ພາຍຸໄຕ້ຝຸ່ນໂທຣາຈີຖະຫລົ່ມຟີລິບປິນ ເຮັດໃຫ້ນໍ້າຖ້ວມໜັກ ຖືເປັນພາຍຸຫົວທີ 4 ໃນຮອບ 1 ເດືອນ
ພາຍຸໄຕ້ຝຸ່ນໂທຣາຈີພັດຖະຫລົ່ມຟີລິບປິນຢ່າງໜັກ ເຮັດໃຫ້ຫລາຍພື້ນທີ່ຕົ້ນໄມ້ຫັກ, ລະດັບນໍ້າສູງຂຶ້ນຢ່າງວ່ອງໄວ ແລະ ເສັ້ນທາງສັນຈອນຫລາຍສາຍຖືກຕັດຂາດ ຖືເປັນພາຍຸຫົວທີ 4 ຕໍ່ຈາກພາຍຸເຂດຮ້ອນຈ່າມີ, ພາຍຸໄຕ້ຝຸ່ນກອງເຣຍ ແລະ ພາຍຸໄຕ້ຝຸ່ນຫຍິນ ເຊິ່ງເຄື່ອນທີ່ຖະຫລົ່ມຟີລິບປິນໃນຮອບ 1 ເດືອນ.
ທາງການຟີລິບປິນອອກຄໍາສັ່ງອົບພະຍົບປະຊາຊົນໃນ 2,500 ບ້ານທີ່ຄາດວ່າຈະໄດ້ຮັບຜົນກະທົບຈາກພາຍຸຫົວດັ່ງກ່າວແລ້ວ. ເບື້ອງຕົ້ນຍັງບໍ່ມີລາຍງານຜູ້ເສຍຊີວິດຈາກພາຍຸໄຕ້ຝຸ່ນໂທຣາຈີຢ່າງເປັນທາງການ. ຂະນະທີ່ຈໍານວນຜູ້ເສຍຊີວິດສະສົມຈາກພາຍຸໃຫຍ່ທັງ 3 ຫົວກ່ອນໜ້າສູງກວ່າ 160 ຄົນ ແລະ ມີຜູ້ໄດ້ຮັບຜົນກະທົບ 9 ລ້ານກວ່າຄົນທົ່ວຟີລິບປິນ ເຊິ່ງສ່ວນຫລາຍໄດ້ຮັບຜົນກະທົບຮຸນແຮງໃນຊ່ວງພາຍຸເຂດຮ້ອນຈ່າມີພັດຖະຫລົ່ມໃນເດືອນຕຸລາຜ່ານມາ.
ພາຍຸໄຕ້ຝຸ່ນໂທຣາຈີກໍາລັງເຄື່ອນທີ່ເຂົ້າສູ່ຮົງກົງ ແລະ ຈີນ ໂດຍນັກອຸຕຸນິຍົມວິທະຍາຄາດວ່າ: ພາຍຸໄຕ້ຝຸ່ນຫົວນີ້ຈະຄ່ອຍໆອ່ອນກໍາລັງລົງເວລາເຄື່ອນທີ່ຜ່ານທະເລຈີນໃຕ້.
ອ້າງອີງ:
- https://www.accuweather.com/en/hurricane/philippines-recovers-from-typhoon-toraji-as-2-more-approach/1712714
- https://apnews.com/article/philippines-typhoon-toraji-389519dbf4a4aa68223617181f96fda9
- https://www.scmp.com/news/hong-kong/health-environment/article/3286016/hong-kong-issue-t1-between-8pm-and-midnight-tropical-cyclone-toraji-looms
