ລາຍງານເຜີຍ ທຸ່ນລະເບີດຂ້າຊີວິດປະຊາຊົນຢູ່ມຽນມາຫລາຍທີ່ສຸດໃນໂລກ
ທຸ່ນລະເບີດ ແລະ ອາວຸດທີ່ຍັງບໍ່ລະເບີດຂ້າຊີວິດປະຊາຊົນຢູ່ມຽນມາຫລາຍກວ່າປະເທດອື່ນໃນປີຜ່ານມາ ໂດຍສົ່ງຜົນເຮັດໃຫ້ມີຜູ້ເສຍຊີວິດ ຫລື ໄດ້ຮັບບາດເຈັບຫລາຍກວ່າ 1,000 ຄົນ ພາຍໃນປະເທດ.
ກຸ່ມປຸກລະດົມຕໍ່ຕ້ານທຸ່ນລະເບີດສາກົນ ຫລື International Campaign to Ban Landmines (ICBL) ລະບຸໃນລາຍງານສະບັບຫລ້າສຸດວ່າ: ປະຊາຊົນຢູ່ມຽນມາຖືກສັງຫານໂດຍທຸ່ນລະເບີດສັງຫານບຸກຄົນ ແລະ ເສດລະເບີດຈາກສົງຄາມເຖິງ 1,003 ຄົນ ໃນປີ 2023.
ຂະນະທີ່ຕົວເລກໃນປະເທດອື່ນໆມີ 933 ຄົນ ຢູ່ຊິຣີ, 651 ຄົນ ຢູ່ອັບການິດສະຖານ ແລະ 580 ຄົນ ຢູ່ອູແກຣນ.
ICBL ລະບຸວ່າ: ການໃຊ້ທຸ່ນລະເບີດສັງຫານບຸກຄົນເພີ່ມຂຶ້ນຢ່າງຕໍ່ເນື່ອງໃນຊ່ວງມໍ່ໆນີ້ ລວມທັງບໍລິເວນໂຄງລ່າງພື້ນຖານເຊັ່ນ: ເສົາສັນຍານໂທລະສັບມືຖື ແລະ ທໍ່ສົ່ງພະລັງງານ.
ນອກຈາກນັ້ນ, ICBL ອ້າງເຖິງຫລັກຖານ ເຊິ່ງລະບຸວ່າ: ກອງທັບຂອງມຽນມາບັງຄັບໃຫ້ພົນລະເຮືອນຍ່າງນໍາໜ້າເຈົ້າໜ້າທີ່ ເພື່ອກວາດລ້າງພື້ນທີ່ທີ່ມີທຸ່ນລະເບີດຕົກຄ້າງ.
ລາຍງານເປີດເຜີຍຮູບຖ່າຍທີ່ບົ່ງຊີ້ວ່າ: ຝ່າຍຕໍ່ຕ້ານຂອງກອງທັບຢຶດທຸ່ນລະເບີດຕໍ່ຕ້ານບຸກຄົນ ເຊິ່ງຜະລິດໂດຍທາງການມຽນມາໄດ້ທຸກເດືອນລະຫວ່າງເດືອນມັງກອນ 2022 – ເດືອນກັນຍາ 2024 ຈາກເກືອບທຸກສ່ວນຂອງປະເທດ ແລະ ມີລາຍງານວ່າ: ພວກເຂົາວາງທຸ່ນລະເບີດໄວ້ຕາມພື້ນທີ່ທີ່ຝ່າຍກອງທັບຄວບຄຸມຢູ່.
