ເທດສະການດົນຕີ 919 ຈະກາຍເປັນກິດຈະກຳໜຶ່ງເພື່ອດຶງດູດນັກທ່ອງທ່ຽວ
ເທດສະການດົນຕີ 919 (919 Music Festival) ຈະມີຂຶ້ນໃນວັນທີ 18 ພະຈິກນີ້, ທີ່ເດີ່ນກິລາເຈົ້າອານຸວົງ ນະຄອນຫລວງວຽງຈັນ ເພື່ອສ້າງຄວາມເບີກບານມ່ວນຊື່ນໃຫ້ມວນຊົນຊາວນະຄອນຫລວງວຽງຈັນ ແລະ ດຶງດູດນັກທ່ອງທ່ຽວເຂົ້າມາທ່ຽວລາວຫລາຍຂຶ້ນ, ເນື່ອງຈາກງານດັ່ງກ່າວໄດ້ເຊື້ອເຊີນເອົາສິລະປິນນັກຮ້ອງທີ່ມີຊື່ສຽງຈາກລາວ, ໄທ, ສ.ເກົາຫລີ ເຂົ້າຮ່ວມເປັນຈຳນວນຫລາຍ.
ທ່ານ ອານຸສັກ ສີວິໄລ ອຳນວຍການບໍລິສັດ ເມດອິດຣ້ຽວ ແລະ ທ່ານ ສິລິວອນ ພາລະວານ ອຳນວຍການຝ່າຍການຕະຫລາດກຸ່ມບໍລິສັດ Victory ໃນນາມຜູ້ຈັດງານເທດສະການດົນຕີ 919 ໄດ້ຖະແຫລງຕໍ່ສື່ມວນຊົນໃນວັນທີ 15 ພະຈິກນີ້ວ່າ: ເທດສະການດົນຕີຄັ້ງນີ້ ຈະເປັນການສ້າງຂະບວນການຕ້ອນຮັບປີທ່ອງທ່ຽວລາວ 2018, ຊຶ່ງຈະມີນັກທ່ອງທ່ຽວເດີນທາງເຂົ້າມາຮ່ວມງານດັ່ງກ່າວເປັນຈຳນວນບໍ່ໜ້ອຍ ແລະ ໄດ້ຈັດສອງກິດຈະກຳຫລັກໆຄື: ກິລາ ແລະ ດົນຕີ ເພື່ອດຶງດູດນັກທ່ອງທ່ຽວຈາກຕ່າງປະເທດເຂົ້າມາທ່ຽວລາວໃຫ້ຫລາຍຂຶ້ນ.
ເທດສະການດົນຕີ 919 ຈະໄດ້ເປີດຂາຍປີ້ເຂົ້າຊົມແຕ່ເດືອນຜ່ານມາແລ້ວແລະ ມາຮອດປັດຈຸບັນ ສາມາດຂາຍປີ້ໄດ້ປະມານ 9 ພັນກວ່າບ່ອນນັ່ງ ໃນຈຳນວນປີ້ທັງໝົດ 30 ພັນປີ້ ດ້ວຍລາຄາ 130.000 ກີບ ແລະ 300.000 ກີບຕໍ່ໜຶ່ງບ່ອນນັ່ງ, ໂດຍຈະເລີ່ມເປີດປະຕູປະມານ 12:00 ໂມງໄປຈົນຮອດທ່ຽງຄືນ, ສຳລັບນັກຮ້ອງລາວມີ: ສັກ ວົງ Cell, LOG, ນ້ຳຝົນ Singing Contest, Black Eye; ສ່ວນໄທ ກໍຈະມີ: Potato, Labanoon, Big Ass, Cocktail ແລະ ສ.ເກົາຫລີ ກໍຈະມີສິລະປິນໂດ່ງດັງແຖວໜ້າ ແລະ ດີເຈຊື່ສຽງຂອງຕ່າງປະເທດເຂົ້າຮ່ວມເປັນຈຳນວນຫລາຍ.
