ຢຸດການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ

ວັນທີ 25 ພະຈິກ 2024 ທີ່ສວນປະຕູໄຊ ໄດ້ຈັດງານສະເຫລີມສະຫລອງວັນສາກົນ ເພື່ອຕໍ່ລົບລ້າງການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ, ລັດຖະບານແຫ່ງ ສປປ ລາວ ໂດຍສົມທົບກັບອົງການສະຫະປະຊາຊາດ ແລະ ບັນດາຄູ່ຮ່ວມງານ ໄດ້ມີການຈັດພິທີສ່ອງແສງສີໃສ່ປະຕູໄຊເປັນສີສົ້ມ ພ້ອມທັງເປີດບັ້ນຂະບວນການ 16 ວັນແຫ່ງການເຄື່ອນໄຫວ ເພື່ອຢຸດຕິການໃຊ້ຄວາມຮຸນແຮງຕໍ່ຄວາມຮຸນແຮງຕໍ່ແມ່ຍິງ ແລະ ເດັກຍິງ.

ການເຄື່ອນໄຫວກິດຈະກຳຄັ້ງນີ້ຈະດໍາເນີນການເປັນເວລາ 2 ອາທິດ, ໂດຍການມີສ່ວນຮ່ວມຈາກ 40 ຄູ່ຮ່ວມງານ, ເຊິ່ງໄດ້ຮັບການສະໜັບສະໜູນໂດຍ ອົງການສະຫະປະຊາຊາດ ກອງທຶນສໍາລັບປະຊາກອນ (UNFPA), ສະຫະພາບເອີຣົບ (EU) ແລະ ອົງການຮ່ວມມືສາກົນ ສ. ເກົາຫຼີ (KOICA), ເພື່ອແນໃສ່ການປູກຈິດສໍານຶກ ແລະ ຊຸກຍູ້ບັນດາການເຄື່ອນໄຫວຕ່າງໆ ເພື່ອປ້ອງກັນ ແລະ ລົບລ້າງຄວາມຮຸນແຮງຕໍ່ ແມ່ຍິງ ແລະ ເດັກຍິງ ຢູ່ໃນປະເທດລາວ. ຖ້າພົບເຫັນການໃຊ້ຄວາມຮຸນແຮງຕໍ່ ແມ່ຍິງ ແລະ ເດັກຍິງ ສາມາດຂໍຄວາມຊ່ວຍເຫລືອຈາກຕຳຫລວດ, ສູນປິ່ນປົວ ຫລື ສະຫະພັນແມ່ຍິງລາວ ແລະ ຂະແໜງການທີ່ກ່ຽວຂ້ອງ.

ພິທີສ່ອງແສງສີຍ້ອມປະຕູໄຊເປັນສີສົ້ມ ແມ່ນໄດ້ຈັດຂຶ້ນພາຍໃຕ້ ຫົວຂໍ້ “ກ້າວເຂົ້າສູ່ 30 ປີ ແຫ່ງຖະແຫລງການ ແລະ ແຜນປະຕິບັດງານປັກກິ່ງ: ຮ່ວມກັນ ເພື່ອຢຸດຕິການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ” ເຊິິ່ງໄດ້ມີການເຕົ້າໂຮມຜູ້ເຂົ້າຮ່ວມຈາກຫລາຍພາກສ່ວນ ທັງພາຍໃນ ແລະ ຕ່າງປະເທດ. ບັນດາຜູ້ເຂົ້າຮ່ວມ ໄດ້ນຸ່ງເສື້ອສີສົ້ມຢ່າງສາມັກຄີ, ເພື່ອເປັນການຮ່ວມແຮງຮ່ວມໃຈກັນ ຊຸກຍູ້ເຜີຍແຜ່ໂຄສະນາ ຂະບວນການດັ່ງກ່າວນີ້ ຈະດໍາເນີນໄປຈົນຮອດວັນທີ 10 ທັນວາ (ວັນສິດທິມະນຸດ).

ໃນພິທີດັ່ງກ່າວ, ໄດ້ມີການສາຍວີດີໂອການກ່າວຄຳປາໄສ ຂອງທ່ານນາຍົກລັດຖະມົນຕີແຫ່ງ ສປປ ລາວ, ພະນະທ່ານ ສອນໄຊ ສີພັນດອນ, ໃຫ້ແກ່ຜູ້ເຂົ້າຮ່ວມຮັບຊົມ ແລະ ຮັບຟັງ, ເຊິ່ງເປັນການຢືນຢັນຄືນເຖິງຄວາມມຸ່ງໝັ້ນ ຂອງລັດຖະບານລາວ ໃນການປ້ອງກັນ ແລະ ລົບລ້າງຄວາມຮຸນແຮງທຸກຮູບແບບ ບໍ່ວ່າຈະເປັນເພດໃດກໍຕາມ.

