ສູນກາງແນວລາວສ້າງຊາດ ສະເໜີໃຫ້ສະພາແຫ່ງຊາດເອົາໃຈໃສ່ຕິດຕາມກວດກາ ແກ້ໄຂແຕ່ລະບັນຫາ

ທ່ານ ຄໍາໄຫຼ ສີປະເສີດ ກຳມະການສູນກາງພັກ ຮອງປະທານຜູ້ປະຈໍາການ ສູນກາງແນວລາວສ້າງຊາດ (ສນຊ) ໄດ້ປະກອບຄຳເຫັນຕໍ່ບົດລາຍງານການຈັດຕັ້ງປະຕິບັດແຜນການເຄື່ອນໄຫວຂອງສະພາແຫ່ງຊາດ ໃນກອງປະຊຸມສະໄໝສາມັນ ເທື່ອທີ 8 ຂອງສະພາແຫ່ງຊາດ ຊຸດທີ IX  ວັນທີ 29 ພະຈິກ 2024 ນີ້ວ່າ:

ກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານປະຈໍາປີ 2024 ຂອງສະພາແຫ່ງຊາດ. ກ່ອນອື່ນໝົດ ໃນນາມຄະນະປະຈຳ ສູນກາງແນວລາວສ້າງຊາດ, ສະຫະພັນນັກຮົບເກົ່າແຫ່ງຊາດລາວ ແລະ ອົງການຈັດຕັ້ງມະຫາຊົນຂັ້ນສູນກາງ ສະແດງຄວາມເຫັນດີ, ຊົມເຊີຍ ແລະ ສະໜັບສະໜູນ ຕໍ່ເນື້ອໃນບົດລາຍງານກ່ຽວກັບການຈັດຕັ້ງປະຕິບັດແຜນການເຄື່ອນໄຫວວຽກງານ ປີ 2024 ຂອງສະພາແຫ່ງຊາດ ແລະ ຄຽງຄູ່ກັບຜົນງານທີ່ຍາດມາໄດ້ ອົງການພວກເຮົາທັງສັງເກດເຫັນວ່າສະພາແຫ່ງຊາດ ແລະ ສະມາຊິກສະພາ ຄວນສືບຕໍ່ ເອົາໃຈໃສ່ຕິດຕາມກວດກາ ແກ້ໄຂແຕ່ລະບັນຫາຕື່ມດັ່ງນີ້: ການໂຄສະນາເຜີຍແຜ່ກົດໝາຍ ທີ່ຖືກຮັບຮອງແລ້ວ ຂອງບັນດາຂະແໜງການທີ່ກ່ຽວຂ້ອງບໍ່ທັນກວ້າງຂວາງ ທົ່ວເຖິງທຸກເປົ້າໝາຍໃນສັງຄົມ ໂດຍສະເພາະເຂດຫ່າງສອກຫຼີກ, ເຂດຊົນເຜົ່າ, ເຮັດໃຫ້ສະຕິເຄົາລົບປະຕິບັດກົດໝາຍຍັງບໍ່ທັນສູງ ແລະ ການເຂົ້າຮ່ວມຂະບວນການບໍ່ທັນຟົດຟື້ນແທ້. ການຈັດຕັ້ງປະຕິບັດວາລະແຫ່ງຊາດ ວ່າດ້ວຍການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ ເຖິງວ່າລັດຖະບານໄດ້ວາງຫຼາຍມາດຕະການ ເຮັດໃຫ້ຄ່າເງິນກີບແຂງຄ່າຂຶ້ນ ທຽບກັບເງິນຕາຕ່າງປະເທດ ແຕ່ໃນສະພາບຄວາມເປັນຈິງລາຄາສິນຄ້າຍັງສູງ ສົ່ງຜົນກະທົບຕໍ່ຊີວິດການເປັນຢູ່ຂອງພະນັກງານ-ລັດຖະກອນທີ່ມີລາຍໄດ້ຕໍ່າ ແລະ ດ້ານຢາເສບຕິດຍັງບໍ່ທັນຫັນເປັນຄວາມຮັບຜິດຊອບຂອງສັງຄົມ ແລະ ປະຊາຊົນ. ຄຸ້ມຄອງໂຄງການຂຸດຄົ້ນບໍ່ແຮ່ ເຊັ່ນ: ການປະຕິບັດສັນຍາສຳປະທານໃຫ້ເຂັ້ມງວດກວ່າເກົ່າ, ການລາຍງານຂໍ້ມູນການຂຸດຄົ້ນແຮ່ໃຫ້ຊັດເຈນ, ຊຸກຍູ້ໃຫ້ມີການລົງທຶນປຸງແຕ່ງກ່ອນການສົ່ງອອກ, ການຄວບຄຸມນໍ້າໜັກລົດບັນທຸກແຮ່ ທີ່ສ້າງຄວາມເສຍຫາຍໃຫ້ແກ່ເສັ້ນທາງຄົມມະນາຄົມ. ກວດກາຄືນການປະສານສົມທົບ ລະຫວ່າງ ພາກສ່ວນທີ່ກ່ຽວຂ້ອງ ຂັ້ນສູນກາງ ແລະ ທ້ອງຖິ່ນ ກ່ຽວກັບການລົງທຶນດ້ານກະສິກຳ ຕ້ອງຮັບປະກັນເຮັດໃຫ້ປະຊາຊົນມີສ່ວນຮ່ວມ ເພື່ອສະກັດກັ້ນການບຸກລຸກປ່າສະຫງວນ. ສະເໜີຄະນະສະມາຊິກສະພາແຫ່ງຊາດ ວາງແຜນ ລົງພົບປະຜູ້ມີສິດເລືອກຕັ້ງໃຫ້ທົ່ວເຖິງ ໂດຍສະເພາະເຂດຫ່າງໄກສອກຫຼີກ, ຊົນເຜົ່າ, ເຂດຊາຍແດນ, ໃນນັ້ນ ຄວນປະສານສົມທົບອົງການປົກຄອງທ້ອງຖິນ, ແນວລາວສ້າງຊາດ, ສະຫະພັນນັກຮົບເກົ່າ, ອົງການຈັດຕັ້ງມະຫາຊົນ ເພື່ອຊ່ວຍຮຽກໂຮມປະຊາຊົນ ເຂົ້າຮ່ວມຮັບຟັງການເຜີຍແຜ່ຜົນສຳເລັດຂອງກອງປະຊຸມສະພາແຫ່ງຊາດ ແລະ ສະພາປະຊາຊົນຂັ້ນແຂວງແຕ່ລະເທື່ອ. ການເຂົ້າຮ່ວມກອງປະຊຸມສະພາຂອງສະມາຊິກສະພາແຫ່ງຊາດ ແມ່ນມີຄວາມຕັ້ງໜ້າສູງ ແຕ່ການປະກອບຄວາມເຫັນ ແລະ ຊັກຖາມບັນຫາຕ່າງໆ ຂອງສະມາຊິກສະພາຈາກແຕ່ລະເຂດເລືອກຕັ້ງຍັງບໍ່ທົ່ວເຖິງ (ບາງທ່ານມີການປະກອບຄວາມເຫັນຫຼາຍຄັ້ງ ແລະ ບາງທ່ານບໍ່ມີການປະກອບຄວາມເຫັນ).

