ປະຊາຊົນພາກັນດື່ມນໍ້າສັກສິດໄຫລຈາກຮູບປັ້ນ ກ່ອນພົບຄວາມຈິງທີ່ເຮັດໃຫ້ຕົກໃຈ
ຜູ້ສັດທາວິຫານແຫ່ງໜຶ່ງໃນອິນເດຍ ຫລັ່ງໄຫລກັນມາເພື່ອໂຕ່ງເອົານໍ້າສັກສິດທີ່ໄຫລຈາກຮູບປັ້ນມາດື່ມ, ຕໍ່ມາພົບຄວາມຈິງວ່າເປັນນໍ້າຢອດມາຈາກຄອມເພຣເຊີເຄື່ອງປັບອາກາດ ທີ່ຕິດຕັ້ງໄວ້ທາງນອກວິຫານ.
ໃນຕົ້ນອາທິດນີ້, ສໍານັກຂ່າວທ້ອງຖິ່ນໃນອິນເດຍ ສະເໜີຂ່າວຂອງກຸ່ມຜູ້ສັດທາປະຈໍາວິຫານແຫ່ງໜຶ່ງໃນເມືອງວົນທາວັນ ລັດອຸດຕໍປະເທດ ຂອງອິນເດຍ ພາກັນມາເຂົ້າຄິວເພື່ອຖ້າດື່ມນໍ້າສັກສິດທີ່ໄຫລອອກມາຈາກຮູບປັ້ນຫົວຊ້າງຂ້າງກໍາແພງ ໂດຍເຊື່ອວ່າເປັນນໍ້າທີ່ໄຫລມາຈາກພະທາດຂອງພະກິດສະນະ ເທບພະເຈົ້າຂອງຊາວອິນດູ.
ວິດີໂອທີ່ມີຜູ້ບັນທຶກໄວ້ ສະແດງໃຫ້ເຫັນພາບຂອງປະຊາຊົນຜູ້ສັດທາຫລາຍສິບຄົນ ເດີນທາງມາວິຫານສີບັງເກພິຫາຣີ ເມືອງວົນທາວັນ ເພື່ອເຂົ້າຄິວຖ້າຢູ່ບໍລິເວນກໍາແພງ ເຊິ່ງມີຮູບປັ້ນຊ້າງຂະໜາດນ້ອຍຕິດຕັ້ງຢູ່ ເພື່ອໂຕ່ງເອົານໍ້າທີ່ໄຫລອອກມາຈາກຮູບປັ້ນດັ່ງກ່າວແລ້ວດື່ມລົງໄປ.
ກຸ່ມຄົນທີ່ມາຖ້າຄິວເຫລົ່ານີ້ ເຊື່ອວ່ານໍ້າທີ່ໄຫລອອກມາຈາກຮູບປັ້ນຊ້າງເປັນນໍ້າອໍາມະລິດຈາກການອາບພະບາດ ຖືວ່າເປັນນໍ້າສັກສິດທີ່ໄຫລຈາກພະບາດຂອງພະກິດສະນະ.
ແຕ່ໃນຄວາມເປັນຈິງແລ້ວ ນໍ້າດັ່ງກ່າວຄືນໍ້າທີ່ລະບາຍອອກມາຈາກຄອມເພຣເຊີຂອງເຄື່ອງປັບອາກາດທີ່ຕິດຕັ້ງໃນບໍລິເວນວິຫານ ໂດຍທາງເຈົ້າໜ້າທີ່ຂອງວິຫານ ໄດ້ຮີບຮ້ອນອອກປະກາດເພື່ອຊີ້ແຈງ ແລະ ເຕືອນໃຫ້ປະຊາຊົນຢຸດດື່ມນໍ້າດັ່ງກ່າວ.
ເຖິງວ່ານໍ້າທີ່ລະບາຍອອກຈາກໜ່ວຍຄອມເພຣເຊີແອຈະບໍ່ມີອັນຕະລາຍ, ແຕ່ສ່ຽງຕໍ່ການປົນເປື້ອນສິ່ງເປິະເປື້ອນ, ແບັກທີເຣຍ, ເຊື້ອລາ ທີ່ສະສົມຢູ່ໃນເຄື່ອງປັບອາກາດ ຖ້າດື່ມນໍ້າຈາກແຫລ່ງດັ່ງກ່າວເຂົ້າໄປ ອາດເປັນອັນຕະລາຍຕໍ່ສຸຂະພາບ.
ຂ່າວນີ້ເຮັດໃຫ້ຜູ້ສັດທາຈໍານວນຫລາຍທີ່ມາຖ້າດື່ມນໍ້າສັກສິດ ເກີດຄວາມຜິດຫວັງ ແລະ ສຸດທ້າຍໄດ້ຕໍາໜິທາງວິຫານ ທີ່ບໍ່ອອກມາຊີ້ແຈ້ງເລື່ອງປະຕິຫານດັ່ງກ່າວແຕ່ທໍາອິດ.
