ທ່ານ ທຣໍາ ຊະນະເລືອກຕັ້ງ ກຽມດໍາລົງຕໍາແໜ່ງປະທານາທິບໍດີອາເມລິກາ ຄົນທີ 47

       ທ່ານ ໂດນັລ ທຣໍາ ຈາກພັກຣີພັບລິກັນ ໄດ້ຮັບໄຊຊະນະໃນການເລືອກຕັ້ງປະທານາທິບໍດີອາເມລິກາ ເໜືອນາງ ຄາມາລາ ແຮຣິສ ຈາກພັກເດໂມແຄຣດ ໂດຍກວາດຈໍານວນຄະນະຜູ້ເລືອກຕັ້ງ (Electoral College) ເກີນ 270 ຄະແນນແລ້ວ ເຖິງວ່າການນັບຄະແນນໃນຫລາຍລັດຍັງດໍາເນີນຢູ່. ການເລືອກຕັ້ງຄັ້ງນີ້ທ່ານ ທຣໍາ ສາມາດຊະນະໃນລັດ Swing State ຫລື ລັດສະໝໍລະພູມສໍາຄັນ (Battleground State) ຄືເພນຊິວເວເນຍ, ນອດແຄໂຣໄລນາ, ຈໍເຈຍ ແລະ ວິສຄອນຊິນ. ພ້ອມສ້າງປະຫວັດສາດເປັນປະທານາທິບໍດີ 2 ສະໄໝແບບບໍ່ຕິດຕໍ່ກັນເປັນຄົນທີ 2 ຂອງອາເມລິກາ.

      ທ່ານ ທຣໍາ ອາຍຸ 78 ປີ ເກີດຢູ່ນິວຢອກຊິຕີ້ ລັດນິວຢອກ ເປັນລູກຄົນທີ 4 ຈາກລູກທັງໝົດ 5 ຄົນຂອງທ່ານ ເຟຣເດິຣິກ ນັກພັດທະນາອະສັງຫາລິມະຊັບ ແລະ ນາງ ແມຣີ ທຣໍາ ໄຮໂຊ ແລະ ນັກການກຸສົນຊາວນິວຢອກ.

      ເສັ້ນທາງຊີວິດຂອງທ່ານເຕັມໄປດ້ວຍສີສັນ ແລະ ຄວາມໂລດໂຜນ ຈາກມະຫາເສດຖີຜູ້ມີບຸກຄະລິກສະເພາະຕົວ, ອະດີດດາວດັງແຫ່ງຣຽວລິຕີ້ໂຊ ສູ່ຜູ້ນໍາທໍານຽບຂາວ.

      ພາຍຫລັງສໍາເລັດການສຶກສາ, ທ່ານ ທຣໍາ ຮັບສືບທອດບໍລິສັດຕໍ່ຈາກພໍ່ ໂດຍມີສ່ວນຊ່ວຍບໍລິຫານໂຄງການທີ່ຢູ່ອາໄສຂະໜາດໃຫຍ່ໃນນິວຢອກ ແລະ ໄດ້ອໍານາດບໍລິຫານບໍລິສັດເຕັມຕົວໃນປີ 1971 ກ່ອນຈະປ່ຽນຊື່ບໍລິສັດເປັນ The Trump Organization ເຊິ່ງພາຍໃຕ້ການບໍລິຫານຂອງທ່ານ ທຣໍາ ໄດ້ປ່ຽນທຸລະກິດຂອງຄອບຄົວຈາກໂຄງການທີ່ຢູ່ອາໄສລະດັບກາງໃນເຂດບຣູກລິນ ແລະ ຄວີນ ມາເປັນໂຄງການຫລູຫລາໃນແມນຮັດຕັນ ໂດຍຖະໜົນ Fifth Avenue ກາຍມາເປັນທີ່ຕັ້ງຂອງ Trump Tower ເຊິ່ງຕໍ່ມາເປັນເຮືອນ ແລະ ຊັບສິນທີ່ມີຊື່ສຽງທີ່ສຸດຂອງທ່ານ ທຣໍາ.

