ສະຖິຕິຫລ້າສຸດ ຄົນລາວສູບຢາຫຼາຍກວ່າ 800,000 ຄົນ, ເສຍຊີວິດຍ້ອນພະຍາດທີ່ເກີດຈາກຢາສູບປະມານ 6,700 ຄົນ ຫຼື 18 ຄົນຕໍ່ມື້ ຄ່າ​ໃຊ້​ຈ່າຍປິ່ນປົວຫຼາຍກວ່າ 3.6 ພັນຕື້ກີບຕໍ່ປີ

ສະມາພັນຄວບຄຸມຢາສູບອາຊຽນ (SEATCA) ຮຽກຮ້ອງໃຫ້ບໍລິສັດຢາສູບໃນ ສປປ ລາວ ທີ່ຍັງບໍ່ປະຕິບັດຕາມ ຂໍ້ຕົກລົງ ກ່ຽວກັບຄຳເຕືອນສຸຂະພາບທີ່ເປັນຮູບພາບແບບໃໝ່ ເຖິງວ່າລັດຖະບານຈະໃຫ້ເວລາແກ່ບໍລິສັດ 6 ເດືອນແລ້ວກໍຕາມ
ມາຮອດ ວັນທີ 5 ທັນວານີ້, ຜະລິດຕະພັນຢາສູບທັງຫມົດໃນ ສປປ ລາວ ຕ້ອງປະຕິບັດຕາມ ຂໍ້ຕົກລົງວ່າດ້ວຍ ການບັນຈຸ, ການຫຸ້ມຫໍ່, ການພິມຄຳເຕືອນສຸຂະພາບ ແລະ ສະຫຼາກ ຜະລິດຕະພັນຢາສູບ ແບບອຸດສາຫະກຳ ຮູບແບບໃໝ່ ທີ່ມີຂະໜາດ 75%, ແຕ່ຜ່ານການຕິດຕາມ ກວດກາ ໃນ 2-3 ມື້ຜ່ານມາ, ເຫັນວ່າຊອງຢາສູບ ທີ່ຂາຍຢູ່ຕາມຮ້ານຄ້າ ຂາຍສົ່ງ ແລະ ຂາຍຍ່ອຍ ບໍ່ໄດ້ປະຕິບັດຕາມຕາມຂໍ້ຕົກລົງໃຫມ່ແຕ່ຢ່າງໃດ !
ຮູບຊ້າຍ: ແມ່ນຊອງຢາສູບທີ່ບໍ່ໄດ້ປະຕິບັດຕາມຂໍ້ຕົກລົງ ແຕ່ຍັງສືບຕໍ່ຂາຍຢູ່ໃນ ສປປ ລາວ ເຖິງແມ່ນວ່າ ຈະມີຜົນບັງຄັບໃຊ້ໄປແລ້ວກໍຕາມ ຕັ້ງແຕ່ວັນທີ 5 ທັນວາຜ່ານມາ.
ຮູບຂວາ: ແມ່ນຕົວຢ່າງ ຊອງຢາສູບແບບໃໝ່ ທີ່ຊອງຕ້ອງເປັນສີນໍ້າຕານ ເປັນສີຈືດໆ ພ້ອມຮູບພາບຄຳເຕືອນຂະໜາດ 75%.
ບໍລິສັດຢາສູບລາວຈຳກັດ ແມ່ນບໍລິສັດຮ່ວມທຶນລະຫວ່າງ ບໍລິສັດ ອິມພີຣຽວ ແລະ ລັດຖະບານແຫ່ງ ສປປ ລາວ ທີ່ກວມເຖິງ 80% ຂອງຕະຫຼາດຢາສູບໃນລາວ. ປະເທດອັງກິດ ໄດ້ອອກລະບຽບການກ່ຽວກັບຄໍາເຕືອນສຸຂະພາບເປັນຮູບພາບທີ່ບໍ່ມີການໂຄສະນາຜ່ານຊອງ ແບບດຽວກັບ ສປປ ລາວ ແຕ່ປີ 2016 ແລະ ບໍລິສັດຢາສູບອິມພີຣຽວ ໃນປະເທດອັງກິດ ໄດ້ປະຕິບັດຕາມນິຕິກໍານີ້ຢ່າງເຄັ່ງຄັດ ຕັ້ງແຕ່ 2016 ເປັນຕົ້ນມາ.
ສປປ ລາວ ກຳລັງປະເຊີນກັບພາລະອັນໜັກໜ່ວງທີ່ເກີດຈາກຢາສູບ, ທົ່ວປະເທດມີຜູ້ສູບຢາຫຼາຍກວ່າ 800,000 ຄົນ, ແຕ່ລະປີຄົນລາວ ເສຍຊີວິດຍ້ອນພະຍາດທີ່ເກີດຈາກຢາສູບ 6,700 ຄົນ ຫຼື 18 ຄົນຕໍ່ມື້ ແລະ ຍັງມີພາລະຄ່າ​ໃຊ້​ຈ່າຍໃນການປິ່ນປົວພະຍາດ​​ທີ່​ເກີດ​ມາຈາກ​​ຢາ​ສູບ ຊຶ່ງນໍາຄວາມສູນເສຍມາສູ່ເສດຖະກິດຂອງ ສປປ ລາວ ຫຼາຍກວ່າ 3.6 ພັນຕື້ກີບຕໍ່ປີ.