ໃນບົດຄໍາປາໄສ, ທ່ານນາຍົກລັດຖະມົນຕີ ໄດ້ກ່າວວ່າ “ທຸກໆປີ, ໃນໄລຍະ 16 ວັນແຫ່ງການເຄື່ອນໄຫວ, ພວກເຮົາມາຮ່ວມກັນຢືນຢັນຄືນ ຄວາມເປັນເຈົ້າການ, ການຊີ້ນໍາ-ນຳພາ, ການຮ່ວມມື ແລະ ການມີສ່ວນຮ່ວມໃນການຢຸດຕິການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ. ລັດຖະບານຂອງພວກເຮົາຍຶດໝັ້ນໃນຄຳໝັ້ນສັນຍາໃນການປະຕິບັດກົດໝາຍ ແລະ ນະໂຍບາຍ ທີ່ສົ່ງເສີມຄວາມສະເໝີພາບລະຫວ່າງຍິງ-ຊາຍ ແລະ ປົກປ້ອງສິດຂອງແມ່ຍິງ. ພວກເຮົາອຸທິດຕົນເພື່ອສ້າງຄວາມເຂັ້ມແຂງໃຫ້ແກ່ກົນໄກປ້ອງກັນ ແລະ ແກ້ໄຂຄວາມຮຸນແຮງ, ການຫັນປ່ຽນທັດສະນະຄະຕິທີ່ເປັນອັນຕະລາຍແລະ ຮັບປະກັນວ່າຜູ້ກະທຳຜິດ ຕ້ອງຮັບຜິດຊອບຕໍ່ການກະທໍາຂອງຕົນ ຕາມກົດໝາຍ. ໂດຍການຈັດສັນຊັບພະຍາກອນ ແລະ ການລົງທຶນໃນການລິເລີ່ມທີ່ສະໜັບສະໜູນຄວາມສະເໝີພາບລະຫວ່າງຍິງ-ຊາຍ, ພວກເຮົາກຳລັງປູທາງໄປສູ່ອະນາຄົດເພື່ອໃຫ້ແມ່ຍິງ ແລະ ເດັກຍິງທຸກຄົນ ສາມາດດຳລົງຊີວິດໄດ້ໂດຍບໍ່ມີຄວາມຢ້ານກົວ ແລະ ປາສະຈາກຄວາມຮຸນແຮງ.” ເຖິງເວລາແລ້ວທີ່ພວກເຮົາ ຕ້ອງສຸມໃສ່ລົງທຶນເພີ່ມຂຶ້ນ ເພື່ອປ້ອງກັນ ແລະ ຕອບໂຕ້ ຕໍ່ຄວາມຮຸນແຮງຕໍ່ແມ່ຍິງ ແລະ ເດັກຍິງ”.

ນອກຈາກນັ້ນກໍໄດ້ຮັບຟັງການປາໄສຈາກອົງການຈັດຕັ້ງສາກົນຕ່າງໆ ຮຽກຮ້ອງໃຫ້ຢຸດການໃຊ້ຄວາມຮຸນແຮງຕໍ່ແມ່ຍິງ ແລະ ເດັກຍິງ ໃຫ້ທຸຄົນ ຢືນຢັນຕໍ່ຕ້ານການໃຊ້ຄວາມຮຸນແຮງຕໍໍ່ແມ່ຍິງ ແລະ ເດັກຍິງ.

ຂະບວນການ 16 ວັນແຫ່ງການເຄື່ອນໄຫວ ແມ່ນເວທີທີ່ເຂັ້ມແຂງໃນການປູກຈິດສໍານຶກ, ຊຸກຍູ້ການສົນທະນາ ແລະ ຊຸກຍູ້ການເຄື່ອນໄຫວທີ່ມີໝາກຜົນເປັນຮູບຮ່າງ ເພື່ອລົບລ້າງຄວາມຮຸນແຮງຕໍ່ແມ່ຍິງ ແລະ ເດັກຍິງ ຂະບວນການດັ່ງກ່າວ ຍັງເປັນການຮຽກຮ້ອງໃຫ້ມີຄວາມສາມັກຄີ ແລະ ຮ່ວມແຮງຮ່ວມໃຈເຄື່ອນໄຫວນໍາກັນ, ໂດຍການເຮັດວຽກຮ່ວມກັນ ຢ່າງເອກະພາບປອງດອງ ເພື່ອສ້າງອະນາຄົດທີ່ມີຄວາມປອດໄພ, ຄວາມສະເໝີພາບ, ແລະ ກຽດສັກສີໃຫ້ແກ່ແມ່ຍິງ ແລະ ເດັກຍິງທຸກຄົນໃນ ສປປ ລາວ.