5 ທິດທາງ ແລະ ມາດຕະການລວມຕໍ່ການປະເມີນການປະຕິບັດ 4 ກົດໝາຍ

ການດໍາເນີນກອງປະຊຸມສະໄໝສາມັນເທື່ອທີ 8 ຂອງສະພາແຫ່ງ ຊາດຊຸດທີ IX ວັນທີ 22 ພະຈິກຜ່ານມາ ໂດຍການເປັນປະທານຂອງ ຄຳໃບ ດຳລັດ ຮອງປະທານສະພາແຫ່ງຊາດ; ຫຼັງຈາກຮັບຟັງລາຍງານຈາກຕາງໜ້າລັດຖະ ບານກ່ຽວກັບການປະເມີນຜົນການຈັດຕັ້ງປະຕິບັດ 4 ກົດໝາຍໃນຂົງເຂດວັດທະນະ ທຳ-ສັງຄົມ ຄື: ກົດໝາຍວ່າດ້ວຍການສຶກສາ, ກົດໝາຍວ່າດ້ວຍການຄວບຄຸມເຄື່ອງດື່ມທີ່ມີທາດເຫຼົ້າ, ກົດໝາຍວ່າດ້ວຍແຮງງານ ແລະ ກົດໝາຍວ່າດ້ວຍປ້າຍ, ທ່ານ ບຸນຕາ ເທບພະວົງ ປະທານກຳມາທິການວັດທະນະທຳ-ສັງຄົມ ຕາງໜ້າຄະນະປະຈໍາສະ ພາແຫ່ງຊາດ ໄດ້ປະກອບຄໍາເຫັນຕໍ່ 4 ບົດລາຍງານດັ່ງກ່າວ ເຊິ່ງນັບແຕ່ປະກາດໃຊ້ກົດໝາຍທັງ 4 ສະບັບ ກົດໝາຍເຫຼົ່ານີ້ ລ້ວນແຕ່ເປັນເຄື່ອງມື ແລະ ບ່ອນອີງທີ່ສໍາຄັນໃນການຄຸ້ມຄອງ, ຕິດຕາມ, ກວດກາ ແລະ ການເຄື່ອນໄຫວວຽກງານການສຶກສາ, ການຄວບຄຸມເຄື່ອງດື່ມທີ່ມີທາດເຫຼົ້າ, ການຄຸ້ມຄອງ ແລະ ພັດທະນາວຽກງານແຮງງານ, ແລະ ວຽກງານການນຳໃຊ້ປ້າຍ; ສາມາດສະກັດກັ້ນການກະທໍາຜິດ, ປົກປ້ອງຜົນປະໂຫຍດຂອງລັດ, ລວມໝູ່, ສິດ ແລະ ຜົນປະ ໂຫຍດອັນຊອບທໍາຂອງພົນລະເມືອງ ຕາມພາລະບົດບາດ, ສິດ ແລະ ໜ້າທີ່ຂອງແຕ່ລະພາກສ່ວນ ທັງເປັນເຄື່ອງມືສຶກສາອົບຮົມພົນລະເມືອງ ໃຫ້ມີສະຕິເຄົາລົບ ແລະ ຈັດຕັ້ງປະຕິບັດກົດໝາຍຢ່າງຖືກຕ້ອງ ແລະ ເຂັ້ມງວດ ແນໃສ່ເຮັດໃຫ້ສັງຄົມມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍໂດຍພື້ນຖານ, ສັງຄົມໄດ້ເອົາໃຈໃສ່ ເຮັດໃຫ້ການ ເຄື່ອນໄຫວວຽກງານຂອງທຸກພາກສ່ວນທີ່ກ່ຽວຂ້ອງ ມີປະສິດທິພາບ, ມີປະສິດທິຜົນ ແລະ ມີຄວາມສອດຄ່ອງກັບແນວທາງນະໂຍບາຍຂອງພັກ, ລັດຖະທໍາມະນູນ, ລະບຽບກົດໝາຍຂອງລັດ, ຕອບສະໜອງໄດ້ຄວາມຮຽກ ຮ້ອງຕ້ອງ ການຂອງການພັດທະນາເສດຖະກິດ-ສັງຄົມ, ສາມາດເຊື່ອມໂຍງກັບພາກພື້ນ ແລະ ສາກົນ, ປະກອບສ່ວນເຂົ້າໃນການສ້າງສາ ແລະ ພັດທະນາປະເທດຊາດ ໄດ້ເປັນຢ່າງດີ.

ທ່ານປະທານກຳມາທິການວັດທະນະທຳ-ສັງຄົມ ໄດ້ສະເໜີໃຫ້ລັດຖະບານເອົາໃຈໃສ່ຕື່ມຕໍ່ບາງທິດທາງ ແລະ ມາດຕະການລວມ ດັ່ງນີ້:

1. ຊີ້ນໍາບັນດາກະຊວງທີ່ກ່ຽວຂ້ອງ ກ່ຽວກັບວຽກງານການສ້າງ ແລະ ປັບປຸງກົດໝາຍ ແລະ ນິຕິກໍາໃຕ້ກົດໝາ ຍ ໃນຕໍ່ໜ້າ ຕ້ອງຮັບປະກັນການຫັນເອົາແນວທາງແຜນນະໂຍບາຍມາກໍານົດເຂົ້າໃນກົດໝາຍໃຫ້ແທດເໝາະກັບຕົວຈິງ, ສອດຄ່ອງກັບລັດຖະທໍາມະນູນ, ກົດໝາຍ, ນິຕິກໍາໃຕ້ກົດໝາຍ, ສົນທິສັນຍາ ແລະ ສັນຍາສາກົນ ທີ່ ສປປລາວ ເປັນພາຄີ ແລະ ຈັງຫວະການພັດທະນາເສດຖະກິດ-ສັງຄົມໃນແຕ່ລະໄລຍະ; ການປັບປຸງເນື້ອໃນຂອງກົດໝາຍ ຕ້ອງແນໃສ່ ແກ້ໄຂບັນຫາທີ່ເຫັນວ່າບໍ່ທັນສອດຄ່ອງ, ມີຊ່ອງວ່າງ, ການຈັດຕັ້ງປະຕິບັດມີຄວາມຊໍ້າຊ້ອນ, ບັນຫາທີ່ຂັດກັບກົດໝາຍ ຫຼື ນິຕິກໍາອື່ນ ແລະ ເພີ່ມບາງເນື້ອໃນທີ່ກົດໝາຍຍັງບໍ່ທັນໄດ້ກໍານົດ ໃຫ້ຄົບຖ້ວນ, ຮັດກຸມ, ເປັນລະບົບຄົບຊຸດ.

2. ບັນດາກະຊວງທີ່ກ່ຽວຂ້ອງ ໃຫ້ເປັນເຈົ້າການ ແລະ ຮີບຮ້ອນຄົ້ນຄວ້າຜັນຂະຫຍາຍມາດຕາຂອງກົດໝາຍ ທີ່ກຳນົດໃຫ້ອອກເປັນນິຕິກຳໃຕ້ກົດໝາຍ ແລະ ປະກາດໃຊ້ໂດຍໄວ; ພ້ອມກັນນັ້ນ, ໃຫ້ສືບຕໍ່ຄົ້ນຄວ້າ ແລະ ສັງລວມ ບັນດາມາດຕາຂອງກົດໝາຍ ທີ່ເຫັນວ່າເນື້ອໃນບໍ່ສອດຄອງ, ບໍ່ຈະແຈ້ງ ແລະ ປະຕິບັດໄດ້ຍາກ ເຊິ່ງມີຄວາມຈໍາເປັນຕ້ອງໄດ້ມີການປັບປຸງ ເພື່ອເຮັດໃຫ້ກົດໝາຍດັ່ງກ່າວ ມີເນື້ອໃນສອດຄອງ, ຮັດກຸມ, ຈະແຈ້ງ ແລະ ສາມາດປະຕິບັດໄດ້ງ່າຍ.

3. ເພີ່ມທະວີການໂຄສະນາເຜີຍແຜ່ກົດໝາຍໃຫ້ເລິກເຊິ່ງ, ຕໍ່ເນື່ອງ, ກວ້າງຂວາງ, ທົ່ວເຖິງ ແລະ ແທດເໝາະກັບແຕ່ລະປະເພດເປົ້າໝາຍ ແນໃສ່ສ້າງຄວາມເຂົ້າໃຈທີ່ຖືກຕ້ອງ, ເປັນເອກະພາບຕໍ່ເນື້ອໃນແຕ່ລະກົດໝາຍ, ຍົກສູງສະ ຕິເຄົາລົບ ແລະ ປະຕິບັດກົດໝາຍໃນທົ່ວສັງຄົມ.

4. ປັບປຸງກົນໄກ ແລະ ຂັ້ນຕອນການປະສານງານ ກ່ຽວກັບການຄຸ້ມຄອງ, ຕິດຕາມກວດກາ, ການສ້າງ ແລະ ປັບປຸງ, ການປະເມີນ ແລະ ການຈັດຕັ້ງປະຕິບັດກົດໝາຍ, ນິຕິກໍາໃຕ້ກົດໝາຍໃນຂົງເຂດວັດທະນະທໍາ-ສັງຄົມ ລະ ຫວ່າງສະພາແຫ່ງຊາດ, ສະພາປະຊາຊົນຂັ້ນແຂວງ, ບັນດາຂະແໜງການ ແລະ ພາກສ່ວນອື່ນທີ່ກ່ຽວຂ້ອງ ຂັ້ນສູນກາງ ແລະ ທ້ອງຖິ່ນ.

5. ລັດຖະບານ ກໍຄືຂະແໜງການທີ່ກ່ຽວຂ້ອງ ເອົາໃຈໃສ່ຕິດຕາມກວດກາການຈັດຕັ້ງປະຕິບັດກົດໝາຍ ແລະ ນິ ຕິກໍາໃຕ້ກົດໝາຍ ທົ່ວສັງຄົມ ໃຫ້ເປັນລະບົບ, ຕໍ່ເນື່ອງ ແລະ ສາມາດຄຸ້ມຄອງຢ່າງມີປະສິດທິພາບ.

ສໍາລັບສະພາແຫ່ງຊາດ ແລະ ສະພາປະຊາຊົນຂັ້ນແຂວງ ສືບຕໍ່ຍົກສູງຄຸນນະ ພາບການປະຕິບັດພາລະບົດບາດດ້ານການຕິດຕາມກວດກາການປະເມີນຜົນການຈັດຕັ້ງປະຕິບັດກົດໝາຍໃນຂົງເຂດວັດທະນະທຳ-ສັງຄົມ ໃຫ້ເປັນລະບົບ, ປົກກະຕິ ແລະ ຕໍ່ເນື່ອງ.