12 ວຽກງານຈຸດສຸມຂອງລັດຖະບານ ໃນໄລຍະເດືອນທັນວາ 2024

ວັນທີ 22 ພະຈິກ 2024 ນີ້ ທ່ານ ສອນໄຊ ສິດພະໄຊ ລັດຖະມົນຕີປະຈໍາສໍານັກງານນາຍົກລັດຖະມົນຕີ, ໂຄສົກລັດຖະບານ ໄດ້ຖະແຫລງຂ່າວ ກ່ຽວກັບກອງປະຊຸມສະໄໝສາ ມັນຂອງລັດຖະບານ ປະຈຳເດືອນພະຈິກ 2024ໄດ້ກຳນົດແຜນວຽກ ສຳລັບວຽກຈຸດສຸມຂອງລັດຖະບານ ໃນເດືອນທັນວາ ວ່າ:  

1. ນອກຈາກຈະຕ້ອງໄດ້ສືບຕໍ່ສຸມໃສ່ປະຕິບັດແຜນວຽກຈຸດສຸມ 6 ເດືອນທ້າຍປີ 2024 ທີ່ໄດ້ກຳນົດໄວ້ມະຕິກອງປະຊຸມລັດຖະບານເປີດກວ້າງ ຄັ້ງທີ I ປີ 2024 ໂດຍສະເພາະ ຈັດຕັ້ງປະຕິບັດຕາມທິດຊີ້ນຳຂອງເລຂາທິການໃຫຍ່, ປະທານປະເທດ ກ່ຽວກັບມາດຕະການໃໝ່ ເພື່ອແກ້ໄຂ 6 ບັນຫາເຄັ່ງຮ້ອນ ໃຫ້ບັນລຸ 9 ຄາດໝາຍສູ້ຊົນ ໂດຍເອົາໃຈໃສ່ 5 ວິທີເຮັດວຽກແບບບຸກທະລຸ ແລະ ເອົາໃຈໃສ່ແກ້ໄຂ 3 ບັນຫາຮີບດ່ວນ ທີ່ເລຂາທິການໃຫຍ່ໄດ້ເນັ້ນໃນກອງປະຊຸມຄົບຄະນະບໍລິຫານງານສູນກາງພັກ ຄັ້ງທີ 9 ສະ ໄໝທີ XI ຄື: ແກ້ໄຂບັນຫາບຸກຄະລາກອນ, ຄວາມຮັບຜິດຊອບ, ຈັນຍາບັນຂອງພະນັກງານ ໃນຂົງ ເຂດຕ່າງໆ; ກົນໄກປະສານງານ, ການປັບປຸງອໍານວຍຄວາມສະດວກໃຫ້ແກ່ການລົງທຶນ, ການສົ່ງເສີມການທ່ອງ ທ່ຽວ ແລະ ການປັບປຸງພື້ນຖານໂຄງລ່າງແລ້ວ, ຍັງຈະໄດ້ສຸມໃສ່ປະຕິບັດໜ້າວຽກຕົວຈິງຈໍານວນໜຶ່ງ ຄື: ກະກຽມ ບັນດາເນື້ອໃນບົດຊີ້ແຈງ ເພື່ອຕອບຄຳຊັກຖາມຂອງສະມາຊິກສະພາແຫ່ງຊາດ ໃນກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX;
2. ກະກຽມຜັນຂະຫຍາຍບັນດາແຜນວຽກ ທີ່ໄດ້ລາຍງານຕໍ່ກອງປະຊຸມສະພາ ພິຈາລະນາຮັບຮອງ, ແລ້ວນໍາເຂົ້າປຶກສາຫາລື ແບ່ງຄວາມຮັບຜິດຊອບຈັດຕັ້ງປະຕິບັດ ຢູ່ໃນກອງປະຊຸມລັດຖະບານ ເປີດກວ້າງ ຄັ້ງທີ II ປີ 2024; ສືບຕໍ່ສຸມໃສ່ຈັດຕັ້ງປະຕິບັດ ບັນດາມາດຕະການແກ້ໄຂບັນ ຫາເຄັ່ງຮ້ອນທາງດ້ານເສດຖະກິດ-ການເງິນ, ບັນຫາເງິນເຟີ້, ອັດຕາແລກປ່ຽນເງິນຕາ, ລາຄາສິນຄ້າ ແລະ ໜີ້ສິນຕ່າງປະເທດ ຕາມແຜນວຽກຈຸດສຸມ ຂອງຄະນະສະເພາະກິດ 19/ກມສພ ຕິດພັນກັບການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ໃຫ້ສຳເລັດຕາມແຜນທີ່ກຳນົດໄວ້.