ສຳລັບຂໍ້ສັງເກດ ຕໍ່ແຜນການເຄື່ອນໄຫວ ປະຈໍາປີ 2025 ຂອງສະພາແຫ່ງຊາດ. ຂໍມີຄຳເຫັນ ສະເໜີສະພາແຫ່ງຊາດ ເອົາໃຈໃສ່ຍົກສູງຄຸນນະພາບການຕິດຕາມ ກວດກາ ແລະ ແກ້ໄຂບາງບັນຫາ ດັ່ງນີ້:

ຕໍ່ປະເດັ່ນການແກ້ໄຂຄວາມຫຍຸ້ງຍາກທາງດ້ານເສດຖະກິດ-ການເງິນ-ເງິນຕາ: ສະເໜີເພີ່ມທະວີຄວາມເຂັ້ມງວດ ແລະ ນໍາໃຊ້ເຄື່ອງມືທັນສະໄໝໃນການຈັດເກັບລາຍຮັບ-ຄຸ້ມຄອງລາຍຈ່າຍໃຫ້ມີບາດກ້າວດີຂຶ້ນ.

ຕິດຕາມກວດກາວຽກງານການສຶກສາ ຂອງພາກລັດ ແລະ ເອກະຊົນ ໄປຕາມທິດຫັນສູ່ດ້ານຄຸນນະພາບການຮຽນ-ການສອນ ແລະ ການຝຶກອົບຮົມຄູທາງດ້ານວິຊາການ ແລະ ດ້ານການເມືອງ, ຍູ້ແຮງວຽກງານຊ່ວຍໜູນ, ນະໂຍບາຍຕໍ່ຖັນແຖວຄູ-ອາຈານໃນເວລາທີ່ຫຍຸ້ງຍາກໃຫ້ດີກວ່າເກົ່າ.

