ກອງປະຊຸມສະພາຂໍໃຫ້ເລັ່ງແກ້ໄຂບັນຫາທີ່ຍັງຊັກຊ້າອືດອາດ
ໂດຍ: ທິດກໍ່າ
ກອງປະຊຸມສະໄໝສາມັນເທື່ອທີ 8 ຂອງສະພາແຫ່ງຊາດຊຸດທີ IX ໄດ້ໄຂຂຶ້ນຢ່າງເປັນທາງການມາແຕ່ຕອນເຊົ້າວັນທີ 18 ພະຈິກ 2024 ພາຍໃຕ້ການເປັນປະທານຂອງທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ແລະ ໂດຍການເຂົ້າຮ່ວມຂອງທ່ານ ທອງລຸນ ສີສຸລິດ ເລຂາທິການໃຫຍ່ ຄະນະບໍລິຫານງານສູນກາງພັກ, ປະທານປະເທດ ແຫ່ງ ສປປ ລາວ. ໃນວາລະກອງປະຊຸມມື້ທໍາອິດ ພາຍຫລັງທ່ານ ໄຊສົມພອນ ພົມວິຫານ ປະທານສະພາແຫ່ງຊາດ ໄດ້ກ່າວສູນທອນພົດເປີດກອງປະຊຸມແລ້ວກໍເລີ່ມຕົ້ນດ້ວຍທ່ານ ສອນໄຊ ສີພັນດອນ ນາຍົກລັດຖະມົນຕີ ແຫ່ງ ສປປ ລາວ ໃນນາມຫົວໜ້າລັດຖະບານ ໄດ້ຂຶ້ນລາຍງານການຈັດຕັ້ງປະຕິບັດແຜນພັດທະນາເສດຖະກິດ-ສັງຄົມ, ແຜນງົບປະມານແຫ່ງລັດ, ແຜນເງິນຕາປະຈໍາປີ 2024 ແລະ ແຜນການປະຈໍາປີ 2025 ຕິດພັນກັບວາລະແຫ່ງຊາດວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ, ແຜນການລົງທຶນປະຈໍາປີ 2025, ແຜນງົບປະມານໃຫ້ກະຊວງ-ອົງການ ແລະ ທ້ອງຖິ່ນປະຈໍາປີ 2025 ແລະ ການດັດແກ້ງົບປະມານແຫ່ງລັດປະຈໍາປີ 2024.
ຢ່າງໃດກໍດີ, ພາຍຫລັງທ່ານ ນາຍົກລັດຖະມົນຕີ ສອນໄຊ ສີພັນດອນ ໄດ້ສໍາເລັດການລາຍງານແລ້ວ, ທ່ານ ສົມມາດ ພົນເສນາ ຮອງປະທານສະພາແຫ່ງຊາດ ກໍໄດ້ຕາງໜ້າຄະນະປະຈໍາສະພາແຫ່ງຊາດ ຂຶ້ນປະກອບຄໍາເຫັນຕໍ່ບັນຫາຕ່າງໆທີ່ລັດຖະບານຍັງຄົງຄ້າງຊັກຊ້າອືດອາດ ເຊິ່ງຕ້ອງໄດ້ແກ້ໄຂໃຫ້ສໍາເລັດ ນັ້ນກໍຄືການແກ້ໄຂໜີ້ສິນພາຍໃນ ແລະ ຕ່າງປະເທດຍັງບໍ່ທັນບັນລຸຕາມຄາດໝາຍ, ການແກ້ໄຂອັດຕາເງິນເຟີ້ສະເລ່ຍໃນ 10 ເດືອນຜ່ານມາໄດ້ພຽງ 24,4% ເຫັນວ່າຍັງສູງ ຕາມມະຕິສະພາແຫ່ງຊາດແມ່ນໃຫ້ຢູ່ໃນລະດັບບໍ່ເກີນ 9%, ການປະຕິບັດນະໂຍບາຍຜະລິດສິນຄ້າເພື່ອທົດແທນການນໍາເຂົ້າ ແລະ ຜະລິດເພື່ອສົ່ງອອກກໍຍັງບໍ່ທັນມີຜົນສໍາເລັດພົ້ນເດັ່ນ, ການປະຕິບັດແຜນການລົງທຶນຂອງລັດໄດ້ພຽງ 71%, ການລະດົມທຶນຊ່ວຍເຫລືອກອງທຶນທາງເພື່ອການພັດທະນາປະຕິບັດໄດ້ພຽງ 58%, ການນໍາໃຊ້ກອງທຶນສ້ອມແປງທາງຍັງຊັກຊ້າ ເຮັດໃຫ້ສະພາບເສັ້ນທາງສືບຕໍ່ເປ່ເພ ສ້າງຄວາມຫຍຸ້ງຍາກໃນການສັນຈອນໄປມາ, ການເກັບລາຍຮັບ ເຖິງວ່າເກີນແຜນແຕ່ເມື່ອທຽບໃສ່ GDP ແມ່ນໄດ້ພຽງ 15,72%, ການຫັນເປັນອັນທັນສະໄໝໃນການເກັບລາຍຮັບບໍ່ທັນປະຕິບັດໄດ້ທົ່ວເຖິງ, ຊໍ້າບໍ່ໜໍາຍັງມີທ່າອ່ຽງຫັນໄປໃຊ້ສູດເກົ່າຕາມລະບົບເດີມ, 17 ຂົງເຂດວັດທະນະທໍາ-ສັງຄົມບໍ່ສາມາດບັນລຸຕາມເປົ້າໝາຍທີ່ວາງໄວ້ ເປັນຕົ້ນອັດຕາເຂົ້າຮຽນໃໝ່ຫລຸດລົງ ນັກຮຽນປະລະການຮຽນເພີ່ມຂຶ້ນ, ບັນຫາການຂາດສານອາຫານຂອງເດັກຍັງເປັນສິ່ງທ້າທາຍ, ອັດຕາເດັກນ້ອຍລຸ່ມ 5 ປີມີນໍ້າໜັກ ແລະ ລວງສູງຕໍ່າກວ່າມາດຕະຖານ, ອັດຕາການເກີດລູກທີ່ມີແພດຊ່ວຍ, ອັດຕາການສັກວັກຊີນໃຫ້ເດັກ, ການບໍລິຈາກເລືອດ ແລະ ການເກັບກູ້ລະເບີດບໍ່ທັນແຕກຍັງປະຕິບັດໄດ້ໜ້ອຍ. ສະນັ້ນ ຈຶ່ງຂໍໃຫ້ລັດຖະບານເລັ່ງແກ້ໄຂບັນຫາຕ່າງໆທີ່ຍັງຄ້າງຄາຊັກຊ້າອືດອາດໃຫ້ໄດ້ຕາມມະຕິຂອງສະພາແຫ່ງຊາດໄດ້ກໍານົດ.
ຢ່າງໃດກໍດີ, ຕາມທິດກໍ່າວ່າ ໜຶ່ງອາທິດຜ່ານໄປນັ້ນກໍໄດ້ເຫັນຫລາຍໆບັນຫາ ທີ່ ສສຊ ຊີ້ເປົ້າໃຫ້ເຫັນບັນຫາ ແລະ ຍັງຈະສືບຕໍ່ໃນອາທິດນີ້ ສິ່ງທີ່ລັດຖະບານຄວນເລັ່ງແກ້ໄຂໃນສະພາບປັດຈຸບັນມັນກໍມີຫລາຍບັນຫາເປັນພວງພະນັງ ແຕ່ສິ່ງທີ່ຕ້ອງແກ້ໄຂໃຫ້ໄດ້ໃນສະພາບປັດຈຸບັນກໍແມ່ນບັນຫາເງິນເຟີ້, ສິນຄ້າແພງ, ຄ່າແຮງຕໍ່າ ແລະ ສິ່ງທີ່ຄວນເລັ່ງແກ້ໄຂໃຫ້ໄດ້ຢ່າງເດັດຂາດກໍຄືການສໍ້ລາດບັງຫລວງ, ສໍ້ຫລວງບັງລາດ ເພາະມັນກາຍເປັນພະຍາດຊໍາເຮື້ອມາຢ່າງຍາວນານ, ກົງກັນຂ້າມ ຖ້າປະປ່ອຍແກ່ຍາວໄປດົນເທົ່າໃດມັນຈະພາໃຫ້ປະເທດຊາດຫລົ້ມຈົມຈິບຫາຍໃນອະນາຄົດ.
