ຟີລິບປິນເລີ່ມກໍ່ສ້າງຟາມພະລັງງານແສງຕາເວັນຂະໜາດໃຫຍ່ສຸດໃນປະເທດ

       ຟີລິບປິນເລີ່ມຕົ້ນກໍ່ສ້າງໂຮງໄຟຟ້າພະລັງງານແສງຕາເວັນ ແລະ ກັກເກັບພະລັງງານແບັດເຕີຣີ ເມຣັລໂກ ເທີຣາ ເຊິ່ງຖືເປັນໂຄງການພະລັງງານແສງຕາເວັນຂະໜາດໃຫຍ່ທີ່ສຸດຂອງປະເທດ ຄວບຄຸມເນື້ອທີ່ 3,500 ເຮັກຕາ ຢູ່ແຂວງນູເອວາເອຊີຮາ ແລະ ແຂວງບູລາກັນ ທາງເໜືອຂອງນະຄອນຫລວງມະນິລາ.

       ສໍານັກຂ່າວຊິນຮົວລາຍງານວ່າ: ໂຄງການດັ່ງກ່າວຈະສາມາດຜະລິດໄຟຟ້າກວ່າ 5,000 ລ້ານກິໂລວັດຊົ່ວໂມງຕໍ່ປີ ເມື່ອເລີ່ມຕົ້ນດໍາເນີນງານຢ່າງເຕັມຮູບແບບ ແລະ ຈະມີສ່ວນສົ່ງເສີມໂຄງຂ່າຍໄຟຟ້າຂອງເກາະລູຊອນ ຕອບສະໜອງຄວາມຕ້ອງການພະລັງງານສະອາດ ແລະ ຍືນຍົງທີ່ເພີ່ມຂຶ້ນ ລວມທັງຫລຸດການອາໄສເຊື້ອໄຟຟໍຊິລ.

      ລາຍງານໂດຍກະຊວງພະລັງງານຟີລິບປິນລະບຸວ່າ: ການລົງທຶນດ້ານເຕັກໂນໂລຊີພະລັງງານແສງຕາເວັນ ແລະ ການເກັບເກັບພະລັງງານຄັ້ງໃຫຍ່ນີ້ ຖືເປັນບາດກ້າວສໍາຄັນຂອງການບັນລຸເປົ້າໝາຍເພີ່ມອັດຕາສ່ວນພະລັງງານໝູນວຽນ ໃນສ່ວນປະສົມທາງພະລັງງານ, ຫລຸດການປ່ອຍກາກບອນ ແລະ ຕອບສະໜອງຄວາມຕ້ອງການໄຟຟ້າຢູ່ເກາະລູຊອນ.

      ທັງນີ້, ລັດຖະບານຟີລິບປິນມີຄວາມເຊື່ອໝັ້ນວ່າ: ໂຄງການນີ້ຈະເພີ່ມຄວາມໝັ້ນຄົງ ແລະ ຄວາມແຂງແຮງທາງພະລັງງານຂອງປະເທດ ແລະ ຈະມີສ່ວນສົ່ງເສີມການພັດທະນາເສດຖະກິດ ດ້ວຍການສ້າງວຽກ ແລະ ສົ່ງເສີມການເຕີບໃຫຍ່ທີ່ຍືນຍົງ.