ລາວ-ຈີນຮ່ວມມື​ຕ້ານ​ການ​ຄ້າ​ມະນຸດ

- Untitled design - ລາວ-ຈີນຮ່ວມມື​ຕ້ານ​ການ​ຄ້າ​ມະນຸດ

ພິທີ​ເປີດ​ບັ້ນ​ໂຄສະນາ​ຕ້ານ​ການ​ຄ້າມ​ະນຸດ​​ຕາມ​ຊາຍ​ແດນລາວ-ຈີນ, ໄດ້ຈັດຂຶ້ນເມື່ອບໍ່ດົນນີ້ທີ່ແຂວງຫລວງນໍ້າທາ, ຝ່າຍລາວນໍາໂດຍທ່ານພັນເອກ ​ເພັງ​ສະຫວັນ ທິບ​ພະ​ວົງ​ໄຊ ຮອງ​ຫົວໜ້າ​ກົມ​ໃຫຍ່​ຕຳຫລວດ, ຫົວໜ້າ​ກອງ​ເລຂາ​ຄະນະ​ກຳມະການ​ຕ້ານ​ການ​ຄ້າ​ມະນຸດລະດັບ​ຊາດ ​ແລະ ຝ່າຍຈີນນໍາໂດຍທ່ານ ພົນຕີ ຢິ້ງກົ້ວຫາຍ ຫົວໜ້າ​ພະ​ແນ​ກສະກັດ​ກັ້ນ ​ແລະ ຕ້ານ​ການ​ຄ້າ​ມະນຸດກົມ​ສືບສວນກະຊວງ​ສັນຕິ​ບານ, ພ້ອມດ້ວຍ​ກອງບັນຊາການ ປກສ 8 ​ແຂວງ​ພາກ​ເໜືອ​ເຂົ້າຮ່ວມນໍາດ້ວຍ.

ທ່ານພັນເອກ ​ເພັງ​ສະຫວັນ ທິບ​ພະ​ວົງ​ໄຊ ໃຫ້ຮູ້ວ່າ: ລາວ​ເປັນ​ປະ​ເທດ​ຕົ້ນທາງ​ຂອງ​ຂະ​ບວນການ​ຄ້າ​ມະນຸດ​ຂ້າມ​ຊາດ ​ແລະ ​ເປັນ​​ທາງ​ຜ່ານ​ຂອງ​ບັນດາ​ປະ​ເທດ​ອ້ອມ​ຂ້າງ, ສະ​ເພາະສະພາບການ​ຄ້າ​ມະນຸດ​ລະຫວ່າງ ສປປ ລາວ ​ແລະ ສປຈີນ ​ສ່ວນໃຫຍ່ແມ່ນ​ບັນຫາ​ການ​ລັກລອບ​ເຂົ້າ-ອອກ​ເມືອງ​ຜິດ​ກົດໝາຍ, ການ​ເຄື່ອນ​ຍ້າຍ​ຖິ່ນ​ຖານ ​ແລະ ການ​ເຄື່ອນ​ຍ້າຍ​ແຮງ​ງານ​ຂອງ​ຄົນ​ຈີນ​ຜ່ານ ລາວ ​ເພື່ອ​ໄປ​ປະ​ເທດ​ທີ​ສາມ ​ແລະ ການ​ລັກລອບ​ແຕ່ງງານ​ຂອງ​ປະຊາຊົນ​ລຽບ​ຕາມ​ຊາຍ​ແດນ ແລະ ພົ້ນເດັ່ນ​ແມ່ນ​ຂະ​ບວນການ​ແຕ່ງງານ​ຂອງ​ຊາຍ​ໜຸ່ມ​ຈີນ ​ກັບຍິງສາວ​ລາວ​ດ້ວຍ​ຮູບ​ການ​ໝັ້ນໝາຍ​ໂດຍ​ຜ່ານ​ຄົນ​ລາວ ​ແລະ ຄົນ​ຈີນ​ຈຳນວນ​ໜຶ່ງ​ທີ່​ມາ​ເຮັດ​ທຸລະ​ກິດ​ຢູ່​ລາວ​ເປັນ​ນາຍ​ໜ້າ​ຕິດ​ຕໍ່​ພົວພັນ​ເອົາ​ຍິງ​ສາວ. ຈາກ​ນັ້ນກໍມີ​ການ​ນັດ​ພົບ​ກັນ, ຖ້າ​ພໍ​ໃຈ​ກໍ​ແລ່ນ​ໜັງສືຜ່ານ​ແດນ​ນັດ​ວັນ​ຈ່າຍ​ເງິນ​ຄ່າ​ດອງ ​ແລະ ​ເດີນທາງ​ອອກປະ​ເທດ​ລາວ, ພາຍຫລັງໄດ້​ຍິງ​ສາວ​ໄປ​ຮອດຈີນແລ້ວ​ກໍ​ຖືກ​ກັກ​ຂັງ, ບັງຄັບ​ໃຊ້​ແຮງ​ງານ​ຂາຍ​ຕໍ່​ໃຫ້​ຜູ້​ອື່ນ, ມີຫລາຍ​ກໍລະນີ​ຖືກ​ນາບ​ຂູ່, ທຳຮ້າຍ​ຮ່າງກາຍ ​ແລະ ຍຶດໜັງສືຜ່ານ​ແດນ, ຄືໃນ​ປີ 2017 ມີ​ການ​ກະທຳ​ຜິດ​ສະຖານ​ຄ້າ​ມະນຸດ​​ຈຳນວນ 35 ​ກໍລະນີ​ໃນທົ່ວປະເທດ, ໃນ​ນີ້​ແຕ່ງດອງ​ແອບ​ແຝງ 29 ກໍລະນີ, ມີ​ຜູ້​ຖືກ​ເຄາະ​ຮ້າຍ​ໄດ້​ຮັບ​ການ​ຊ່ວຍ​ເຫລືອທັງໝົດ 51 ຄົນ(ຍິງ 28 ຄົນ) ອາຍຸ​ຕໍ່າ​ກວ່າ 18 ປີມີ 19 ຄົນ, ​ແຕ່ງດອງ​ບໍ່​ຖືກຕ້ອງຕາມ​ລະບຽບກົດໝາຍ​ມີ 52 ຄູ່ ແລະ ພາຍຫລັງ​​ຢູ່ກິນ​ນຳ​ກັນ​ທີ່ ສປຈີນ ສ່ວນຫລາຍ ພົບວ່າມັກ​ມີ​ບັນຫາບໍ່ດີຕາມມາ​ເຊັ່ນ: ຜິດ​ຖຽງ​ກັນ, ຍຶດໜັງສື​ເດີນທາງ, ທຸບ​ຕີ, ກັກ​ຂັງ ​ແລະ ຖືກ​ຂາຍ​ໃຫ້​ບຸກຄົນ​ອື່ນ​ຕໍ່.

