ອົດສະຕຣາລີ ສະເໜີແຜນ ຫ້າມເດັກອາຍຸຕໍ່າກວ່າ 16 ປີ ໃຊ້ໂຊຊຽວມີເດຍ
ທ່ານ ແອນໂທນີ ອັລບາເນເຊີ ນາຍົກລັດຖະມົນຕີ ອົດສະຕຣາລີ ເປີດເຜີຍວ່າ: ລັດຖະບານມີແຜນຈະອອກກົດໝາຍ ຫ້າມເດັກອາຍຸຕໍ່າກວ່າ 16 ປີ ໃຊ້ໂຊຊຽວມີເດຍ.
ທ່ານ ແອນໂທນີ ອັລບາເນເຊີ ກ່າວວ່າ: ກົດໝາຍຫ້າມເດັກອາຍຸຕໍ່າກວ່າ 16 ປີ ຈະຖືກນໍາສະເໜີຕໍ່ລັດຖະສະພາໃນປີ2024ນີ້ ແລະ ຈະມີຜົນບັງຄັບໃຊ້ໃນອີກ 12 ເດືອນ ພາຍຫລັງສະມາຊິກລັດຖະສະພາລົງມະຕິຮັບຮອງ ໂດຍຈະບໍ່ມີຂໍ້ຍົກເວັ້ນສໍາລັບເຍົາວະຊົນ ເຖິງວ່າພວກເຂົາຈະໄດ້ຮັບການຍິນຍອມຈາກຜູ້ປົກຄອງກໍຕາມ. “ຄວາມຮັບຜິດຊອບຈະຕົກຢູ່ນໍາແພັດຟອມໂຊຊຽວມີເດຍ ໃນການດໍາເນີນງານ ເພື່ອປ້ອງກັນການເຂົ້າເຖິງ ແລະ ຈະບໍ່ຕົກຢູ່ນໍາຜູ້ປົກຄອງ ຫລື ເຍົາວະຊົນ”
ທ່ານນາງ ມິເຊລ ໂຣແລນ ລັດຖະມົນຕີກະຊວງການສື່ສານອົດສະຕຣາລີ ລະບຸວ່າ: ແພັດຟອມທີ່ຈະໄດ້ຮັບຜົນກະທົບໄດ້ແກ່ ອິນສຕາແກມ, ເຟສບຸກ, ຕິກຕັອກ ແລະ ເອັກ. ຂະນະທີ່ຢູທູບອາດເຂົ້າຂ່າຍຢູ່ພາຍໃຕ້ກົດໝາຍນີ້ນໍາ ເຖິງຢ່າງໃດກໍຕາມ, ບໍລິສັດເຈົ້າຂອງແພັດຟອມທັງ 4 ແຫ່ງ ບໍ່ໄດ້ຕອບກັບ ເພື່ອໃຫ້ຄວາມຄິດເຫັນກ່ຽວກັບບັນຫາດັ່ງກ່າວ.
ຫລາຍປະເທດເຊັ່ນ: ຝຣັ່ງ ແລະ ອາເມລິກາ ມີນະໂຍບາຍຄວບຄຸມການໃຊ້ໂຊຊຽວມີເດຍຂອງເດັກ ແລະ ເຍົາວະຊົນ. ຂະນະທີ່ຮ່າງກົດໝາຍຂອງອົດສະຕຣາລີເປັນໜຶ່ງໃນນະໂຍບາຍເຊິີງເຂັ້ມງວດທີ່ສຸດໃນປັດຈຸບັນ.
