ມອບ-ຮັບໜ້າທີ່ ຫົວໜ້າຄະນະພົວພັນຕ່າງປະເທດສູນກາງພັກ ຄົນໃໝ່

ວັນທີ 22 ພະຈິກນີ້ ທີ່ ສຳນັກງານຄະນະພົວພັນຕ່າງປະເທດສູນກາງພັກ (ຄຕພ) ໄດ້ມີພິທີມອບ-ຮັບໜ້າທີ່ ລະຫວ່າງ ທ່ານ ທອງສະຫວັນ ພົມວິຫານ ກຳມະການສູນກາງພັກ ເລຂາຄະນະພັກ ຫົວໜ້າຄະນະພົວພັນຕ່າງປະເທດສູນກາງພັກ (ຜູ້ເກົ່າ) ກັບ ທ່ານ ບຸນເຫລືອ ພັນດານຸວົງ ຮັກສາການເລຂາຄະນະບໍລິຫານງານພັກ ຮັກສາການຫົວໜ້າຄະນະພົວພັນຕ່າງປະເທດສູນກາງພັກ ໂດຍການໃຫ້ກຽດເປັນປະທານ ຂອງ ທ່ານ ນາງ ສີໃສ ລືເດດມູນສອນ ກຳມະການກົມການເມືອງສູນກາງພັກ ຄະນະເລຂາທິການສູນກາງພັກ ຫົວໜ້າຄະນະຈັດຕັ້ງສູນກາງພັກ.

ໃນພິທີ, ທ່ານ ສຸລິຍາ ພົມມີສິດ ຮັກສາການຫົວໜ້າກົມຄຸ້ມຄອງພະນັກງານ, ຄະນະຈັດຕັ້ງສູນກາງພັກ ໄດ້ຂຶ້ນຜ່ານຄຳສັ່ງຂອງກົມການເມືອງສູນກາງພັກ ສະບັບເລກທີ 12/ກມສພ, ລົງວັນທີ 15 ພະຈິກ 2024 ວ່າດ້ວຍ ການຍົກຍ້າຍພະນັກງານການນໍາຂັ້ນສູງໄປຮັບໜ້າທີ່ໃໝ່; ຄຳສັ່ງຂອງຄະນະເລຂາທິການສູນກາງພັກ ສະບັບເລກທີ 296/ຄລສພ, ລົງວັນທີ 14 ພະຈິກ 2024 ວ່າດ້ວຍການຍົກຍ້າຍພະນັກງານ ການນໍາຂັ້ນສູງໄປຮັບໜ້າທີ່ໃໝ່; ມະຕິຕົກລົງຂອງ ຄະນະເລຂາທິການສູນກາງພັກ ສະບັບເລກທີ 297/ຄລສພ, ລົງວັນທີ 14 ພະຈິກ 2024 ວ່າດ້ວຍ ການແຕ່ງຕັ້ງກໍາມະການຄະນະບໍລິຫານງານພັກ ຄະນະພົວພັນຕ່າງປະເທດສູນກາງພັກ ແລະ ມະຕິຕົກລົງຂອງ  ຄະນະເລຂາທິການສູນກາງພັກ ສະບັບເລກທີ 298/ຄລສພ, ລົງວັນທີ 14 ພະຈິກ 2024 ວ່າດ້ວຍການແຕ່ງຕັ້ງ ຮັກສາການເລຂາຄະນະບໍລິຫານງານພັກ, ຮັກສາການຫົວໜ້າຄະນະພົວພັນຕ່າງປະເທດສູນກາງພັກ.

ໂອກາດດັ່ງກ່າວ, ທ່ານ ທອງສະຫວັນ ພົມວິຫານ ໄດ້ກ່າວລາຍງານ ກ່ຽວກັບ ວຽກງານການເຄື່ອນໄຫວໂດຍຫຍໍ້ຂອງ ຄຕພ ນັບແຕ່ປີ 2021 ເປັນຕົ້ນມາ ຊຶ່ງສາມາດຍາດໄດ້ຜົນສຳເລັດສຳຄັນຫຼາຍດ້ານ ໃນການປະຕິບັດໜ້າທີ່ເປັນເສນາທິການ ໃຫ້ແກ່ສູນກາງພັກ ໃນວຽກງານຕ່າງປະເທດຂອງພັກ ແລະ ການທູດປະຊາຊົນ ທັງໃນຂອບສອງຝ່າຍ ແລະ ຫຼາຍຝ່າຍ, ປະກອບສ່ວນຢ່າງຕັ້ງໜ້າ ເຂົ້າໃນພາລະກິດປົກປັກຮັກສາ ແລະ ສ້າງສາພັດທະນາປະເທດຊາດ.