ທ່ານພົນຕີ ຢິ້ງກົ້ວຫາຍ ກ່າວ​ວ່າ: ປັດຈຸບັນ, ​ປະຊາຊົນ​ສອງ​ປະ​ເທດລາວ-ຈີນ​ ໄປມາ​ຫາ​ສູ່​ກັນ​ຫລາຍ​ຂຶ້ນ, ຂະນະດຽວກັນມີກຸ່ມ​ຄົນ​ບໍ່​ດີ​ຈຳນວນ​ໜຶ່ງ​ໄດ້​ສ້າງ​ເງື່ອນ​ໄຂ​​ເອົາ​ການ​ຄ້າ​ມະນຸດ​ຫາ​ຜົນ​ປະ​ໂຫຍ​ດ​ໂດຍ​ຕົວະ​ຍົວະ​ຫລອກ​ລວງ​ເອົາ​ຍິງ​ສາວ​ຈາກ​ປະ​ເທດ​ໃກ້ຄຽງ​ເຂົ້າ​ໄປຈີນ, ​ໂດຍອ້າງ​ວ່າ​ຊ່ວຍ​ຊອກ​ວຽກ​ເຮັດ​ງານ​ທຳ ທັງ​ແນະນຳ​ສ້າງ​ຄອບຄົວ ​ຫລື ​​ໄປ​ທ່ອງ​ທ່ຽວ​ ແຕ່​ໃນ​ຄວາມ​ຈິງ​ແລ້ວ​ຜູ້ຍິງ​ເຫລົ່ານັ້ນບໍ່​ຮູ້​ສະພາບ​ຕົວ​ຈິງ​ຂອງ​ຜູ້ຊາຍ ​ແລະ ຄອບຄົວ ທັງ​ບໍ່​ຮູ້​ພາສາ ​ແລະ ສະພາບ​ແວດ​ລ້ອມ​ ແລະ ພາຍຫລັງ​ຖືກ​ຂາຍ​ແລ້ວ​ແມ່ນ​ຖືກ​ທຳຮ້າຍ​ຮ່າງກາຍ ​ແລະ ຈິດ​​ໃຈ ແລະ ​ການ​ເປີດ​ບັ້ນ​ໂຄສະນາ​ຄັ້ງນີ້, ແນໃສ່​ປຸກລະດົມໃຫ້ທົ່ວສັງຄົມຂອງສອງປະເທດລາວ-ຈີນ ເພີ່ມທະວີຄວາມເປັນເຈົ້າການປະກອບສ່ວນເຂົ້າ​ໃນ​ວຽກ​ງານ​ສະກັດ​ກັ້ນ ​ແລະ ຕ້າ​ນການ​ຄ້າ​ມະນຸດໃຫ້ສູງກວ່າເກົ່າ.

- Wave100S AD to Website 2020 0 - ລາວ-ຈີນຮ່ວມມື​ຕ້ານ​ການ​ຄ້າ​ມະນຸດ

 

- WhatsApp Image 2020 05 27 at 5 - ລາວ-ຈີນຮ່ວມມື​ຕ້ານ​ການ​ຄ້າ​ມະນຸດ
- WhatsApp Image 2020 05 27 at 5 - ລາວ-ຈີນຮ່ວມມື​ຕ້ານ​ການ​ຄ້າ​ມະນຸດ
error: Alert: ເນື້ອຫາຂ່າວມີລິຂະສິດ !!