ສິງກະໂປປັບຂຶ້ນຄາດຄະເນເສດຖະກິດປີນີ້ ຫລັງ GDP ໄຕມາດ 3 ເຕີບໃຫຍ່ເຖິງ 3.8%
ສິງກະໂປເປີດເຜີຍວ່າ: ເສດຖະກິດຂອງປະເທດເຕີບໃຫຍ່ເກີນຄາດໃນໄຕມາດ 3 ແລະ ໄດ້ປັບເພີ່ມການຄາດຄະເນຂອງປີນີ້ ເນື່ອງຈາກອຸປະສົງທີ່ແຂງແກ່ນຂຶ້ນ ຈາກປະເທດຄູ່ຄ້າທີ່ສໍາຄັນ.
ຖະແຫລງການໂດຍກະຊວງການຄ້າສິງກະໂປ ລະບຸການຄາດຄະເນວ່າ: ເສດຖະກິດຂອງປະເທດຈະຂະຫຍາຍຕົວປະມານ 3.5% ໃນປີ 2024 ເຊິ່ງສູງກວ່າທີ່ເຄີຍຄາດຄະເນໄວ້ກ່ອນໜ້ານີ້ ຢູ່ລະດັບ 2.0-3.0%.
ທາງການສິງກະໂປເປີດເຜີຍວ່າ: ເສດຖະກິດເຕີບໃຫຍ່ 5.4% ເມື່ອທຽບໃສ່ແຕ່ລະປີໃນເດືອນກໍລະກົດ-ກັນຍາຜ່ານມາ ຫລື ຊ່ວງໄຕມາດທີ 3 ເຊິ່ງສູງກວ່າການຄາດຄະເນເບື້ອງຕົ້ນ 4.1% ແລະ ສູງກວ່ານັກເສດຖະສາດຄາດຄະເນໄວ້ວ່າຕໍ່າກວ່າ 4%.
ຕົວເລກດັ່ງກ່າວ ເຮັດໃຫ້ການເຕີບໃຫຍ່ສະເລ່ຍຂອງເສດຖະກິດສິງກະໂປໃນໄລຍະ 9 ເດືອນທໍາອິດຂອງປີນີ້ຢູ່ລະດັບ 3.8% ສົ່ງຜົນເຮັດໃຫ້ກະຊວງການຄ້າປັບເພີ່ມການຄາດຄະເນຂອງປີນີ້. ສ່ວນການປັບຂຶ້ນດັ່ງກ່າວຖືເປັນຄັ້ງທີ 2 ຂອງປີ 2024 ຫລັງການປະກາດປັບເພີ່ມການຄາດຄະເນປັນ 2.0-3.0% ຈາກ 1.0-3.0% ໃນເດືອນສິງຫາຜ່ານມາ.
ສໍາລັບການເຕີບໃຫຍ່ໃນໄຕມາດທີ 3 ຂອງເສດຖະກິດສິງກະໂປນັ້ນ ຂັບເຄື່ອນໂດຍຂະແໜງການຜະລິດ, ການຄ້າສົ່ງ ແລະ ການເງິນ ແລະ ປະກັນໄພ ເຊິ່ງສ່ວນໜຶ່ງໄດ້ຮັບແຮງໝຸນຈາກການປັບເພີ່ມຂຶ້ນຂອງອຸດສາຫະກໍາເອເລັກໂຕຣນິກທົ່ວໂລກ. ສ່ວນຂະແໜງການຜະລິດທີ່ເປັນເສົາຫລັກຂອງເສດຖະກິດສິງກະໂປຂະຫຍາຍຕົວ 11.0% ປີ້ນກັບຈາກການຫົດຕົວ 1.0% ໃນໄຕມາດກ່ອນໜ້າ.
ຕາມຂໍ້ມູນຂອງລັດຖະບານ, ຕະຫລາດສົ່ງອອກຕົ້ນຕໍເຊັ່ນ: ອາເມລິກາ ແລະ ເຂດໃຊ້ເງິນເອີໂຣ ຕະຫລອດຈົນເສດຖະກິດໃນເຂດບາງແຫ່ງ ເຮັດໃຫ້ຜົນງານໄດ້ດີກວ່າທີ່ຄາດກະໄວ້ໃນໄຕມາດທີ 3 ຂອງປີນີ້.
ເຖິງຢ່າງໃດກໍຕາມ, ການເຕີບໃຫຍ່ທາງເສດຖະກິດຂອງສິງກະໂປໃນປີ 2025 ຈະຢູ່ລະດັບ 1.0-3.0% ເນື່ອງຈາກຄວາມບໍ່ແນ່ນອນຂອງເສດຖະກິດໂລກທີ່ເພີ່ມຂຶ້ນ ລວມທັງຄວາມບໍ່ແນ່ນອນກ່ຽວກັບນະໂຍບາຍຂອງທ່ານ ໂດນັລ ທຣໍາ ວ່າທີ່ຜູ້ນໍາຄົນໃໝ່ຂອງອາເມລິກາ ເຊິ່ງອາດເພີ່ມຄວາມສ່ຽງທີ່ມີທ່າອ່ຽງທາງລົບ.
