ສະພາ ສ.ເກົາຫລີ ກຽມລົງມະຕິຮອບສອງ ເພື່ອຖອດຖອນປະທານາທິບໍດີ 14 ທັນວານີ້
ລັດຖະສະພາ ສ.ເກົາຫລີ ກຽມລົງມະຕິເພື່ອຖອດຖອນປະທານາທິບໍດີ ຢຸນຊອກຢໍ ເປັນຄັ້ງທີສອງ ໃນວັນທີ 14 ທັນວານີ້.
ພັກປະຊາທິປະໄຕ (DP) ເຊິ່ງເປັນພັກແກນນໍາຝ່າຍຄ້ານຂອງ ສ.ເກົາຫລີ ເປີດເຜີຍວ່າ: ສະພານິຕິບັນຍັດແຫ່ງຊາດກຽມລົງມະຕິຍັດຕິຖອນຖອນປະທານາທິບໍດີ ຢຸນຊອກຢໍ ອອກຈາກຕໍາແໜ່ງ ຈາກການປະກາດກົດໄອຍະການເສິກ ໃນເວລາ 17:00 ໂມງ ຕາມເວລາທ້ອງຖິ່ນຂອງວັນທີ 14 ທັນວານີ້ (15:00 ໂມງ ຕາມເວລາປະເທດລາວ).
ຄວາມພະຍາຍາມດັ່ງກ່າວຂອງຝ່າຍຄ້ານຈະຖືເປັນຄັ້ງທີສອງຕໍ່ຈາກການລົງມະຕິວັນທີ 7 ທັນວາຜ່ານມາ ເຊິ່ງບໍ່ຜ່ານການຮັບຮອງຈາກກອງປະຊຸມ ເນື່ອງຈາກສຽງສະໜັບສະໜູນບໍ່ເຖິງສອງໃນສາມ ແລະ ສະມາຊິກເກືອບທັງໝົດຂອງພັກພະລັງປະຊາຊົນ (PP) ເຊິ່ງເປັນພັກລັດຖະບານຍົກເລີກກອງປະຊຸມ.
ຂະນະທີ່ຜົນສໍາຫລວດຄວາມຄິດເຫັນຊາວ ສ.ເກົາຫລີ 1,000 ຄົນ ອາຍຸ 18 ປີຂຶ້ນໄປ ໂດຍສໍານັກງານວິໄຈ ຮັນກິວ ລະຫວ່າງວັນທີ 8-9 ທັນວາ ແລະ ເຜີຍແຜ່ໃນວັນທີ 11 ທັນວາ ພົບວ່າ 76.1% ຂອງກຸ່ມຕົວຢ່າງສະໜັບສະໜູນຍັດຕິຖອດຖອນປະທານາທິບໍດີ ແລະ 21.9% ຄັດຄ້ານ ໂດຍກຸ່ມຜູ້ມີອາຍຸຢູ່ໃນຊ່ວງອາຍຸ 30 ປີ ສະໜັບສະໜູນຍັດຕິຖອດຖອນຫລາຍທີ່ສຸດ 85.4% ຮອງລົງມາແມ່ນກຸ່ມອາຍຸ 40 ປີ ແລະ 50 ປີ ມີອັດຕາສະໜັບສະໜູນ 82.9% ແລະ 82.8% ຕາມລໍາດັບ.