      ໃນການຫາສຽງ, ທ່ານ ທຣໍາ ຍັງຍົກນະໂຍບາຍອາເມລິກາຕ້ອງມາກ່ອນ ໂດຍຈະຂຶ້ນກໍາແພງພາສີສິນຄ້າທົ່ວໂລກ ໂດຍສະເພາະຈີນ ເພື່ອປົກປ້ອງແຮງງານ ແລະ ຟື້ນຟູຂະແໜງການຜະລິດໃນປະເທດ. ນອກຈາກນີ້ ທ່ານຍັງປະກາດຈະເນລະເທດຜູ້ອົບພະຍົບຜິດກົດໝາຍຄັ້ງໃຫຍ່ທີ່ສຸດໃນປະຫວັດສາດໃນມື້ທໍາອິດຂອງການເຮັດວຽກຢູ່ທໍານຽບຂາວ.

      ໂດຍຕໍ່ຈາກນີ້ຈະມີກອງປະຊຸມລົງຄະແນນໂຫວດຢ່າງເປັນທາງການຂອງຄະນະຜູ້ເລືອກຕັ້ງ ແລະ ທ່ານ ທຣໍາ ຈະເຂົ້າພິທີສານບານຕົນຮັບຕໍາແໜ່ງຢ່າງເປັນທາງການໃນວັນທີ 20 ມັງກອນ 2025.

      ກ່ອນໜ້ານີ້, ທ່ານ ທຣໍາ ເຄີຍດໍາລົງຕໍາແໜ່ງປະທານາທິບໍດີຄົນທີ 45 ໂດຍເອົາຊະນະນາງ ຮິວລາຣີ ຄລີນຕັນ ຈາກພັກເດໂມແຄຣດ ໃນການເລືອກຕັ້ງປີ 2016, ແຕ່ທ່ານເສຍໄຊໃຫ້ທ່ານ ໂຈ ໄບເດນ ໃນປີ 2020 ເຊິ່ງທ່ານ ທຣໍາ ກ່າວຫາພັກເດໂມແຄຣດວ່າໂກງການເລືອກຕັ້ງ ແລະ ພະຍາຍາມຈະພິກປີ້ນຜົນການເລືອກຕັ້ງໃນບາງລັດ.

       ຈາກນະໂຍບາຍອາເມລິກາຕ້ອງມາກ່ອນ ການກັບມາຂອງທ່ານ ທຣໍາ ຈຶ່ງເຮັດໃຫ້ເກີດຄວາມກັງວົນວ່າ: ສົງຄາມການຄ້າກັບຈີນອາດທະວີຄວາມຮຸນແຮງຂຶ້ນ. ນອກຈາກນີ້ ທ່ານຍັງຕໍ່ຕ້ານໂລກາພິວັດທາງເສດຖະກິດ ໂດຍບໍ່ສະໜັບສະໜູນການຮ່ວມມືລະດັບພະຫຸພາຄີ. ຂະນະທີ່ NATO ເຝົ້າຕິດຕາມນະໂຍບາຍຂອງທ່ານ ທຣໍາ ວ່າຈະສົ່ງຜົນຕໍ່ພັນທະມິດ ຫລື ບໍ່, ແຕ່ໃນອີກດ້ານໜຶ່ງ ທ່ານ ທຣໍາ ເຄີຍກ່າວໄວ້ວ່າ: ຖ້າທ່ານໄດ້ເປັນປະທານາທິບໍດີໃນປີ 2020 ອາດບໍ່ເກີດສົງຄາມຢູ່ອູແກຣນ ຫລື ຕາເວັນອອກກາງ ເຮັດໃຫ້ຫລາຍຝ່າຍຕິດຕາມວ່າທ່ານ ທຣໍາ ຈະມີບົດບາດແນວໃດໃນການຢຸດສົງຄາມຢູ່ອູແກຣນ ແລະ ຕາເວັນອອກກາງທີ່ຍືດເຍື້ອຫລາຍປີໃນຍຸກລັດຖະບານເດໂມແຄຣດ.

     ສໍາລັບນາງ ເມລາເນຍ ທຣໍາ ພັນລະຍາຂອງທ່ານ ທຣໍາ ຈະໄດ້ເປັນແມ່ຍິງໝາຍເລກໜຶ່ງອີກສະໄໝ. ຂະນະທີ່ທ່ານ ເຈ. ດີ. ແວນ ຈະກ້າວຂຶ້ນມາເປັນຮອງປະທານາທິບໍດີອາເມລິກາຄົນໃໝ່.