ຢ່າລືມນະໂຍບາຍປະຢັດ
ໂດຍ: ທ່ຽງທຳ
ສະບາຍດີ ເພື່ອນຜູ້ອ່ານທີ່ຮັກແພງ, ມາຮອດປັດຈຸບັນເບິ່ງຄືວ່າຫລາຍຄົນ, ຫລາຍອົງກອນ ແລະ ຫລາຍຄອບຄົວອາດລືມນະໂຍບາຍປະຢັດມັດທະຍັດໄປແລ້ວກໍເປັນໄດ້ ເຊິ່ງສະແດງອອກໃຫ້ເຫັນໃນການໃຊ້ຈ່າຍຕ່າງໆຢູ່ໃນສັງຄົມຂ້ອນຂ້າງຟຸມເຟືອຍເໝືອນດັ່ງຜ່ານມາ, ການຈັດງານບຸນສິນກິນທານ, ງານລ້ຽງ, ງານດອງຕ່າງໆ ຍັງມີແຜ່ຫລາຍໃນລັກສະນະຫລູຫລາ, ເກີນກາຍຈາກຊົນຊັ້ນ ແລະ ຄວາມອາດສາມາດຂອງຕົນ, ການຊຸມແຊວກິນເຫລົ້າກິນເບຍກໍມີຢູ່ຢ່າງບໍ່ຂາດສາຍ, ເຊົ້າກິນແລງກິນ ບາງຄົນຈົນກາຍເປັນອາຈີນ ເຊິ່ງຍັງບໍ່ທັນເວົ້າເຖິງຜູ້ເພິ່ນຢູ່ບ່ອນມີລາຍຮັບແດ່ກໍຍິ່ງຮ້າຍແຮງ, ແຂ່ງຂັນກັນຊື້ລົດຫລູ, ປຸກຄະລືຫາດຍັງມີແຜ່ຫລາຍ. ຜ່ານປາກົດການດັ່ງກ່າວກໍຍັງມີສ່ວນເລ່ືອງງົບປະມານຮົ່ວໄຫລ. ເອົາລະ ເວົ້າມາກໍຫລາຍເຖິງເລື່ອງປາກົດການລືມນະໂຍບາຍປະຢັດທີ່ລັດຖະບານວາງອອກ ໂດຍສະເພາະກໍແມ່ນເລື່ອງປະຢັດລາຍຈ່າຍງົບປະມານ ເພາະປັດຈຸບັນປະເທດເຮົາຍັງປະສົບບັນຫາຫຍຸ້ງຍາກໃນການເກັບລາຍຮັບ ແລະ ສ່ວນໜຶ່ງກໍແມ່ນໜີ້ສິນທີ່ຄຸມເຄືອມາໃນເມື່ອກ່ອນ ຈາກການຫລົ້ມເຫລວຕໍ່ການຄຸ້ມຄອງລາຍຮັບ-ລາຍຈ່າຍທີ່ເໝາະສົມ. ດັ່ງນັ້ນ ອີກເທື່ອໜຶ່ງກໍຂໍເຕືອນໃຫ້ພວກເຮົາທຸກຄົນເປັນເຈົ້າການປະຕິບັດນະໂຍບາຍປະຢັດໃຫ້ມີຄວາມເຂັ້ມງວດ ແລະ ມີປະສິດທິຜົນກວ່າເກົ່າ.