3. ສືບຕໍ່ສຸມໃສ່ເກັບລາຍຮັບຈາກຖານລາຍຮັບທີ່ມີແລ້ວ ໃຫ້ໄດ້ຄົບຖ້ວນ, ຈໍາກັດການຍົກເວັ້ນການປະຕິບັດພັນທະຕ່າງໆ, ກະຊວງກ່ຽວຂ້ອງ ເລັ່ງພັດທະນາລະບົບຊໍາລະສະສາງຕ່າງໆ ຜ່ານລະບົບທະນາຄານ ເພື່ອຫັນການຈັດເກັບລາຍຮັບ ເປັນທັນສະໄໝໃຫ້ສຳເລັດຕາມແຜນ, ຄົ້ນຄວ້າສ້າງຖານລາຍຮັບໃໝ່ ເພື່ອຮັບປະກັນຖານລາຍຮັບໃຫ້ໝັ້ນຄົງ;
4. ສືບຕໍ່ຕິດຕາມ, ກວດກາ ການຈັດຕັ້ງປະຕິບັດບັນດາໂຄງການແຮ່ທາດ ໃຫ້ໄປຕາມລະບຽບກົດໝາຍ, ຊຸກຍູ້ການສ້າງຕັ້ງໂຮງງານປຸງແຕ່ງແປຮູບ ເປັນຜະລິດຕະພັນສຳເລັດຮູບ ແລະ ເຄິ່ງສຳເລັດຮູບ ເພື່ອສົ່ງອອກ;
5. ສືບຕໍ່ກວດກາລົດເຖື່ອນ, ລົດນໍາເຂົ້າບໍ່ຖືກຕ້ອງ ນໍາໃຊ້ບໍ່ຖືກເປົ້າໝາຍ ຢູ່ບັນດາແຂວງທີ່ຍັງເຫລືອ, ຮີບຮ້ອນແກ້ໄຂ ສຳລັບເປົ້າໝາຍທີ່ໄດ້ກວດພົບເຫັນ ແລະ ສັງລວມແລ້ວ ໂດຍສະເພາະ ການຈັດຕັ້ງປະຕິບັດມາດຕະການປັບໃໝ;
6. ສືບຕໍ່ເລັ່ງຊຸກຍູ້, ຕິດຕາມ ແລະ ກວດກາ ການປະຕິບັດໂຄງການລົງທຶນຂະໜາດໃຫຍ່ ໃຫ້ສໍາເລັດໄວ ໂດຍສະເພາະ ແກ້ໄຂບັນດາຂໍ້ຫຍຸ້ງຍາກທີ່ເປັນອຸປະສັກໃນການປະຕິບັດໂຄງການ ຕາມສະພາບຕົວຈິງ;
7. ສືບຕໍ່ຊຸກຍູ້, ສົ່ງເສີມການຜະ ລິດສິນຄ້າ ທົດແທນການນໍາເຂົ້າ ແລະ ການຜະລິດເພື່ອສົ່ງອອກ. ໃນນີ້, ສຸມໃສ່ການຜະລິດລະດູແລ້ງ ຕ້ອງໄດ້ກະ ກຽມລະບົບສະໜອງນ້ຳໃຫ້ພື້ນທີ່ການຜະລິດ, ການສ້າງໂຮງງານຜະລິດຝຸ່ນປຸ໋ຍໃຫ້ພຽງພໍ ເພື່ອຊ່ວຍຫລຸດຜ່ອນຕົ້ນທຶນ; ດຸ່ນດ່ຽງການນໍາເຂົ້າ-ສົ່ງອອກສິນຄ້າ ຕິດພັນກັບການດຸ່ນດ່ຽງດັດສົມ ຄວາມຕ້ອງການເງິນຕາຕ່າງປະເທດ, ປະຕິບັດມາດຕະການຈໍາກັດ ການນໍາເຂົ້າສິນຄ້າ ທີ່ພາຍໃນຜະລິດໄດ້ພຽງພໍ ເປັນຕົ້ນເບຍ, ເຄື່ອງດື່ມ, ສະບຽງອາຫານ, ຕິດຕາມ, ກວດກາ, ປ້ອງກັນ ແລະ ສະກັດກັ້ນ ການລັກລອບນຳເຂົ້າສິນຄ້າ ຕາມປ່ອງຂ້າມລອຍຕ່າງໆ.
