ລາວ-ຈີນ ເພື່ອນຮ່ວມຍຸດທະສາດຄວາມສຳພັນພົມວິຫານ 4
ໂດຍ: ກ້ອງສ່ອງ ອິດສະຫລະ
ເນື່ອງໃນໂອກາດການມາຢ້ຽມຢາມລັດຖະກິດຢູ່ລາວຂອງສະຫາຍເລຂາທິການໃຫຍ່ ຄະນະກຳມະການສູນກາງພັກກອມມູນິດຈີນ, ປະທານປະເທດແຫ່ງ ສາທາລະນະລັດ ປະຊາຊົນຈີນ ສີ ຈິ້ນຜິງ ນັບວ່າເປັນເຫດການທາງປະຫວັດສາດອັນສຳຄັນຍິ່ງຕໍ່ຊາດລາວ ແລະ ປະຊາຊົນລາວ. ການມາຢ້ຽມຢາມຄັ້ງນີ້ ນອກຈາກນຳເອົາຄວາມຮັກໄຄ່, ຄວາມສຳພັນໄມຕີ, ຄວາມສາມັກຄີຮັກແພງມາສູ່ປະຊາຊົນລາວແລ້ວ, ເພິ່ນຍັງໄດ້ນຳເອົາການຊ່ວຍເຫລືອສະໜັບສະໜູນແກ່ປະເທດເຮົາຢ່າງມາກມາຍມະຫາສານ. ສິ່ງທີ່ໄດ້ສະແດງອອກໃຫ້ເຫັນຢ່າງຈະແຈ້ງນັ້ນ ກໍຄືຜູ້ນຳສູງສຸດຂອງສອງປະເທດ ລາວ-ຈີນ ໄດ້ຮ່ວມກັນເປັນສັກຂີພິຍານໃນການລົງນາມບັນດາເອກະສານການຮ່ວມມືຈຳນວນ 17 ສະບັບ ໄດ້ແກ່ 1. ສັນຍາຮ່ວມມືລະຫວ່າງກະຊວງຕ່າງປະເທດ ລາວ-ຈີນ ກ່ຽວກັບການເພີ່ມທະວີການຮ່ວມມືໃນສະພາບການໃໝ່, 2. ບົດບັນທຶກຄວາມເຂົ້າໃຈວ່າດ້ວຍການຮ່ວມກັນກໍ່ສ້າງແລວທາງເສດຖະກິດ ລາວ-ຈີນ, 3. ບົດບັນທຶກຄວາມເຂົ້າໃຈວ່າດ້ວຍການເພີ່ມທະວີການພັດທະນາເສັ້ນທາງສາຍໄໝດີຈີຕອນຂໍ້ມູນຂ່າວສານ ເພື່ອຊຸກຍູ້ການເຊື່ອມຈອດຂໍ້ມູນຂ່າວສານ, 4. ສັນຍາວ່າດ້ວຍການຮ່ວມມືວິທະຍາສາດ ແລະ ເຕັກໂນໂລຊີ, 5. ບົດບັນທຶກຄວາມເຂົ້າໃຈວ່າດ້ວຍການຈັດຕັ້ງປະຕິບັດຮ່ວມໂຄງການໂຕແບບໃນການສ້າງສູນຂໍ້ມູນຂ່າວສານຊັບພະຍາກອນນ້ຳແຫ່ງຊາດ ແລະ ການສ້າງແຜນແມ່ບົດການຄຸ້ມຄອງອ່າງຮັບນ້ຳອູ ແລະ ນ້ຳເທີນ, ນ້ຳກະດິງ, 6. ບົດບັນທຶກຄວາມເຂົ້າໃຈວ່າດ້ວຍການຮ່ວມກັນຊຸກຍູ້ສ້າງເຂດຕົວແບບພັດທະນາກະສິກຳຄົບວົງຈອນທີ່ທັນສະໄໝ, 7. ບົດບັນທຶກຄວາມເຂົ້າໃຈກ່ຽວກັບການເພີ່ມທະວີການຮ່ວມມືໃນຂົງເຂດພື້ນຖານໂຄງລ່າງ, 8. ບົດບັນທຶກຄວາມເຂົ້າໃຈວ່າດ້ວຍການຮ່ວມມືດ້ານການຊ່ວຍເຫລືອໃນ 3 ປີຕໍ່ໜ້າ, 9. ບົດບັນທຶກຄວາມເຂົ້າໃຈວ່າດ້ວຍການຮ່ວມມືການພັດທະນາຊັບພະຍາກອນມະນຸດ, 10. ສານແລກປ່ຽນວ່າດ້ວຍຝ່າຍຈີນເຫັນດີກຳນົດເອົາໂຄງການປັບປຸງ ແລະ ຍົກລະດັບລະບົບ ICT ຂອງກະຊວງອຸດສາຫະກຳ ແລະ ການຄ້າ ສປປ ລາວ, 11. ສັນຍາຕອບສະໜອງເງິນກູ້ພິເສດໃຫ້ແກ່ ສປປ ລາວ ເພື່ອຈັດຕັ້ງປະຕິບັດໂຄງການເຂື່ອນໄຟຟ້າຫ້ວຍປາຫລາຍ, 12. ບົດບັນທຶກຄວາມເຂົ້າໃຈການສ້າງຄູ່ຮ່ວມມືດ້ານຍຸດທະສາດດ້ານການຮ່ວມມືໄຟຟ້າ, 13. ບົດບັນທຶກຄວາມເຂົ້າໃຈວ່າດ້ວຍການຮ່ວມມືທາງດ້ານການເງິນ ເພື່ອສົ່ງເສີມວິສາຫະກິດຂະໜາດນ້ອຍ ແລະ ກາງໃນ ສປປ ລາວ, 14. ສັນຍາເງິນກູ້ພິເສດດອກເບ້ຍຕໍ່າໂຄງການເຂື່ອນໄຟຟ້າຫ້ວຍປາຫລາຍ; 15. ສັນຍາເງິນກູ້ທຸລະກິດໂຄງການສາຍສົ່ງ 115 ກິໂລໂວນ (ຊຽງຮ່ອນ-ຫົງສາ), 16. ສັນຍາຮ່ວມທຶນໂຄງການກໍ່ສ້າງທາງດ່ວນນະຄອນຫລວງວຽງຈັນຫາບໍ່ເຕັນຕອນທີໜຶ່ງ ນະຄອນຫລວງວຽງຈັນຫາວັງວຽງ, 17. ສັນຍາເງິນກູ້ທຸລະກິດໂຄງການສາຍສົ່ງ 500/230 KV ອ້ອມນະຄອນຫລວງວຽງຈັນ. ໃນບັນດາ 17 ເອກະສານທີ່ໄດ້ລົງນາມຮ່ວມກັນນີ້ ມີບາງໂຄງການກໍໄດ້ບັນລຸສັນຍາຮ່ວມກັນແລ້ວ ເປັນຕົ້ນການຊ່ວຍເຫລືອ ສປປ ລາວ 4 ຕື້ຢວນ ໃນໄລຍະ 3 ປີຕໍ່ໜ້າ, ສັນຍາຮ່ວມທຶນສ້າງທາງດ່ວນນະຄອນຫລວງວຽງຈັນຫາບໍ່ເຕັນຕອນທີໜຶ່ງ (ວຽງຈັນ-ວັງວຽງ), ໂຄງການສ້າງໂຮງໝໍມະໂຫສົດຫລັງໃໝ່ ພ້ອມທັງໃຫ້ການຊ່ວຍເຫລືອປັບປຸງຊີວິດການເປັນຢູ່ຂອງປະຊາຊົນລາວໃນ 8 ໂຄງການໃໝ່ ແລະ ຍັງໄດ້ເຊື້ອເຊີນທ່ານ ບຸນຍັງ ວໍລະຈິດ ປະທານປະເທດລາວ ໄປຢ້ຽມຢາມ ສປ ຈີນ ໃນເວລາອັນເໝາະສົມໃນປີໜ້າ. ນີ້ລະຄືສິ່ງຢັ້ງຢືນເຖິງຄວາມຮັກ, ຄວາມສາມັກຄີແບບຈິງຈັງຈິງໃຈຂອງເພື່ອນຮ່ວມຍຸດທະສາດຮອບດ້ານຕາມ 4 ທິດແຫ່ງຄວາມສຳພັນສະໄໝໃໝ່ ຫລື ຖ້າຈະເວົ້າໃນຫລັກສິນທຳກໍແມ່ນຕາມພົມວິຫານ 4 ໄດ້ແກ່: ເປັນບ້ານໃກ້ເຮືອນຄຽງທີ່ດີ, ເປັນເພື່ອນມິດທີ່ດີ, ເປັນສະຫາຍທີ່ດີ ແລະ ເປັນຄູ່ຮ່ວມມືທີ່ດີ. ສ່ວນພົມວິຫານ 4 ກໍມີ ເມດຕາ, ກະລຸນາ, ມຸທິຕາ ແລະ ອຸເປກຂາ. ເປັນຍຸກ “ມັງກອນເຫາະເຫີນຟ້າ ໃນຜືນແຜ່ນໂລກາ, ນາຄາທະລຸທະເລຫລວງມະຫານະທີກະແສກວ້າງ ພ້ອມກັນມາປະສານສ້າງເມືອງລາວໃຫ້ເຮືອງຮຸ່ງ ຝູງພໍ່ລຸງແມ່ປ້າພາຍໜ້າໃຫ້ເບິ່ງເອົາ” ວ່ານາ.