ຕິດຕາມກວດກາໃຫ້ເຂັ້ມແຂງຕື່ມຕໍ່ການຍົກສູງຄຸນນະພາບການບໍລິການສາທາລະນະສຸກ ຕິດພັນກັບຈັນຍາບັນ, ຈັນຍາທຳ ແລະ ນ້ຳໃຈຮັບໃຊ້ປະຊາຊົນ ຂອງແພດໝໍ, ຮັບປະກັນການປິ່ນປົວບໍ່ພຽງແຕ່ປະຊາຊົນລາວ ຫາກຍັງຕ້ອງຮັບຮອງນັກທ່ອງທ່ຽວຕ່າງປະເທດຕື່ມ ແລະ ກ່ຽວກັບຄໍາສະເໜີ ແລະ ສຽງສະທ້ອນສັງຄົມ ຕໍ່ສະພາແຫ່ງຊາດ ແລະ ສະມາຊິກສະພາແຫ່ງຊາດ.

ຜ່ານການລົງພົບປະເກັບກຳຄຳເຫັນ, ຄຳສະເໜີ ຂອງປະຊາຊົນ ຢູ່ທ້ອງຖິ່ນຮາກຖານໃນຂອບເຂດທົ່ວປະເທດ ຈຶ່ງໄດ້ນຳເອົາຂໍ້ສະເໜີ ດັ່ງກ່າວມາລາຍງານຕໍ່ກອງປະຊຸມ ດັ່ງນີ້:

ຕິດຕາມກວດກາ ແກ້ໄຂ ແລະ ຊຸກຍູ້ພາກສ່ວນກ່ຽວຂ້ອງ ຄຸ້ມຄອງສື່ສັງຄົມອອນລາຍ ໃນການໂຄສະນາສິນຄ້າເກີນຄວາມເປັນຈິງເຮັດໃຫ້ຜູ້ບໍລິໂພກອັບປະໂຫຍດ, ກຸ່ມແກ້ງຕົວະຍົວະຫຼອກລວງຜ່ານອິນເຕີເນັດ ເຮັດໃຫ້ສັງຄົມບໍ່ມີຄວາມສະຫງົບ, ເຂັ້ມງວດໃນການຄຸ້ມຄອງ ລົດຂົນສົ່ງ, ລົດບັນທຸກໜັກ, ລົດບຸກຄົນ ຂອງຕ່າງປະເທດ ທີ່ເຂົ້າມາເຄື່ອນໄຫວໃນ ສປປ ລາວ.

ຕິດຕາມກວດກາ ແກ້ໄຂ ແລະ ຊຸກຍູ້ ພາກສ່ວນທີ່ກ່ຽວຂ້ອງ ໃນການປະຕິບັດກົດໝາຍວ່າດ້ວຍຄອບຄົວ ກ່ຽວກັບການແຕ່ງງານທີ່ບໍ່ຖືກຕ້ອງ, ມີປະກົດການຕົວະຍົວະຫຼອກລວງ ແລະ ແອບແຝງການຄ້າມະນຸດ.

ຕິດຕາມ ກວດກາ ແກ້ໄຂ ແລະ ຊຸກຍູ້ ພາກສ່ວນກ່ຽວຂ້ອງ ຕໍ່ກັບການພິຈາລະນາພິພາກສາ, ການຕັດສິນຄະດີຂອງສານປະຊາຊົນແຕ່ລະຂັ້ນ ມີບາງກໍລະນີບໍ່ມີຄວາມຍຸຕິທຳ, ບໍ່ມີຄວາມໂປງໃສ່, ບໍ່ມີຈັນຍາບັນ ແລະ ຈັນຍາທໍາ ເຮັດໃຫ້ປະຊາຊົນຂາດຄວາມເຊື່ອໝັ້ນຕໍ່ຂະບວນການຍຸຕິທໍາຂອງລັດ.

ຕິດຕາມກວດກາ ແກ້ໄຂງົບປະມານທີ່ລັດຖະບານວາງໃຫ້ໄປຊຸກຍູ້ສົ່ງເສີມການຜະລິດທຸລະກິດຂະໜາດກາງ, ຂະໜາດນ້ອຍ ແລະ ຈຸນລະວິສະຫະກິດ.

ຕິດຕາມກວດກາ ແກ້ໄຂ ແລະ ຊຸກຍູ້ຂະແໜງການກ່ຽວຂ້ອງ ປັບປຸງລະບົບໝໍ້ສົ່ງໄຟຟ້າ ໃຫ້ມັນສະຖຽນ ແລະ ໂຄງສ້າງລາຄາໄຟຟ້າ ໃນຂົງເຂດກະສິກຳ, ອຸດສະຫະກຳ ແລະ ຫັດຖະກຳ.

ທີ່ມາ: ປະຊາຊົນ