ແຄວ້ນປັນຈາບຢູ່ປາກິດສະຖານສັ່ງປິດໂຮງຮຽນຢູ່ເມືອງໃຫຍ່ທີ່ມີໝອກຄວັນປົກຄຸມ

     ທາງການແຄວ້ນປັນຈາບຂອງປາກິດສະຖານ ສັ່ງປິດໂຮງຮຽນຫລາຍແຫ່ງຢູ່ເມືອງໃຫຍ່ທີ່ໄດ້ຮັບຜົນກະທົບຈາກໝອກຄວັນ ແລະ ໃຫ້ດໍາເນີນການຮຽນ-ການສອນທາງອອນລາຍຈົນຮອດວັນທີ 17 ພະຈິກນີ້. ຂະນະທີ່ປະເທດຜະເຊີນມົນລະພິດທາງອາກາດລະດັບສູງເປັນປະຫວັດສາດ.

      ບັນຫາໝອກຄວັນເຮັດໃຫ້ແຄວ້ນປັນຈາບ ເຊິ່ງມີປະຊາກອນ 120 ລ້ານກວ່າຄົນ ປິດໂຮງຮຽນປະຖົມສຶກສາໃນໄລຍະກ່ອນໜ້ານີ້ ລວມທັງຄວບຄຸມການໃຊ້ລົດຕຸກໆ ແລະ ສັ່ງປິດຮ້ານບາບີຄິວບາງແຫ່ງໃນເມືອງລາຮໍ.

      ແຕ່ຫລ້າສຸດ, ທາງການມີຄໍາສັ່ງປິດໂຮງຮຽນທັງໝົດໃນເມືອງໃຫຍ່ຫລາຍແຫ່ງທີ່ປົກຄຸມໄປດ້ວຍໝອກຄວັນ ເຊິ່ງເປັນການປະສົມປະສານຂອງໝອກ ແລະ ມົນລະພິດທີ່ເກີດຈາກຄວັນໄອເສຍແອັດຊັງເກຣດຕໍ່າ, ຄວັນຈາກການຈູດພືດທາງກະສິກໍາຕາມລະດູການ ແລະ ອາກາດເຢັນໃນລະດູໜາວ.

     “ເມື່ອພິຈາລະນາຈາກທິດທາງລົມທີ່ຄາດໄວ້ ແລະ ດັດຊະນີຄຸນນະພາບອາກາດ (AQI) ພວກເຮົາຈຶ່ງຕັດສິນໃຈປິດໂຮງຮຽນມັດທະຍົມສຶກສາຕອນປາຍທຸກແຫ່ງ” ນາງ ມາຣິຢໍາ ອໍຣັງເຊບ ແຄວ້ນມົນຕີອາວຸໂສໃນແຄວ້ນປັນຈາບ ກ່າວໃນການຖະແຫລງຂ່າວ.

      ການຕັດສິນໃຈປິດໂຮງຮຽນດັ່ງກ່າວ ຈະສົ່ງຜົນກະທົບຕໍ່ເດັກຫລາຍລ້ານຄົນໃນເມືອງຂະໜາດໃຫຍ່ທີ່ສຸດບາງແຫ່ງຂອງປາກິດສະຖານ ລວມທັງເມືອງລາຮໍ ເຊິ່ງເປັນເມືອງເອກຂອງແຄວ້ນປັນຈາບ.

      ນອກຈາກນີ້, ທ່ານ ອໍຣັງເຊບ ຍັງກ່າວວ່າ: AQI ຂອງແຄວ້ນປັນຈາບໃນປັດຈຸບັນຢູ່ໃນລະດັບອັນຕະລາຍ ແລະ ຮຽກຮ້ອງປະຊາຊົນບໍ່ໃຫ້ອອກຈາກເຮືອນ. ພ້ອມກ່າວວ່າ: ການໃສ່ຜ້າປິດປາກຖືເປັນຂໍ້ບັງຄັບໃນເມືອງທີ່ໄດ້ຮັບຜົນກະທົບ ແລະ ປະກາດໃຫ້ພະນັກງານເຄິ່ງໜຶ່ງໃນສໍານັກງານຂອງລັດ ແລະ ເອກະຊົນເຮັດວຽກທາງໄກແທນ.