ພາຍຸຊຸບເປີໄຕ້ຝຸ່ນໝ່ານຫຍີ່ພັດຂຶ້ນຝັ່ງຟີລິບປິນ ອົບພະຍົບປະຊາຊົນ 650,000 ກວ່າຄົນ
ໝ່ານຫຍີ່ ເປັນພາຍຸຫົວທີ 6 ພັດຜ່ານຟີລິບປິນ ພາຍໃນໄລຍະເວລາພຽງເດືອນດຽວ. ຂະນະທີ່ມີການອົບພະຍົບປະຊາຊົນແລ້ວ 650,000 ກວ່າຄົນ.
ກົມອຸຕຸນິຍົມວິທະຍາແຫ່ງຊາດຟີລິບປິນລາຍງານວ່າ: ຊຸບເປີໄຕ້ຝຸ່ນໝ່ານຫຍີ່ພັດຂຶ້ນຝັ່ງແຂວງຄາຕັນດົວເນສ ທາງຕາເວັນອອກຂອງປະເທດ ດ້ວຍຄວາມໄວລົມສູງສຸດ 185 ກິໂລແມັດຕໍ່ຊົ່ວໂມງ, ສ່ວນໜ່ວຍງານທີ່ກ່ຽວຂ້ອງອົບພະຍົບປະຊາຊົນລ່ວງໜ້າ 650,000 ກວ່າຄົນ ໃນພື້ນທີ່ສ່ຽງ ເນື່ອງຈາກມີການປະເມີນວ່າ: ອິດທິພົນຂອງພາຍຸຫົວນີ້ຈະມີຄວາມຮຸນແຮງຫລາຍທີ່ສຸດຄັ້ງໜຶ່ງໃນປະຫວັດສາດ.
ທັງນີ້, ໝ່ານຫຍີ່ ເປັນພາຍຸຫົວທີ 6 ທີ່ພັດຜ່ານຟີລິບປິນ ນັບແຕ່ກາງເດືອນຕຸລາຜ່ານມາ ນັບແຕ່ພາຍຸເຂດຮ້ອນຈ່າມີ, ຊຸບເປີໄຕ້ຝຸ່ນກອງເຣຍ, ໄຕ້ຝຸ່ນຫຍິນຊິ່ງ, ໄຕ້ຝຸ່ນໂທຣາຈີ ແລະ ໄຕ້ຝຸ່ນອູຊາງິ ທີ່ຫາກໍພັດຂຶ້ນຝັ່ງຟີລິບປິນ ໃນວັນທີ 14 ພະຈິກຜ່ານມາ.
ຂະນະທີ່ຂໍ້ມູນເບື້ອງຕົ້ນຂອງສະຫະປະຊາຊາດ (UN) ລະບຸວ່າ: ສະພາບອາກາດຮຸນແຮງຢ່າງຕໍ່ເນື່ອງທີ່ເກີດຂຶ້ນກັບຟີລິບປິນ ສົ່ງຜົນເຮັດໃຫ້ມີຜູ້ເສຍຊີວິດແລ້ວຢ່າງໜ້ອຍ 163 ຄົນ ແລະ UN ຢູ່ລະຫວ່າງລະດົມທຶນໃຫ້ໄດ້ 32.9 ລ້ານໂດລາສະຫະລັດ ເພື່ອຊ່ວຍເຫລືອປະຊາຊົນໃນພື້ນທີ່ປະສົບໄພ.
ນອກຈາກນີ້, ກົມອຸຕຸນິຍົມວິທະຍາຍີ່ປຸ່ນ (JMA) ລາຍງານວ່າ: ຖືເປັນຄັ້ງທໍາອິດນັບແຕ່ປີ 1951 ທີ່ມີພາຍຸຢ່າງໜ້ອຍ 4 ຫົວ ກໍ່ຕົວລຽງລໍາດັບກັນໃນມະຫາສະໝຸດປາຊີຟິກ ຍິ່ງບົ່ງຊີ້ຄວາມຮຸນແຮງຂອງສະພາບອາກາດປ່ຽນແປງ.
