ປະກາດເລື່ອງຊັ້ນຕຳຫລວດມີຜົນງານ ແລະ ລົງວິໄນຕຳຫລວດທີ່ພົວພັນມົ້ວສຸມ, ຄ້າຂາຍສິ່ງເສບຕິດ ນໍ້າກະທ່ອມ
ວັນທີ 4 ທັນວາ 2024, ວິທະຍາຄານຕໍາຫຼວດປະຊາຊົນ (ວຕປ) ໄດ້ປະກາດເລື່ອນຊັ້ນ, ສັບຊ້ອນບ່ອນປະຈຳການໃຫ້ນາຍ ແລະ ພົນຕໍາຫຼວດ, ປະດັບຊັ້ນໂດຍ ພົຈວ ໂອໃດ ທິລັນດາ ຫົວໜ້າອໍານວຍການ ວຕປ ແລະ ພາກສ່ວນທີ່ກ່ຽວຂ້ອງ ເຂົ້າຮ່ວມ
ພັທ ອ້ວນ ອິນທະມະລີ ຮອງຫົວໜ້າຫ້ອງການເມືອງ ໄດ້ຜ່ານຂໍ້ຕົກລົງວ່າດ້ວຍການເລື່ອນຊັ້ນໃຫ້ນາຍ ແລະ ພົນຕໍາຫຼວດໃນນີ້: ເລື່ອນຊັ້ນ ສິບໂທຂຶ້ນຊັ້ນສິບເອກ 11 ສະຫາຍ ຍິງ 4 ສະຫາຍ, ວາທີຮ້ອຍຕີຂຶ້ນ ຮ້ອຍຕີ 6 ສະຫາຍ, ຮ້ອຍຕີ ຂຶ້ນ ຮ້ອຍໂທ 17 ສະຫາຍ ຍິງ 5 ສະຫາຍ, ຮ້ອຍໂທ ຂຶ້ນຮ້ອຍເອກ 6 ສະຫາຍ, ຮ້ອຍເອກ ຂຶ້ນຊັ້ນ ພັນຕີ 10 ສະຫາຍ, ພັນຕີ ຂຶ້ນ ພັນໂທ 4 ສະຫາຍ ແລະ ສັບຊ້ອນນາຍຕໍາຫຼວດຈໍານວນ 6 ສະຫາຍ ຍິງ 3 ສະຫາຍ ໃຫ້ບັນດາຫ້ອງ, ສູນ, ຄະນະວິຊາ.
ໂອກາດດຽວກັນນີ້, ກໍໄດ້ຜ່ານຂໍ້ຕົກລົງວ່າດ້ວຍການປະຕິບັດວິໄນຕໍ່ ສທ ກິ່ງຕັ້ນ ຮັ່ງມະນີສາງ ອາຍຸ 23 ປີ, ໜ້າທີ່ຮັບຜິດຊອບ ປ້ອງກັນ ສັງກັດຢູ່ຫ້ອງຄຸ້ມຄອງນັກສຶກສາ ທີ່ຂຶ້ນກັບ ວຕປ ອອກຈາກກໍາລັງປ້ອງກັນຄວາມສະຫງົບໂດຍບໍ່ໄດ້ຮັບນະໂຍບາຍໃດໆ ເນື່ອງຈາກວ່າຜູ້ກ່ຽວໄດ້ພົວພັນມົ່ວສຸມ, ຄ້າຂາຍສິ່ງເສບຕິດ (ນໍ້າກະທ່ອມ) ເຊິ່ງເປັນການກະທໍາຜິດຕໍ່ກົດໝາຍວ່າດ້ວຍກໍາລັງປ້ອງກັນຄວາມສະຫງົບພາກທີ V ມາດຕາ 39 ຂໍ້ 1, ລະເມີດຂໍ້ຫ້າມຕໍ່ນາຍ ແລະ ພົນຕໍາຫຼວດ ມາດຕາ 4 ຂໍ້ 2 ແລະ ລະເມີດຄໍ່າສັ່ງຂອງທ່ານຫົວໜ້າອົງການໄອຍະການປະຊາຊົນສູງສຸດ ເລກທີ 006/ອອປສ.
ທີ່ມາ: ຄວາມສະຫງົບ
