ໄຂ້ເລືອດອອກລະບາດໜັກຮອບຫລາຍປີຢູ່ບັງກະລາແດັດ ຂ້າຊີວິດປະຊາຊົນເກີນ 400 ຄົນ
ບັງກະລາແດັດພວມຕໍ່ສູ້ການລະບາດຂອງໄຂ້ເລືອດອອກຄັ້ງຮ້າຍແຮງທີ່ສຸດໃນຮອບຫລາຍປີ ເຊິ່ງເຮັດໃຫ້ມີຜູ້ເສຍຊີວິດ 400 ກວ່າຄົນ ທ່າມກາງອຸນຫະພູມທີ່ສູງຂຶ້ນ ແລະ ລະດູມໍລະສຸມທີ່ຍາວນານຂຶ້ນ.
ສະຖິຕິຢ່າງເປັນທາງການໂດຍກະຊວງສາທາລະນະສຸກຂອງບັງກະລາແດັດ ລະບຸວ່າ: ໃນປີ 2024 ມີຜູ້ເສຍຊີວິດຈາກການແຊກຊ້ອນທີ່ກ່ຽວຂ້ອງກັບໄຂ້ເລືອດອອກແລ້ວ 407 ຄົນ ແລະ ມີຜູ້ຕິດເຊື້ອສະສົມຢ່າງໜ້ອຍ 78,595 ຄົນ ເຊິ່ງຕ້ອງເຂົ້າຮັບການປິ່ນປົວຢູ່ໂຮງໝໍທົ່ວປະເທດ.
ຂະນະທີ່ສະຖິຕິສະເພາະໃນເດືອນພະຈິກປາກົດວ່າ: ຮອດກາງເດືອນພະຈິກ ມີຜູ້ຕິດເຊື້ອເຂົ້າຮັບການປິ່ນປົວພະຍາດໄຂ້ເລືອດອອກຢ່າງໜ້ອຍ 4,173 ຄົນ ໂດຍ 1,835 ຄົນຢູ່ນະຄອນຫລວງທາກາ ແລະ 2,338 ຄົນ ກະຈາຍຢູ່ຕາມພາກພື້ນແຫ່ງອື່ນໃນປະເທດ.
ທັງນີ້, ປະຊາກອນທີ່ອາໄສຢູ່ໜາແໜ້ນໃນເມືອງ ຄືໜຶ່ງໃນປັດໄຈທີ່ເຮັດໃຫ້ພະຍາດແຜ່ລະບາດໄດ້ຮຸນແຮງຂຶ້ນ ຈາກປົກກະຕິຈະພົບໃນລະດູມໍລະສຸມ ນັບແຕ່ເດືອນມິຖຸນາ-ກັນຍາຂອງແຕ່ລະປີ. ຂະນະດຽວກັນ ອຸນຫະພູມທີ່ສູງຂຶ້ນ ແລະ ລະດູມໍລະສຸມທີ່ຍາວນານຂຶ້ນ ເຊິ່ງກ່ຽວຂ້ອງການປ່ຽນແປງສະພາບອາກາດ ສົ່ງຜົນເຮັດໃຫ້ຍຸງແຜ່ພັນໄດ້ຫລາຍ ແລະ ໄວຂຶ້ນ.
ໃນປີຜ່ານມາ, ບັງກະລາແດັດມີຜູ້ເສຍຊີວິດຈາກໄຂ້ເລືອດອອກສູງສຸດ 1,705 ຄົນ ແລະ ມີຜູ້ຕິດເຊື້ອສະສົມໃນປະເທດ 321,000 ກວ່າຄົນ.
