ມົນລະພິດຢູ່ປາກິດສະຖານບໍ່ດີຂຶ້ນ ສັ່ງປິດໂຮງຮຽນຢູ່ເມືອງລາຮໍຕໍ່ອີກ 1 ອາທິດ
ແຂວງປັນຈາບຂອງປາກິດສະຖານ ປະກາດຂະຫຍາຍເວລາປິດໂຮງຮຽນຢູ່ເມືອງລາຮໍ ເຊິ່ງເປັນເມືອງເອກ ອອກໄປອີກ 1 ອາທິດ ພາຍຫລັງມີປະຊາຊົນຫລາຍພັນຄົນເຂົ້າຮັບການປິ່ນປົວຢູ່ໂຮງໝໍເນື່ອງຈາກມົນລະພິດທາງອາກາດ.
ແຂວງປັນຈາບປະກາດປິດໂຮງຮຽນທັງໝົດຢູ່ເມືອງລາຮໍຕໍ່ໄປອີກຢ່າງໜ້ອຍ 1 ອາທິດ ພາຍຫລັງຄໍາສັ່ງເກົ່າມີຜົນຮອດວັນທີ 17 ພະຈິກ.
ຕາມຂໍ້ມູນຂອງໄອຄິວແອຣ໌ ຄວາມເຂັ້ມຂຸ້ນຂອງລະດັບອະນຸພາກ PM2.5 ຢູ່ເມືອງລາຮໍ ສູງກວ່າລະດັບທີ່ອົງການອະນາໄມໂລກ (WHO) ຍອມຮັບໄດ້ປະມານ 30 ເທົ່າ.
ນາງ ມາຣິຍໍາ ອໍຣັງເຊບ ເຈົ້າໜ້າທີ່ອາວຸໂສແຫ່ງແຄວ້ນປັນຈາບ ກ່າວວ່າ: ຕອນນີ້ມີຜູ້ປ່ວຍຫລາຍກວ່າ 35,000 ຄົນ ເຂົ້າຮັບການປິ່ນປົວຢູ່ໂຮງໝໍຕ່າງໆຂອງເມືອງລາຮໍ ເນື່ອງຈາກບັນຫາສຸຂະພາບທີ່ກ່ຽວຂ້ອງກັບໝອກຄວັນ ເຊິ່ງເກີດຂຶ້ນໃນໄລຍະ 1 ເດືອນຜ່ານມາ.
ສ່ວນລາຍງານໂດຍກອງທຶນເພື່ອເດັກແຫ່ງສະຫະປະຊາຊາດ (ອຸຍນີເຊັບ) ລະບຸວ່າ: ກ່ອນລະດັບມົນລະພິດທາງອາກາດຢູ່ເມືອງລາຮໍຈະທໍາລາຍສະຖິຕິນີ້ ປະມານ 12% ຂອງການເສຍຊີວິດ ເຊິ່ງເກີດຂຶ້ນຕໍ່ເດັກອາຍຸຕໍ່າກວ່າ 5 ປີຢູ່ປາກິດສະຖານ ເກີດຈາກມົນລະພິດທາງອາກາດ.
ຂະນະທີ່ໂຄງການອາຫານໂລກ (WFP) ລາຍງານວ່າ: ການຂົນສົ່ງຄືສາເຫດຫລັກຂອງມົນລະພິດທາງອາກາດຢູ່ປາກິດສະຖານ ຮອງລົງມາແມ່ນຂະແໜງອຸດສາຫະກໍາ ແລະ ກະສິກໍາ.
