ທ່ານ ວໍລະສິດ ສິວົງດາວ ສສຊ ເຂດເລືອກຕັ້ງທີ 13 ສະເໜີໃຫ້ລັດຖະບານແກ້ໄຂບັນຫາຄູສອນບໍ່ພຽງພໍ

ກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX ວັນທີ 19 ພະຈິກ 2024, ສະມາຊິກສະພາແຫ່ງຊາດ ໄດ້ປະກອບຄຳຄິດຄຳເຫັນໃສ່ບົດລາຍງານຂອງລັດຖະບານ ໃນຫລາຍບັນຫາສຳຄັນ ເຊິ່ງບັນດາ ສສຊ ໄດ້ສະເໜີໃຫ້ລັດຖະບານ ສືບ ຕໍ່ແກ້ໄຂ ຫລາຍບັນຫາສຳຄັນ ຕິດພັນກັບການພັດທະນາເສດຖະກິດ-ສັງຄົມ ຂອງປະເທດ ເປັນຕົ້ນ ດ້ານການສຶກສາ, ການລົງທຶນຂອງບັນດາໂຄງການຕ່າງໆ, ສາທາ, ການສ້າງເສດຖະກິດເອກະລາດ, ການຄຸ້ມຄອງປົກປັກຮັກສາເສັ້ນທາງຫລວງ, ການປະຕິຮູບວິສາຫະກິດ ແລະ ອື່ນໆ.

ທ່ານ ວໍລະສິດ ສິວົງດາວ ສສຊ ເຂດເລືອກຕັ້ງທີ 13 ແຂວງສະຫວັນນະເຂດ ມີຄຳເຫັນວ່າ: ຜ່ານການລົງຊຸກຍູ້ຕິດຕາມກວດກາວຽກງານການສຶກສາ ເຫັນວ່າຂົງເຂດການສຶກສານັ້ນ ແມ່ນໜ້າເປັນຫ່ວງຫລາຍ ເປັນຕົ້ນ ແມ່ນຄຸນນະພາບການສຶກສາຍັງຕໍ່າ ໂດຍສະເພາະຢູ່ໃນເຂດຊົນນະບົດການປະ ລະການຮຽນ ແມ່ນປະລະແຕ່ຢູ່ປະຖົມ, ສໍາລັບ ເຂດໃນເມືອງ ແມ່ນປະລະຂັ້ນມັດທະຍົມ ເພາະວ່າ ຍ້ອນ ສະພາບເສດຖະກິດ ຈຶ່ງພາກັນຫລັ່ງໄຫລໄປເຮັດວຽກ. ສະນັ້ນ, ສະເໜີລັດຖະບານ ເອົາໃຈໃສ່ຮີບຮ້ອນແກ້ໄຂແທ້ໆ. ສຳລັບ ສາເຫດທີ່ພາໃຫ້ເກີດການປະລະການຮຽນ ແລະ ຄຸນນະພາບການສຶກສາຕໍ່າ ອັນທີ່ໜຶ່ງແມ່ນຍ້ອນຄູສອນບໍ່ພຽງພໍ ຕ້ອງໄດ້ສອນຫ້ອງຄວບ ຖ້າສອນຫ້ອງຄວບແລ້ວ ຖືວ່າການຮັບປະກັນທາງດ້ານຄຸນນະພາບການສຶກສານັ້ນແມ່ນບໍ່ໄດ້ ເອົາຂຶ້ນຫ້ອງກໍຂຶ້ນໄປລ້າໆ. ສໍາລັບ ແຂວງສະ ຫວັນນະເຂດ ແມ່ນມີໂຮງຮຽນ 2 ພັນກວ່າແຫ່ງ ມີອະນຸບານ, ປະຖົມ ແລະ ມັດທະຍົມ ມີຄູສອນພຽງແຕ່ 8 ພັນຄົນ, ໃນນັ້ນ ຄູອາສາສະມັກ 1,600 ຄົນ ເມື່ອເບິ່ງສັດສ່ວນຖືກໂຮງຮຽນຫລັງໜຶ່ງພຽງແຕ່ 4 ຄົນ. ອັນທີສອງ ຫລັກສູດການສຶກສາໃໝ່ນີ້ ກໍເປັນບັນຫາ ເພາະວ່າຢູ່ຊົນນະບົດ ບໍ່ມີໂຮງຮຽນອະນຸບານ ບໍ່ມີຫ້ອງ ປ ກຽມ, ບໍ່ໄດ້ຮຽນພະຍັນຊະນະ, ສະຫລະ ບໍ່ຄືກັບໂຮງຮຽນໃນເມືອງ. ອີກບັນຫາໜຶ່ງ ແມ່ນຍ້ອນບັນຫາເສດຖະກິດ ຄອບຄົວຂອງນັກຮຽນ. ສໍາລັບ ການແກ້ໄຂໃນທັດສະນະຂອງຕົນ ກ່ຽວກັບຄຸນນະພາບການສຶກສາຕໍ່າ ຕ້ອງໄດ້ເພີ່ມຄູສອນໃຫ້ພຽງພໍ ຢ່າງໜ້ອຍຫ້ອງໜຶ່ງຕ້ອງມີຄູ 1 ຄົນ ຮັບຜິດ ຊອບ. ພ້ອມນີ້, ລັດຖະບານຕ້ອງໄດ້ຊ່ວຍຊອກງົບປະມານເຂົ້າໄປ ບໍ່ມີກໍຕ້ອງໄດ້ແກ້, ພ້ອມທັງ ແກ້ໄຂຫລັກສູດການສຶກສາ ຄືນໃໝ່, ທົບທວນຄືນໃໝ່ ແລະ ອື່ນໆ.