8. ສຸມໃສ່ປັບປຸງບັນດາແຫລ່ງທ່ອງທ່ຽວ, ຂອດການບໍລິການ, ຄວາມສະຫງົບປອດໄພ, ຄວາມເປັນລະບຽບ ຮຽບຮ້ອຍ ແລະ ແກ້ໄຂເສັ້ນທາງເຂົ້າຫາແຫລ່ງທ່ອງທ່ຽວຕ່າງໆ. ສຳລັບເສັ້ນທາງທີ່ເປ່ເພ ຍ້ອນການຂົນສົ່ງແຮ່ທາດ ໃຫ້ມີການປະກອບສ່ວນຂອງພາກທຸລະກິດ ໃນການສ້ອມແປງເສັ້ນທາງ ແລະ ກຳນົດນໍ້າໜັກການຂົນສົ່ງໃຫ້ເໝາະສົມ ຕາມທິດຊີ້ນຳລະບຸໃນແຈ້ງການ ຂອງຫ້ອງວ່າການສຳນັກງານນຳຍົກລັດຖະມົນຕີ ສະບັບເລກທີ 412/ຫສນຍ, ລົງວັນທີ 27 ກຸມພາ 2024; ໃຫ້ກະຊວງຖະແຫລງຂ່າວ, ວັດທະນະທໍາ ແລະ ທ່ອງທ່ຽວ ຮີບຮ້ອນສົມທົບກັບ ກະຊວງການຕ່າງປະເທດ, ອົງການປົກຄອງແຂວງວຽງຈັນ ຖະແຫລງຂ່າວກ່ຽວກັບກໍລະນີນັກທ່ອງທ່ຽວຕ່າງປະ ເທດເສຍຊີວິດ ຢູ່ເມືອງວັງວຽງ. ໃນຕໍ່ໜ້າ ຫາກເກີດມີກໍລະນີລັກສະນະດຽວກັນນີ້, ເຫດເກີດບ່ອນໃດ ແມ່ນໃຫ້ບ່ອນນັ້ນ ເປັນເຈົ້າການຖະແຫລງຂ່າວຊີ້ແຈງໃຫ້ທັນການ;
9. ສືບຕໍ່ສຸມໃສ່ປະຕິບັດ ມະຕິ 09/ລບ. ໃນນີ້, ການແກ້ໄຂບັນຫາຂາດແຄນຄູສອນ ໂດຍໃຫ້ກະຊວງສຶກສາທິການ ແລະ ກິລາ ຮີບຮ້ອນປະສານສົມທົບກະຊວງປ້ອງກັນປະ ເທດ ເພື່ອນຳໃຊ້ທະຫານພັນທະມາຊ່ວຍສອນໃນບ່ອນຂາດແຄນຄູ, ສືບຕໍ່ຄົ້ນຄວ້ານະໂຍບາຍຕໍ່ຄູ, ການເພີ່ມເງິນເບ້ຍລ້ຽງໃຫ້ນັກສຶກສາທີ່ຮຽນສາຍຄູ ໂດຍໃຫ້ຮີບຮ້ອນຄົ້ນຄວ້າກົນໄກ ແລະ ວິທີການຕົວຈິງຕາມທີ່ໄດ້ຕົກລົງໃນກອງປະຊຸມນາຍົກ-ຮອງນາຍົກລັດຖະມົນຕີ ຄັ້ງວັນທີ 20 ພະຈິກ 2024;
