ປະທານາທິບໍດີ ທຣຳ ປະກາດໃຫ້ໃສ່ຊື່ ສປປ ເກົາຫລີ ໃນບັນຊີລັດສະໜັບສະໜູນກໍ່ການຮ້າຍ

ປະທານາທິບໍດີ ​ໂດ​ນັນ ທຣຳ ຜູ້ນຳ​ອາ​ເມ​ລິ​ກາ ປະກາດ​ໃຫ້ ສປປ ​ເກົາຫລີ ຢູ່​ໃນ​ບັນຊີ​ລາຍ​ຊື່​ລັດ​ທີ່​ສະໜັບສະໜູນ​ການ​ກໍ່​ການ​ຮ້າຍ, ​ເຖິງ​ວ່າ​ລັດຖະມົນຕີ​ຕ່າງປະ​ເທດ​ອາ​ເມ​ລິ​ກາ ກ່າວ​ວ່າ: ອາ​ເມ​ລິ​ກາ​ຍັງ​ບໍ່​ຍົກ​ເລີກ​ຄວາມ​ຫວັງ​ທີ່​ຈະ​ເຈລະຈາ​ກັນ ​ເພື່ອ​ຢຸດ​ໂຄງການ​ນິວ​ເຄຼຍຂອງ​ລັດຖະບານ ສປປ ​ເກົາຫລີ.

ຜູ້ນຳ​ອາ​ເມ​ລິ​ກາ​ໃຫ້​ຄຳ​ໝັ້ນວ່າ: ຈະ​ໃຊ້​ມາດ​ຕະການ​ຂວ້ຳບາດ​ທາງ​ການ​ເງິນຂອງ​ອາ​ເມ​ລິ​ກາ​ຈັດການ​ກັບ ສປປ ​ເກົາຫລີ ​ໂດຍ​ໄວ, ພາຍຫລັງ​ໃສ່​ຊື່ ສປປ ​ເກົາຫລີ ​ໄວ້​ໃນ​ບັນຊີ​ດຳ​ສະໜັບສະໜູນ​ກໍ່​ການ​ຮ້າຍ​ທີ່​ນຳ​ໂດຍ​ອີຣານ ​ແລະ ຊີ​ຣີມາ​ກ່ອນ​ນີ້. ປະທານາທິບໍດີ ທຣຳ ກ່າວ​ວ່າ: ​ເລື່ອງ​ນີ້​ຄວນ​ຈະ​ດຳ​ເນີນ​ການ​ມາ​ດົນ​ແລ້ວ ​ໂດຍ​ອ້າງ​ເຖິງ​ກໍລະນີ​ນັກ​ສຶກສາ​ຊາວ​ອາ​ເມ​ລິ​ກາ​ທີ່​ເສຍ​ຊີວິດ​ ພາຍຫລັງ​ຖືກ​ຄວບ​ຄຸມ​ຕົວ​ຢູ່ ສປປ ​ເກົາຫລີ ​ແລະ ຄະດີ​ຄາດ​ຕະກຳ​ອ້າຍ​ຂອງ​ຜູ້ນຳ ສປປ ​ເກົາຫລີ ຢູ່​ຕ່າງ​ແດນ.

​ເຖິງ​ຢ່າງ​ໃດ​ກໍ​ຕາມ, ທ່ານ ​ເຣັກ ທິວ​ເລີ​ສັນ ລັດຖະມົນຕີ​ຕ່າງປະ​ເທດ​ອາ​ເມ​ລິ​ກາ ຖະ​ແຫລ​ງຕໍ່​ສື່​ມວນ​ຊົນ​ພາຍຫລັງ​ກອງ​ປະຊຸມ​ຄະນະ​ລັດຖະບານ​ວ່າ: ອາ​ເມ​ລິ​ກາ​ຫວັງ​ວ່າ​ມາດ​ຕະການ​ຂວ້ຳບາດ ​ແລະ ວິທີທາງ​ການ​ທູດ​ຈະ​ສາມາດ​ກົດ​ດັນ​ທ່ານ ກິມ ຈອງ​ອິນ ຜູ້ນຳ ສປປ ​ເກົາຫລີ ​ໃຫ້​ຕົກລົງ​ເຂົ້າຮ່ວມ​ການ​ເຈລະຈາ ​ເພື່ອ​ໃຫ້​ຍົກ​ເລີກ​ໂຄງການ​ນິວ​ເຄຼຍ ສປປ ​ເກົາຫລີ ​ແລະ ກ່າວ​ວ່າ: ມາດ​ຕະການ​ລົງ​ໂທດ​ໄດ້​ສົ່ງ​ຜົນ​ເສຍ​ຫາຍ​ຢ່າງ​ໜັກ​ຕໍ່​ເສດຖະກິດ ສປປ ​ເກົາຫລີ.

error: Alert: Content is protected !!