ໂຄງການເຂື່ອນໄຟຟ້ານໍ້າງື່ມ 3 ຈະສຳເລັດ ແລະ ຜະລິດກະແສໄຟຟ້າ ໃນປີ 2027
ທ່ານ ໂພຄຳ ສິດທິດາລາ ຫົວໜ້າໂຄງການກໍ່ສ້າງເຂື່ອນໄຟຟ້ານໍ້າງື່ມ 3 ໄດ້ລາຍງານໃຫ້ຮູ້ວ່າ: ໂຄງການເຂື່ອນໄຟຟ້ານໍ້າງື່ມ 3 ຈະກໍ່ສ້າງສຳເລັດ ແລະ ເປີດການຜະລິດກະແສໄຟຟ້າໃນຕົ້ນປີ 2027, ໂຄງການນີ້ ຕັ້ງຢູ່ 3 ເມືອງ ຂອງ 2 ແຂວງຄື: ເມືອງພູກູດ ແຂວງຊຽງຂວາງ ແລະ ເມືອງອະນຸວົງ ກັບ ເມືອງລ້ອງແຈ້ງ ແຂວງໄຊສົມບູນ, ໂຄງການດັ່ງກ່າວໄດ້ເລີ່ມລົງມືກໍ່ສ້າງມາແຕ່ປີ 2013 ຕາມແຜນເບື້ອງຕົ້ນຈະໃຫ້ສຳເລັດ ແລະ ເປີດການຜະລິດກະແສໄຟຟ້າໃນປີ 2021, ແຕ່ເນື່ອງຈາກວ່າ ໂຄງການມີຄວາມຫຍຸ້ງຍາກທາງດ້ານການເງິນ ເຮັດໃຫ້ການຈັດຕັ້ງປະຕິບັດຖືກໂຈະໄວ້ຊົ່ວຄາວ ແລະ ຈະສືບຕໍ່ກໍ່ສ້າງໃນທ້າຍປີ 2024.
ທ່ານໃຫ້ຮູ້ຕື່ມວ່າ: ຖ້າໂຄງການກໍ່ສ້າງດັ່ງກ່າວສຳເລັດ ຈະເປັນເຂື່ອນຫີນຖົມດິນສູງທີ່ສຸດໃນອາຊຽນ ສູງ 210 ແມັດ, ມີກຳລັງຕິດຕັ້ງທັງໝົດ 480 ເມັກກາວັດ, ສາມາດຜະລິດພະລັງງານໄຟຟ້າໄດ້ 2,345 GWh/ປີ ແລະ ຈະສ້າງຄວາມສະຖຽນລະພາບດ້ານພະລັງງານພາຍໃນປະເທດໄດ້ ເນື່ອງຈາກວ່າໂຄງການມີເປົ້າໝາຍຈະສະໜອງກະແສໄຟຟ້າເພື່ອການຊົມໃຊ້ຢູ່ພາຍໃນປະເທດ ປັດຈຸບັນ ການກໍ່ສ້າງໂຄງການມີຄວາມຄືບໜ້າແລ້ວຫຼາຍກວ່າ 80 %.
ທີ່ມາ: ປະຊາຊົນ