10. ສືບຕໍ່ເລັ່ງຂະຫຍາຍການຄຸ້ມຄອງແຮງງານຢ່າງລວມສູນ ແລະ ຫັນໄປສູ່ການຄຸ້ມຄອງ ແລະ ການບໍລິການທັນສະໄໝ ດ້ວຍລະບົບດີຈິຕອນ ໃຫ້ກວມເອົາທົ່ວເຖິງ;
11. ສຸມໃສ່ຈັດຕັ້ງຜັນຂະຫຍາຍຜົນກອງປະຊຸມສຸດຍອດອາຊຽນ ຄັ້ງທີ 44 ແລະ 45 ແລະ ບັນດາກອງປະຊຸມສຸດຍອດທີ່ກ່ຽວຂ້ອງ, ຜົນກອງປະຊຸມສຸດຍອດ GMS, ACMECS, CLMV ໃຫ້ເປັນຮູບປະທໍາ;
12. ສືບຕໍ່ກະກຽມໃຫ້ທ່ານນາຍົກລັດຖະມົນຕີ ທີ່ຈະເດີນທາງໄປຢ້ຽມຢາມທາງການ ຣາຊະອານາຈັກກຳປູເຈຍ ໃນຕົ້ນເດືອນທັນວາ 2024 ໂດຍມອບໃຫ້ກະຊວງການ ຕ່າງປະເທດ ເປັນເຈົ້າການສົມທົບກັບພາກສ່ວນກ່ຽວຂ້ອງກະກຽມທາງດ້ານເນື້ອໃນໃຫ້ດີ; ໃຫ້ຫ້ອງວ່າການສຳນັກງານນາຍົກລັດຖະມົນຕີ ສົມທົບກັບກະຊວງທີ່ກ່ຽວຂ້ອງ ຮີບຮ້ອນປັບປຸງບັນດາຮ່າງນິຕິກຳຕ່າງໆ ທີ່ໄດ້ຜ່ານກອງປະຊຸມລັດຖະບານແຕ່ລະຄັ້ງໃຫ້ໄວ, ເອກະສານໃດ ຈະຕ້ອງໄດ້ຜ່ານສະພາແຫ່ງຊາດ ພາຍຫລັງປັບປຸງ ແລະ ກວດຜ່ານແລ້ວ ໃຫ້ນຳສະເໜີ ຄະນະປະຈຳສະພາແຫ່ງຊາດ ພິຈາລະນາ; ໃຫ້ແຕ່ລະກະຊວງ ສຸມໃສ່ຈັດຕັ້ງສະຫລຸບການຈັດຕັ້ງປະຕິບັດວຽກງານປະຈຳປີ 2024 ແລະ ວາງທິດທາງແຜນການປີ 2025 ໃຫ້ລະອຽດຈະແຈ້ງ, ຖືກຕ້ອງ ແລະ ຊັດເຈນ ແລ້ວສົ່ງໃຫ້ຫ້ອງວ່າການສຳນັກງານນາຍົກລັດຖະມົນຕີ ເພື່ອສັງລວມເຂົ້າບົດສະຫລຸບ ປະຈຳປີ 2024 ແລະ ສະເໜີແຜນວຽກປະຈຳປີ 2025 ຂອງລັດຖະບານ.