ອິນເດຍຂຶ້ນຄ່າປັບໄໝຈູດຕໍຊັງຢູ່ນິວເດລີ ແກ້ໄຂບັນຫາຄຸນນະພາບອາກາດເມືອງຫລວງ

      ກະຊວງສິ່ງແວດລ້ອມ, ປ່າໄມ້ ແລະ ການປ່ຽນແປງສະພາບອາກາດຂອງອິນເດຍ ປະກາດວ່າ: ລັດຖະບານມີມະຕິໃຫ້ເພີ່ມຄ່າປັບໄໝການຈູດຕໍຊັງ ໃນນະຄອນຫລວງນິວເດລີ ແລະ ເຂດໃກ້ຄຽງເປັນສອງເທົ່າ ເພື່ອແກ້ໄຂບັນຫາຄຸນນະພາບອາກາດຕົກຕໍ່າ.

      ສໍານັກຂ່າວຊິນຮົວລາຍງານວ່າ: ກົດລະບຽບໃໝ່ລະບຸວ່າ: ຊາວກະສິກອນ ທີ່ມີດິນຖືຄອງປະມານ 5 ໄລ່ ຈະຕ້ອງຈ່າຍເງິນ 5,000 ຣູປີ, ຂະນະທີ່ຊາວກະສິກອນທີ່ມີດິນ 5-12 ໄລ່ ຈະຕ້ອງຈ່າຍເງິນ 10,000 ຣູປີ. ສ່ວນຊາວກະສິກອນທີ່ມີດິນຫຼາຍກວ່າ 12 ໄລ່ ຈະຕ້ອງຈ່າຍເງິນ 30,000 ຣູປີ ຕໍ່ການຈູດຕໍຊັງພືດ 1 ຄັ້ງ. ກ່ອນໜ້ານີ້ ຄ່າປັບໄໝຕໍ່ການຈູດຕໍຊັງຢູ່ທີ່ 2,500 ຣູປີ, 5,000 ຣູປີ ແລະ 15,000 ຣູປີ ຕາມລໍາດັບ.

       ການເຄື່ອນໄຫວດັ່ງກ່າວເກີດຂຶ້ນ ພາຍຫລັງສານສູງອິນເດຍຕໍາໜິລັດຖະບານກາງວ່າບໍ່ດໍາເນີນງານຢ່າງຈິງຈັງ ເພື່ອແກ້ໄຂຄຸນນະພາບອາກາດທີ່ຕົກຕໍ່າໃນນະຄອນຫລວງນິວເດລີ ແລະ ເຂດໃກ້ຄຽງ.

      ປັດຈຸບັນ, ນະຄອນຫລວງນິວເດລີເປັນໜຶ່ງໃນເມືອງທີ່ມີມົນລະພິດຫລາຍທີ່ສຸດໃນໂລກ ໂດຍມີສາເຫດສໍາຄັນຈາກກິດຈະກໍາດ້ານອຸດສາຫະກໍາ, ການຈະລາຈອນຂອງລົດ ແລະ ການກໍ່ສ້າງທີ່ມີຢູ່ຈໍານວນຫລາຍ. ໃນໄລຍະຜ່ານມາ ຄຸນນະພາບອາກາດຢູ່ເມືອງຫລວງຂອງອິນເດຍມັກປ່ຽນເປັນລະດັບອັນຕະລາຍເຖິງຊ່ວງລະດູໜາວ.

      ນອກຈາກນີ້, ມົນລະພິດທີ່ເພີ່ມຂຶ້ນຈາກການຈູດຕໍຊັງໃນລັດປັນຈາບ ແລະ ລັດຫໍຢານາທີ່ຢູ່ໃກ້ຄຽງ ເຮັດໃຫ້ສະຖານະການຕົກຕໍ່າລົງ ເນື່ອງຈາກສົ່ງຜົນເຮັດໃຫ້ຄວາມເຂັ້ມຂຸ້ນຂອງສານມົນລະພິດສໍາຄັນຄືຄວາມເຂັ້ມຂຸ້ນຂອງຝຸ່ນພິດຂະໜາດນ້ອຍ PM2.5 ແລະ PM10 ໃນອາກາດ ເພີ່ມສູງເກີນລະດັບປອດໄພ.