ອິດສະລາແອນຍອມຮັບ ຢູ່ເບື້ອງຫລັງ ເພຈເຈີລະເບີດຢູ່ລີບັງ

       ຜູ້ນໍາອິດສະລາແອນຍອມຮັບຄັ້ງທໍາອິດວ່າ: ເປັນຜູ້ສັ່ງການເຫດລະເບີດເພຈເຈີ ແລະ ວິທະຍຸສື່ສານຂອງກຸ່ມແຮັດໂບລາ ເມື່ອປະມານສອງເດືອນຜ່ານມາ.

    ທ່ານ ໂອເມີ ດອສທຣີ ໂຄສົກລັດຖະບານອິດສະລາແອນ ກ່າວວ່າ: ນາຍົກລັດຖະມົນຕີ ເບນຈາມິນ ເນທັນຢາຮູ ເປັນຜູ້ອະນຸມັດໃຫ້ໜ່ວຍງານທີ່ກ່ຽວຂ້ອງຂອງອິດສະລາແອນປະຕິບັດການໂຈມຕີອຸປະກອນສື່ສານຂອງກຸ່ມແຮັດໂບລາ ຖືເປັນຄັ້ງທໍາອິດຢ່າງເປັນທາງການທີ່ອິດສະລາແອນຍອມຮັບວ່າຢູ່ເບື້ອງຫລັງເຫດການດັ່ງກ່າວ.

      ເຫດການນີ້ເກີດຂຶ້ນລະຫວ່າງວັນທີ 17-18 ກັນຍາຜ່ານມາ ໂດຍມື້ທໍາອິດເປັນການລະເບີດຂອງເພຈເຈີຈໍານວນຫລາຍ ແລະ ການລະເບີດຂອງວິທະຍຸສື່ສານໃນມື້ຕໍ່ມາ ສົ່ງຜົນເຮັດໃຫ້ມີຜູ້ເສຍຊີວິດລວມກັນຢ່າງໜ້ອຍ 42 ຄົນ ແລະ ມີຜູ້ໄດ້ຮັບບາດເຈັບອີກ 3,400 ກວ່າຄົນ.

      ຫລັງຈາກນັ້ນ, ກອງທັບອິດສະລາແອນຍົກລະດັບການໂຈມຕີຢູ່ລີບັງ ສັງຫານແກນນໍາຫລາຍຄົນຂອງກຸ່ມແຮັດໂບລາ ລວມທັງທ່ານ ຮໍາຊັນ ນາສຣາລເລາະ ຜູ້ນໍາສູງສຸດຂອງກຸ່ມແຮັດໂບລາ ແລະ ທ່ານ ຮາເຊມ ຊາຟິດດີນ ລູກອ້າຍລູກນ້ອງຂອງທ່ານ ນາສຣາລເລາະ ເຊິ່ງກຸ່ມແຮັດໂບລາວາງຕົວໃຫ້ສືບທອດຕໍາແໜ່ງ.