ຄໍາເຕືອນສຸຂະພາບເປັນຮູບພາບທີ່ບໍ່ມີການໂຄສະນາຜ່ານຊອງ ແລະ ຕຸດຢາສູບ (Standardized tobacco packaging) ເປັນມາດຕະການສໍາຄັນຂອງການຄວບຄຸມຢາສູບ ທີ່ຫຼຸດຜ່ອນ ການໂຄສະນາ ແລະ ການດຶງດູດ ຂອງຜະລິດຕະພັນຢາສູບຢ່າງມີປະສິດທິຜົນ ແລະ ສາມາດປ້ອງກັນ ການລິເລີ່ມສູບຢາຂອງເດັກນ້ອຍ ພ້ອມນັ້ນ, ຍັງຊ່ວຍຊຸກຍູ້ໃຫ້ຜູ້ສູບຢາ ອອກຢາສູບໄດ້. ມາດຕະການນີ້, ຈະເສີມຂະຫຍາຍປະສິດທິພາບຂອງຮູບພາບ ຄຳເຕືອນສຸຂະພາບທີ່ຊອງ ແລະ ຕຸດຢາສູບ.
ຄໍາເຕືອນສຸຂະພາບເປັນຮູບພາບທີ່ບໍ່ມີການໂຄສະນາຜ່ານຊອງ ແລະ ຕຸດຢາສູບ ແມ່ນບົດຮຽນທີ່ດີເລີດ ພາຍໃຕ້ ສົນທິສັນຍາ ດ້ານສາທາລະນະສຸກໂລກ ແລະ ສົນທິສັນຍາສາກົນວ່າດ້ວຍການຄວບຄຸມຢາສູບ. ສປປ ລາວ ເປັນປະເທດ ທີ 26 ຂອງໂລກ ທີ່ໄດ້ຮັບຮອງເອົາມາດຕະການດັ່ງກ່າວ ລວມທັງຣາຊະອານາຈັກໄທ, ສິງກະໂປ ແລະ ມຽນມາ ໃນພາກພື້ນອາຊຽນ. ມຽນມາ ກຳລັງກະກຽມ ຈັດຕັ້ງປະຕິບັດມາດຕະຖານການຫຸ້ມຫໍ່ ຜະລິດຕະພັນຢາສູບ ພາຍໃນ ວັນທີ 31 ທັນວາ 2024 ນີ້.
ທ່ານ ດຣ. ອູນລີຊິສ ໂດໂຣເທໂອ (Ulysses Dorotheo) ຜູ້ອໍານວຍການສະມາພັນ ຄວບຄຸມຢາສູບ ອາຊຽນ ກ່າວວ່າ “ເປັນໜ້າເສຍໃຈ ທີ່ບໍລິສັດຢາສູບ ສືບຕໍ່ຫຼົບຫຼີກການປະຕິບັດກົດຫມາຍ, ເຖິງວ່າລັດຖະບານຈະໃຫ້ ເວລາພຽງພໍ ໃນການກະກຽມແລ້ວກໍຕາມ. ສະມາພັນຄວບຄຸມຢາສູບອາຊຽນ ຮຽກຮ້ອງ ມາຍັງກະຊວງສາທາລະນະສຸກ ແລະ ຄະນະກໍາມະການແຫ່ງຊາດເພື່ອການຄວບຄຸມຢາສູບ ຈົ່ງມີຄວາມໜັກແໜ້ນ ແລະ ຮັບປະກັນຕໍ່ການບັງຄັບໃຊ້ກົດຫມາຍຢ່າງເຂັ້ມແຂງ.
ສະມາພັນຄວບຄຸມຢາສູບອາຊຽນ ຮຽກຮ້ອງມາຍັງລັດຖະບານ ສປປ ລາວ ຈົ່ງເພີ່ມທະວີຄວາມພະຍາຍາມໃນການຕິດຕາມຢ່າງຕໍ່ເນື່ອງ, ນໍາໃຊ້ມາດຕະການໃນການລົງໂທດຢ່າງໄວວາ ຕໍ່ການລະເມີດຂອງບໍລິສັດຢາສູບ ແລະ ຮັບປະກັນວ່າ ການບັງຄັບໃຊ້ ຂໍ້ຕົກລົງ ຄໍາເຕືອນສຸຂະພາບເປັນຮູບພາບທີ່ບໍ່ມີການໂຄສະນາຜ່ານຊອງ ແລະ ຕຸດຢາສູບ ໃຫ້ສົມບູນ ແລະ ປະຕິບັດມາດຕະການຕໍ່ການລະເມີດ ຢ່າງເຂັ້ມງວດ ທັ້ງນີ້, ເພື່ອປົກປ້ອງ ສຸຂະພາບຂອງປະຊາຊົນລາວ ໂດຍສະເພາະ ເຍົາວະຊົນ ແລະ ຊາວຫນຸ່ມ ຈາກຜົນຮ້າຍຂອງການສູບຢາ ແລະ ເພື່ອສຸຂະພາບທີ່ດີໃນອະນາຄົດ.