ອາເມລິກາຢືນຢັນພົບເດັກຕິດເຊື້ອໄຂ້ຫວັດສັດປີກ ເປັນຄົນທໍາອິດຂອງປະເທດ
ເຈົ້າໜ້າທີ່ສາທາລະນະສຸກໃນລັດແຄລິຟໍເນຍຂອງອາເມລິກາ ຢືນຢັນການພົບເດັກຕິດເຊື້ອພະຍາດໄຂ້ຫວັດສັດປີກ ເຊິ່ງເປັນຄົນທໍາອິດຂອງປະເທດ.
ຖະແຫລງການໂດຍສູນຄວບຄຸມ ແລະ ປ້ອງກັນພະຍາດຂອງອາເມລິກາ (CDC) ແລະ ສໍານັກງານສາທາລະນະສຸກແຫ່ງແຄລິຟໍເນຍ (CDPH) ລະບຸວ່າ: ຜູ້ຕິດເຊື້ອມີອາການບໍ່ຮຸນແຮງ ແລະ ປັດຈຸບັນກໍາລັງພັກຟື້ນຢູ່ເຮືອນ ຫລັງໄດ້ຮັບການປິ່ນປົວດ້ວຍຢາຕ້ານໄວຣັສໄຂ້ຫວັດໃຫຍ່, ສ່ວນສະມາຊິກໃນຄອບຄົວ ແລະ ຜູ້ສໍາຜັດໃກ້ຊິດເດັກຄົນດັ່ງກ່າວ ເຂົ້າຮັບການກວດໃນເບື້ອງຕົ້ນ ເຊິ່ງຜົນອອກມາຍັງເປັນລົບ.
ຜູ້ຕິດເຊື້ອຄົນດັ່ງກ່າວມີອາການບໍ່ຮຸນແຮງ ກ່ອນກວດພົບເຊື້ອ. ປັດຈຸບັນຜົນການທົດສອບພົບເຊື້ອໄວຣັສໄຂ້ຫວັດສັດປີກໃນລະດັບຕໍ່າ ແລະ ການກວດເພື່ອຕິດຕາມຜົນໃນອີກ 4 ວັນຕໍ່ມາຫລັງເຂົ້າຮັບການປິ່ນປົວ ພົບວ່າເປັນລົບແລ້ວ.
ຖະແຫລງການຂອງ CDC ແລະ CDPH ເນັ້ນວ່າ: “ການຕິດຕໍ່ຂອງເຊື້ອໄວຣັສໄຂ້ຫວັດສັດປີກລະຫວ່າງບຸກຄົນເກີດຂຶ້ນໄດ້ຍາກ” ແລະ ການແຜ່ກະຈາຍມັກຈໍາກັດຢູ່ວົງສະເພາະຜູ້ທີ່ສໍາຜັດໃກ້ຊິດພຽງບໍ່ເທົ່າໃດຄົນ.
ນັບແຕ່ຕົ້ນປີນີ້ CDC ຢືນຢັນການພົບຜູ້ຕິດເຊື້ອພະຍາດໄຂ້ຫວັດສັດປີກຢູ່ອາເມລິກາແລ້ວ 55 ຄົນ ລວມຜູ້ຕິດເຊື້ອຄົນຫລ້າສຸດທີ່ເປັນເດັກນ້ອຍນໍາ ໂດຍໃນຈໍານວນຜູ້ຕິດເຊື້ອສະສົມທັງໝົດໃນເວລານີ້ມີຢ່າງໜ້ອຍ 29 ຄົນ ອາໄສຢູ່ລັດແຄລິຟໍເນຍ.
ທັງນີ້, ຄວາມສ່ຽງຕໍ່ປະຊາຊົນທົ່ວໄປຍັງຢູ່ໃນລະດັບຕໍ່າ ເຖິງວ່າສູງກວ່າສໍາລັບຜູ້ທີ່ເຮັດວຽກໂດຍກົງກັບສັດໃນຟາມເຊັ່ນ: ສັດປີກທຸກປະເພດ, ງົວນົມ ແລະ ອື່ນໆ.
