ໂກລົມບີຈັບຂະບວນການຄ້າຢາລະດັບໂລກ ໃຊ້ເຮືອດໍານໍ້າສຸດລໍ້າສະໄໝຂົນໂຄເຄນຂ້າມທະວີບ

     ເຈົ້າໜ້າທີ່ຈາກຫລາຍສິບປະເທດນໍາກໍາລັງຢຶດໂຄເຄນ 225 ເມດຣິກຕັນ ຈາກປະຕິບັດການຄັ້ງໃຫຍ່ໃຊ້ເວລາ 6 ອາທິດ ເຊິ່ງເຮັດໃຫ້ຄົ້ນພົບເສັ້ນທາງລັກລອບຂົນຢາເສບຕິດໃນມະຫາສະໝຸດປາຊີຟິກ ຈາກອາເມລິກາໃຕ້ໄປອົດສະຕຣາລີ.

      ກອງທັບເຮືອໂກລົມບີອອກຖະແຫລງການວ່າ: ປະຕິບັດການໂອໄຣອັນຄັ້ງຫລ້າສຸດ ສາມາດຢຶດຢາເສບຕິດໄດ້ຫລາຍກວ່າ 1,400 ຕັນ ເຊິ່ງລວມທັງໂຄເຄນ 225 ຕັນ ແລະ ກັນຊາ 128 ຕັນ.

      ລະຫວ່າງເດືອນຕຸລາ-ພະຈິກນີ້ ມີຜູ້ຖືກຈັບຫລາຍກວ່າ 400 ຄົນ ພາຍໃຕ້ປະຕິບັດການທີ່ປະສານການຮ່ວມມືລະຫວ່າງເຈົ້າໜ້າທີ່ຈາກອາເມລິກາ, ເບຣຊິນ, ແອັສປາຍ, ໂຮນລັງ ແລະ ປະເທດອື່ນໆອີກຫລາຍປະເທດ ລວມທັງອົງກອນສາກົນຫລາຍແຫ່ງ.

     ນອກຈາກນັ້ນ ເຈົ້າໜ້າທີ່ໄດ້ຢຶດເຮືອດໍານໍ້າທີ່ຜະລິດຈາກໄມ້ ແລະ ໄຟເບີກລາສ ເຊິ່ງບັນທຸກໂຄເຄນ 5 ຕັນ ທີ່ກໍາລັງເດີນທາງຈາກໂກລົມບີໄປອົດສະຕຣາລີ.

     ເຈົ້າໜ້າທີ່ຄົ້ນພົບເສັ້ນທາງຂົນຢາເສບຕິດຂອງເຮືອດໍານໍ້າຍຸກໃໝ່ ເຊິ່ງສາມາດເດີນທາງໄດ້ໄກປະມານ 16,093 ກິໂລແມັດ ໂດຍບໍ່ຕ້ອງໃສ່ນໍ້າມັນ.

     ໂຄເຄນ 1 ກິໂລຢູ່ອົດສະຕຣາລີ ມີລາຄາສູງເຖິງ 240,000 ໂດລາສະຫະລັດ ເຊິ່ງແພງກວ່າລາຄາຢູ່ອາເມລິກາ 6 ເທົ່າ ສົ່ງຜົນເຮັດໃຫ້ເສັ້ນທາງນີ້ສ້າງກໍາໄລໄດ້ເພີ່ມຂຶ້ນຢ່າງຕໍ່ເນື່ອງ ເພາະລາຄາຂອງສິນຄ້າໃນຕະຫລາດອົດສະຕຣາລີມີມູນຄ່າສູງ.

      ຂະນະດຽວກັນ, ເຮືອດໍານໍ້າຂອງກຸ່ມຄ້າຢາມີຄວາມສັບຊ້ອນຂຶ້ນເລື້ອຍໆ ແລະ ມີໂຄງສ້າງທາງວິສະວະກໍາທີ່ປານີດເພີ່ມຂຶ້ນ.

     ປັດຈຸບັນ, ການລໍາລຽງຢາເສບຕິດຜ່ານເສັ້ນທາງສາຍນີ້ ຖືເປັນການລວມຕົວຂອງຂະບວນການຄ້າຢາຈາກແມັກຊິກ, ເບຣຊິນ, ໂກລົມບີ, ເອກົວດໍ ແລະ ເປຣູ ລວມທັງກຸ່ມຈາກເອີຣົບ ແລະ ໂອຊີນີ.