຳນວນ 12,22 ລ້ານໂຕນ, ມູນຄ່າ 2,95 ຕື້ໂດລາສະຫະລັດ.