ຫຼັງຈາກນັ້ນ, ທ່ານ ບຸນເຫຼືອ ພັນດານຸວົງ ໄດ້ຂຶ້ນກ່າວຮັບໜ້າທີ່ ໂດຍໄດ້ຕີລາຄາຜົນສຳເລັດຂອງ ຄຕພ ໃນໄລຍະຜ່ານມາ ພາຍໃຕ້ການຊີ້ນຳ-ນຳພາຂອງສະຫາຍຫົວໜ້າ ຄຕພ ຜູ້ເກົ່າ ແລະ ໄດ້ໃຫ້ຄຳໝາຍໝັ້ນວ່າ ຈະພ້ອມກັບໝູ່ຄະນະ ເພື່ອສືບຕໍ່ປະຕິບັດໜ້າທີ່ ເປັນເສນາທິການ ໃຫ້ແກ່ສູນກາງພັກໃນວຽກງານຕ່າງປະເທດ ເພື່ອປະກອບສ່ວນເຂົ້າໃນການປະຕິບັດແນວທາງຕ່າງປະເທດຂອງພັກ ໃຫ້ມີປະສິດທິຜົນຍິ່ງຂຶ້ນ.

ໃນພິທີດັ່ງກ່າວ, ທ່ານ ນາງ ສີໃສ ລືເດດມູນສອນ ໄດ້ຕາງໜ້າໃຫ້ກົມການເມືອງສູນກາງພັກ ແລະ ຄະນະເລຂາທິການສູນກາງພັກ ໂອ້ລົມໂດຍໄດ້ສະແດງຄວາມຍ້ອງຍໍຊົມເຊີຍ ຕໍ່ບັນດາຜົນງານອັນພົ້ນເດັ່ນທີ່ ຄຕພ ຍາດມາໄດ້ ແລະ ໄດ້ສະເໜີໃຫ້ສືບຕໍ່ປົກປັກຮັກສາ ແລະ ເສີມຂະຫຍາຍມູນເຊື້ອ ຄວາມສາມັກຄີເປັນເອກະພາບພາຍໃນຄະນະພັກ ກໍຄືຄະນະນຳທຸກຂັ້ນ ເພື່ອປະຕິບັດພາລະບົດບາດ, ສິດໜ້າທີ່ ຄວາມຮັບຜິດຊອບຂອງຕົນ, ເປັນເຈົ້າການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງທີ XI ຂອງພັກ ແລະ ແຜນພັດທະນາເສດຖະກິດ-ສັງຄົມ ແຫ່ງລັດ 5 ປີ ຄັ້ງທີ 9 ໃຫ້ປະກົດຜົນເປັນຈິງ; ສືບຕໍ່ເປັນເຈົ້າການຍູ້ແຮງການເຄື່ອນໄຫວວຽກງານການທູດຂອງພັກ ແລະ ການທູດປະຊາຊົນ ໂດຍຖືເປັນວຽກງານປາຍແຫຼມ ໃນການເຄື່ອນໄຫວວຽກງານການຕ່າງປະເທດຂອງພັກ ໃນໄລຍະໃໝ່; ເຊື່ອໝັ້ນວ່າ ສະຫາຍຫົວໜ້າ ຄຕພ ຜູ້ໃໝ່ ຈະສືບຕໍ່ພ້ອມກັບໝູ່ຄະນະ ຍົກສູງຄວາມຮັບຜິດຊອບ, ເປັນຫຼັກແຫຼ່ງ, ເປັນຄັນທຸງເຕົ້າໂຮມຄວາມສາມັກຄີເປັນເອກະພາບຢູ່ພາຍໃນ ເພື່ອເຮັດສຳເລັດໜ້າທີ່ ແລະ ນຳພາ ຄຕພ ສືບຕໍ່ກ້າວຂຶ້ນຢ່າງໜັກແໜ້ນ ຕາມທິດທີ່ກອງປະຊຸມໃຫຍ່ຄັ້ງທີ XI ຂອງພັກວາງອອກ.